خليني ساكتة ٦١- الفرنسيين "ما خلوا" باسيل والميثاقية على المحك.. و"جيوب" بدري ضاهر "تنقذه"!

خليني ساكتة

تم النشر في 13 سبتمبر 2020



بيعتكف؟

بيعتذر؟

أو بشكل؟

سهلة بما انك مسمى بهالة فرنسية خود الأسماء وطلاع حطهم بين ايدين بين الكل، وخليه هو يصطفل منه لحلفاؤه يعني كيف بدي قل لك بتكون عملت خدمة مع الشعب حتى لو اعتكفت او اعتذرت من بعدها فوتهم ببعض وفليت، ما تنسى انك دافع من جيبتك على مكان اقامتك وبالتالي ما حدا اله عليك.. هلق بعرف انك ممكن تخسر منصب السفير واي منصب اخر انت وعيلتك وعيلة عيلتك بس لما نغير الطبقة السياسية منعوض لك اياها

الصهر المعجزة جي بي اعلن انه التيار ما رح يشارك بس نسي يخبرنا بالتفاصيل "انه الفرنسيين ما خلوه"

قرر جي بي يقعد عاقل، ولو على شكل حردان لان ببساطة ما متت بس شفت مين مات

يعني هلق مش وقتها وجعة الراس يقوم ينزل شي عقوبات عليه، بي الكل ما بيقدر يحمل ملفين مع بعض انه ما رح يعرف شو بده يعمل بهيك حالة لمين بيعطي priority لبدري ضاهر المعتر المسجون بلا ac او للصهر المعجزة اذا لا سمح الله طالته عقوبات؟ خصوصي انه العقوبات طالت واحد شيعي، لااا ومش اي واحد، يعني ما رح يقدر يعتمد الرئيس على المطالبة بالمساواة متل بموضوع بدري ضاهر

قديه درجة الوقاحة اللي عايشين فيها، قبل ٤٠ يوم من موت آلاف اللبنانيين باهمالكم طلعتوا المتهم الاول على المستشفى لان تعذر نقله على سجن مريح اكتر.. طلعت قدرة تحمل جيبوبه الانفية لبدري ضاهر مش على قدرة تحمل جيوبه الحقيقية اموال الفساد ولا على قدر تحمل ضميره المهني الاهمال ما قدرت تتحمل الشوب يومين زيادة ليبرد دمنا؟

بعدين الحريق التاني صار هو بدري بالسجن، طلعوا هلق وحطوا الحق عليها وعلى ادارة المرفأ مثلا لان يبدو التخزين كتير مدروس ومتقن.. واصلا المتهم بريء حتى تثبت ادانته ما عدا معلم اللحام.. على فكرة بعتقد هيدا معلم اللحام رح تطلبه اجهزة المخابرات بالعالم وتستعين بخبراته لتدمير العدو، ومين بيعرف يمكن الادمغة المقاومة تستعين فيه للوضع الخطة المناسبة للقضاء على العدو الصهيوني

معلم اللحام قدر يخرق حالة الطوارئ، وباغت الجيش اللي كان مثقل بهموم تفريق المتظاهرين وحماية السلطة من جهة وموضوع السمك الموريتاني والشاي السيلاني، ورجعت الطابة على القصر الجمهوري.. وهون من الضروري جدا التنسيق بين هفوات رئيس الجمهورية وبين المكتب الاعلامي لرئاسة الجمهورية لان عم نضيع للصراحة.. بتحس هيك الرئيس آخد حبة هيدا اللي بيحكي الحقيقة متل ما هي، والمكتب الاعلامي بس يشوفه فات بالحيط بطلع بيان بدل ما يكحلها بيعميها

يوم الاثنين اساسي القاضي فادي صوان رح يستمع للواء عباس ابراهيم بقضية المرفأ، بافتتاح المجموعة التاسعة من ال٥ ايام تحقيق اللي وعدونا فيها غداة جريمة العصر، صحيح تأخروا بالاستماع للواء بس لانه كان بفرنسا عم يقنع الفرنساوية بأجيل التشكيل، والابقاء على المالية مع الشيعة، ويعطوا وزراء لرئيس الجمهورية.. بس catastrophe الفرنساوية ما قبلوا مع اني انا اصلا حاسة انه كل التدخل الفرنسي هو لما يرجع العماد عون لعندهم، ضروري فك شوي عن الرئيس لان هلق بقولوا انه عم نغتاله سياسيا ومعنويا للرئيس متل ما قال آلان عون (ما تفكروا انه هو حاطت كل العيلة حوله.. هيك مساقب انه قيادي بالتيار ونائب وابن خي الرئيس)

