خليني ساكتة ٦٨ - وجوه "جديدة" بتلبق للمرحلة "جديدة"!

خليني ساكتة

تم النشر في 2 نوفمبر 2020


السيد متفائل ولكن غير مفرط بالتفاؤل انا مع الحرص بالتفاؤل هو الإسراف بالتفاؤل مكروه مش قليل الضغط بتشكيل الحكومة خصوصي انه تشكيل الحكومة مستمد  قوته من المبادرة الفرنسية هيدي البلد اللي مع قمع الأديان واللي تصرح تصريحات ضد قطع الرؤوس والنحر 


على اي حال بما انه الافرقاء السياسيين مجمعين انه التشكيل شأن داخلي بحت  انقاذي بالشكل والمضمون من الوجه الجديد سعد الحريري بتنبع الثقة بالحكومة المرتقبةمع صعود اسمه المدوي مش بس الدولار نزل اول كم  يوم حتى عدد حالات كورونا نزل قبل ما تبلش الامور ترجع لقواعدها


 وبما انه الشيخ سعد وباقي الافرقاء اكدوا انه تشكيل الحكومة ما خصه بالانتخابات الاميركية ونتائجها  ونزولا عند رغبة الاغلبية الساحقة ومنهم السيد، والعالم اللي دايما بتنتقدني وبتقول  يا ريت تبقي ساكتة لانك بس شاطرة بالنق وما بتطرحي حلول


قررت هالمرة حط ايدي بإيد الرئيس الجديد صاحب الوعود الصادقة اللي ما بعمره خيبنا من يوم اللي وعدنا بمترو بال  ٢٠١٦ليوم اللي وعدنا ب ٩٠٠ الف وظيفة بال ٢٠١٨ ولما وعدنا باستعادة الاموال المنهوبة. بال ٢٠١٩  قررت حط حرصي بالتفاؤل على جنب والعبها صولد واكبر، انا مع حكومة من ٢٠ وزير اصلا حرام تحميل اي وزير اكتر من حقيبة، هني بحقيبة وحدة مش مخلصين،


وهيدا أحد أسباب انفجار المرفأ لان ما كانوا عم يلحقوا يقروا البريد كله هلق صحيح اميركا مثلا اللي حجم اقتصادها ٢٠ تريليون دولار بديرها ١٤ وزير، بس مش مهم النوعية المهم الكمية، بعدين نحن ما منوثق بالادارة الاميركية للامور صرفت ٣ تريليون دولار مساعدات بفترة كوفيد وهلق عم يتخانقوا قديه بدهم يصرفوا بعد لمساعدة الشعب  خلينا فينا نحن الشعب العظيم وعهده القوي، ٢٠ وزير كتير مناح، يعني لا كتار ولا قلال للصراحة،


برافو حبيت الخيار الخارجية للسنة حلو التغيير، انا بسمي الاختصاصي ابو صالح للمنصب، اول شي لانه سمى الشيخ سعد فبيستحق مكافأة وتاني شي هيك بفوت عالمحافل الدولية بيصفقهم وحدة "انت عارف حالك مع مين عم تحكي؟"

ومنشوف لبنان عم يصعد على الخريطة العالمية من جديد وعم يستقبلوه بدول العالم من بعد اللي الوضع المزري اللي حطنا فيه الصهر المعجزة، بس هو ما خصه على فكرة، وهيدي ما خصها بما خلوه هيدي لان هو مش اختصاصي بالخارجية  من هيك انا بطالب بمنح حي بي وزارة الطاقة لانه هو اختصاصي بواخر اختصاصي عتمة اختصاصي صفقات ومعليه هلق شيخ سعد مسحها بدقني انه ما سماك المسامح كريم بشيل عنك يعني كيف بدي قل لك اختصاصه بالوزارة مكلف البلد ٤٢ مليار دولار احسن ما يجينا وزير داخلية، يا دلي انا عم تتخايلوا يجي وزير داخلية الوجه الجديد جبران باسيل مثلا؟ 


 خطوة جيدة من الطاشناق، انا لو كنت محلهم كمان ما بقبل بوزارة الطاقة، خلص اعطيهم الشؤون الاجتماعية ما هي مش بعين حدا بعد ما جفت المساعدات الدولية  بس فيك تجيب اختصاصي من المردة وزير اشغال حرام بعد ولا مرة اجوا على الوزارة، بعدين ما بتقدر تشيل الوزارة من المردة وتعرض علاقات المصاهرة للخطر، وزير الاشغال على علاقة مباشرة بمطار بيروت حيث تقع ال DUTY FREE اللي هي على علاقة مباشرة مع الكتلة المسيحية كفاية لتغطية ميثاقية الحكومة هول صراحة ال فرنجية بيستاهلوا حقيبتين مش وحدة سموك وامنوا الميثاقية 


 هلق بعرف وليد بيك بده وزارة الصحة، بيستاهلها وانا بقول يا ريت نعطيها للوجه الجديد اكرم شهيب هيك بركب كميرات ومنصير نعرف هالادوية وين عم تختفي..  

