خليني ساكتة ٥٩ - مصطفى أديب أو منير ابو الخدود... عصابة واحدة نتيجة واحدة!

خليني ساكتة

تم النشر في 31 أغسطس 2020


دياب اديب عيتاني ابو الخدودما رح تفرق مين الاسم بس هالمرة جاية محصن بهالة صاحب الامانة وحاملها اوعى حدا منكم يكون افتكر انه صدفة تسريب اول صورة للسفير المكلف مكللة بالاخضر مع هيدا وكله كل هيدا مش مهم ولا مهم الاسم اذا ما كان جايب معه الورقة الخضرا fresh money يا د. اديب زايدة نسبة الدكاترة بحياتنا هالايام انا برأيي اي تسوية بتفوت فيها لازم تكون مأمن لها حسابتها سهلة رح قل لك اياها من الاخر:بما انه كل رؤوساء الحكومة السابقين سموك، اتفق معهم يردوا جزء من الاموال المنهوبة (ما بحياتك اعمل خدمة بوج الله بهالبلد وحدة بوحدة) قلهم بجي صورة بس اعطوني بالمقابل كلمة اعطوني فرصة للشعب هيدي شيلها من القاموس ١٠ اشهر تكليف وتأليف وفرص آخرها متل ما شايف عالارض يا حكم بعدين انت جاية من عند الالمان يعني صافق مشوار طويل مش بالمسافة لاااااا بالسنين الضوئية الفرق بين لبنان والمانيا، ليك برضايي عليك بدنا اياك تشتغل عالالماني نحن منحب الاجانب ما تعمل لبناني اصيل هيدا اللي بس يوصل ع لبنان بيشلح حضارته بالمطار وبفوت عم يكب الاوراق من شباك السيارة بس يعين الوضع ما كتير بطمن سمعنا انك كبيت بال Pcr قبل ما تطلع ع درج الطيارة

الرئيس المكلف دخّل اسم عيلة جديد عالواجهة مش غلط ما العيل السياسية السبعة طلعت ريحتها، وجاية هالمرة من عاصمة الثورة يا حرام يا هالثورة، يمكن كان الاجدى نبقى قاعدين وما نفتح تمنا طالما هيك بدنا نخلص سحبوا نبضنا بعد ما سرقوا مالنا وارواحنا مبروك رئيس حكومة مكلف مستشار لرئيس حكومة سابق متهم بنهب قروض الفقرا بملفات مصرف الاسكان مكلف من فم رئيس حكومة سابق استقال تحت ضغط الشارع بمباركة رئيس حكومة اسبق مطالب بالكشف عن مصير ١١ مليار دولار 

اسم هدية لرئيس فرنسا، انه واحد طلب منك تطبخ له skeleton حكومة لانه جاية يزورك بترده خايب؟ ما اكرام الضيف من صفات اللبناني 

وسبق بين بعبدا والحريري مين بقدم الطبق لماكرون هلق المرة الماضية الحريري ما سمى بس امن نصاب الجلسة وحجب الثقة هيدي المرة كان السباق بالتسمية ناطرة انا لشوف تحديدا على شو رسيت الطبخة اي حصة من الكتف طلع له اوعى تقل لي ولا شي وهيدا كله كرمال الشعب شيخ سعد يعني كيف بدي قل لك نحن الشعب ما بقى قادرين نحمل حرصك علينا يعني من الحرص من قتل 

بعدين يعني اذا عندكم شخصية فذة انقاذية على قد المرحلة ليه ما رحتوا عليها من ١٠ اشهر؟ وفرتوا علينا.. وبعدين توافق وانه الحريري بالقيادة بأيده الثنائي الشيعي بعاجله باسيل انه مش قبول عادي لاااا قبول مع طاعة انه نحن التزمنا بمن يسميه الحريري وليد بيك يقبر قلبي هني شو بقل له الرئيس بري بيبصم وبيمشي بعدين مستقلين وزنه لوليد بيك رجع الحزب شخصيا يتواصل معه لرأب الصدع بخلدة بعد ما تبين انه حلفاء الحزب من عند الدروز وزنهم خف الريشة بالمنطقة، الحكيم هلق بزيح الاستراتيجية رفض التسمية بكرا بلحق حاله بزيح التكتيك وبيمنح فرصة على شكل نصاب من هون ثقة من هونيك 

على الهامش سؤال لما الاستشارات النيابية الملزمة اعلن نتيجتها سالم زهران قبل بيوم وتقرب موعد الكشف عن الاسم من وج الضو لzoom call قبل بليلة انه لشو الاختلاط بزمن الكورونا؟ وعجقة السير وصرف البنزين وزيادة التلوث ما كنتوا ببساطة عملتوها على zoom برفع الايدي

بس هلق شو يعني خلص؟ منحط ايدينا واجرينا بمي باردة خلص؟ مشي حال البلد؟ بكرا رح تترجع الاموال المنهوبة؟ ورح تتعلق مشانق المسؤولين عن تفجير المرفأ؟ ورح تتدفق الاستثمارات الخارجية؟ وتعم البحبوحة؟ والسيادة دخيلكم طمنونا عالسيادة.. يعني قرار السلم والحرب رح يصير بإيد الدولة؟ والسلاح الوحيد هالاراضي اللبنانية رح يكون بإيد الجيش؟ على كل حال مبروك مش بس رئيس حكومة مكلف الا الحجر الاساس للدولة المدنية، اصلا الدولة المدنية من اهم مقوماتها يكون رئيسها مدعوم من اكبر حزب ديني من مميزاته الانتصارات الالهية بس متل ما قال الرئيس بكرا بيرجع اكل واحد فينا ال lucidite ومنعرف قيمة العهد وانجازاته خصوصية المدنية منها 

 ان شاء الله موت اذا عم كذب بس بعد جريمة المرفأ افتكرت انكم رح تحسوا على دمكم بس بعتقد ما بقى في دم.. لان الدم الوحيد الباقي بهالبلد هو دم المدنيين العزل اللي كل كم يوم بسيل او بسبب اهمالكم او بسبب تحريضكم او بسبب اجرامهم 

هلق انا بحسب آخر خطاب للسيد بندرج ضمن الاعلام المأجور المحرض الحاقد من هيك خليني ساكتة--