الشيعة العقدة الاساسية بتشكيل الحكومة لان بحسب الرئيس بري اذا ما اخدوا المالية ما رح يشاركوا ورح تفقد ميثاقيتها.. يمكن لازم الاستيذ يبلش يقول انه حركة امل وحزب الله رافضين يشاركوا بالحكومة ومش الشيعة.. وقبل ما حدا يقل لي انهم هني بشكلوا ٩٠٪ من الشيعة بحسب صناديق الاقتراع بتمنى عليكم كمان تنتبهوا انهم بشكلوا حوالي ٩٠٪ من نسبة المقترعين اللي باحسن حالاتها وصلت ل ٣٧٪

وبعدين يعني ما بظن يعني مثلا رح تنقطع الكهربا او المي او الطبابة المجانية عن الطايفة الشيعية اذا شي وزير من غير طايفة استلم المالية منمضيه على تعهد انه ما يضرب الامتيازات اللي مكتسبتها الطايفة، واذا شاغل بالك دولتك موضوع العمولة منخليه يتعهد بإنه ما يتخطى بولا طريقة الـ ٧٪ اللي من صلب عرف الوزارة

انا شخصياً فاهمة تعصيبك، انه مش هينة يعني ايدك اليمين والمعاون السياسي والوزير السابق والنايب ومشكل الحكومات تنزل عليه العقوبات بهيدا الوقت بالذات، هيدي ترامب الارعن مش قاعد عاقل، وانا معك شامة ريحة مؤامرة وانه حاطت كل تقله لضرب الميثاقية، دخلك هلق الميثاقية هيدي يعني بند من بنود الدولة المدنية؟

على سيرة الدولة المدنية شهد هيدا الاسبوع حدث تاريخي بس رفضوا يسموه انجاز، اخراج القيد الالكتروني، صحيح انه وقف العمل فيه بعد شي ٣ ايام على اطلاقه، لان موظفين الدولة بعد ما بيعرفوا يستعملوا الكمبيوترات، بس مش مهم المهم انه تم اطلاقه، واللي ما انتبه اخراج القيد الالكتروني ما بيفرق عن اللي قبله بشي لان زيارة المختار او قلم النفوس ضرورية لتوقيعه ولتصديق الصور.. الامر الوحيد اللي تغير هو بدل ما الدولة تعمل print out لاخراج القيد صار المواطن يعملها.. والسبب الحقيقي من وراها انه على الارجح ما بقى في بالدواير الرسمية ورق والورق صار غالي

ْ

على الهامش قال كل اشارات السير بلبنان مهددة تنطفي بـ ١٣ تشرين لان عقود الصيانة واقفة من نيسان، اصلا اصلا مين بحاجة لاشارة سير ببلد ماشي خليفاني؟ يعني شو رح تفرق مثلا اذا في شارة سير انه رح تخف العجقة مثلا؟ لا انا شخصيا ما بقبل كتير بحس بالراحة النفسية خلال رحلاتي بباركينغ لبنان الكبير العجقة بتعطيني فرصة تأمل بمستقبلي كتير مرات بخاف يفتح السير قوم شيل من راسي فكرة الهجرة

ان شاء الله موت اذا عم كذب بس احداث هيدا الاسبوع غيرت النظرة الجغرافية للبنان بطل يمتاز بقرب جبله من البحر، اثبتت مدى قرب حرايقه من سيوله.. على كل حال انا كنت من المحظوظين بهيدا البلد وتخرجت من الجامعة اللبنانية قبل ما يمضوا الطلاب على تعهدات بعد الكلام او المس او التعرض للجامعة واساتذتها على مواقع التواصل الاجتماعي من هيك بعدني عم بقدر اكتب وقدم... خليني ساكتة