وليد بيك نفي انه هو قال انه هو والرئيس بري اكتر المتضررين من الفساد بس انا بأكد هيدي النظرية، انا ما بحياتي شفت متضرر من الفساد قد وليد بيك والرئيس بري، يعني من كارتيل النفط لمعمل سبعين والرئيس بري فنى عمره معنا.. كان قادر يأمن مستقبله كامل بأفريقيا قبل انه يضحي ب ٢٨ سنة لهلق، مكتفي ب ٥١٪ من اي شي بيطلع قدامه وهيك هيك نحن عند الرئيس بري المالية ما بتلبق الا للوجه الجديد على حسن خليل يعني ٧٪ صارت تحرز بعد العقوبات الاميركية 


وزارة الاتصالات بتلبق لاختصاصي من حزب الله، اصلا هني اختصاصيين من ايام شبكة الاتصالات، هلق ما تطلعوا تتفلسفوا وتقولوا ٧ ايار ما ٧ ايار هيدي مرحلة جديدة بوجوه جديدة وبتبلق للوجه الجديد حسين الحاج حسن بس ما تفكروا ابدا اني ناسية تضحيات محمد شقير بالوزارة هيدا الوجه الجديد ولانه وجه خير علينا نحن جماعة كلن يعني كلن انا بطالب له بوزارة الاقتصاد بلكي بحط علينا شي صريبة ترجع تهز هالشعب العظيم وما تلمه من الطرقات 


على الهامش  البيئة ما بتلبق الا للوجوه الجديدة محمد المشنوق او فادي جريصاتي ع وزراء البيئة حتى يتعاملوا مع المشهد الجديد للزبالة المعباية الطرقات  او ما حدا يسمعني صوته وزارة التربية بترجع للوجه الجديد الياس بو صعب، وبلا قضايا ندى عويجان بلا بطيخ، وخاصة هلق قال الوزير طاعن بنتائج امتحانات كليات الطب عن جد عينه ضيقة هالوزير كل اللي رجعوا نجحوا ما بيطلعوا ٦٨ طالب مشينا هلق بدك تسقط غيرهم..

وبلكي طلع بين اللي بدك تسقطهم اولاد عمال واساتذة كمان متل اللي رجعوا نجحوا؟ بعدين بدنا طلاب جداد للاساتذة الجداد  بس عادي الوزراء الحاليين مضيوا انهم ما بيترشحوا على الانتخابات اول ما تعينوا بس اي هني ما مضيوا على المناصب العامة، يعني واحد اذا ما استفاد يعين حاله دكتور بالجامعة من بين آلاف الاساتذة المتفرغين انه شو بكون عمل وزير ببلاش؟؟؟ 

  وزارة العدل ما بتلبق الا للوجه الجديد سليم جريصاتي عالم وعليم بما يرضي رئيس الجمهورية بلا وجعة راس اخلاء سبيل من هون، عدم اقالة بدري ضاهر وحسن قريطم من هونيك يعني بدنا وزير عدل يبصم على كل انجازات الرئيس واهم اهم شي يأمن القوانين للتحقيق الجنائي بمصرف لبنان ويثبت خطى قانون النقد والتسليف ومن جهة تانية يتفهم الخطورة الامنية على موظفين المصرف  

ان شاء الله موت اذا عم كذب بس الفاريز اند مارسال راح تدفع ١٥٠ الف دولار اللي استحقتهم من قلة الشغل للحاكم بأمر الليرة مكافأة على اهم نصبة تاريخية ترتكب بحق شعب، لا وشو بدهم يطلعوها براس الشركة اللي مضت انها تشتغل بحسب القوانين اللبنانية بانتظار انه الحاكم يجفف ال ٢٢ تريليون ليرة اللي ضخها بالسوق قبل ما يجف آخر نفس عم نلتقطه بالبلد ويموت آخر واحد فينا على ابواب الصيدليات والمستشفيات انا خليني ساكتة