خليني ساكتة ٨٣ - لهم "مسبار الأمل"... ولنا حفنة من الفاسدين وصندوق لُقاح!

خليني ساكتة

تم النشر في 15 فبراير 2021



نحن شعب شجع وحقود وغيور وما منقدر النعمة ودائما عينا على انجازات الغير لتشوفوا قديشنا ناكرين الجميل ضاق بعينا انه الامارات اطلقت مسبار عالمريخ وقال صرنا نقول يا هيك القادة يا بلا ما قدرنا انه نحن قادتنا جابولنا المريخ لعنا ما هو بالطريق ع جهنم بتمرق بالمريخ حيث الماء نادر ولا هواء ولا امكانية للعيشبعدين ما عم افهم تحديدا تحديدا نحن كشعب لبناني شو بدنا؟ اللقاح ووصل بعدين عادي هني احتفلوا بأول صورة من المريخ ونحن احتفلنا بأول صندوق لقاحات صورة الصندوق اليتيم للقاح فايزر واول لقاح لابو سليم بوجود جحافل الصحافيين والمستقبلين بتكرس صورتنا كبلد شحاد كبلد جاهل يعني بغرفة التطعيم كان في جمهور قد ما في جمهور بمباراة فوتبول 

وبيكفي نسمع وزير الصحة لنعرف قديشنا محظوظين هلق بليز ما تتاخدوا كتير بحكيوا لدرجة تحسوا متل ما هو حس وحاول يحسسنا كإنه نحن اللي اخترعنا اللقاح، بس هو قصدوا ينسينا اننا مستوردينه بالدين

وصحيح انه كل اللي وصلوا ٢٨ الف لقاح و٥٠٠ بس ما تخافوا اول شي موسم الانتخابات اللي جاية رح يكون برعاية اللقاحات بدل الزفت وتنكة البنزين هلق صراحة ما بعرف بعيدي الحالة اذا منعتبر انه الاصوات الانتخابية عم تغلى او عم ترخص هيا بنا لبناء دولة باصوات انتخابية خالية من كورونا 

بس التصريح الاكثر تعبيرا عن الانجاز بوصول اللقاح هو تصريح بي الكل يطول بعمره ويخليه فوق راسنا "مع وصول الدفعة الاولى من اللقاح ضد كورونا تبدأ رحلة التلقيح لمكافحة هذا الوباء"، تصريح معبر عميق عنده دلالات على البصيرة اللي بيتمتع فيها الرئيس، منغمض عيونا ومنعرف انه من السهل التنافس مع مسبار الامل وذا لاين ورؤية ٢٠٣٠ واي رؤية سابقة، حالية او لاحقة، بس هيدا ما كان الشي الوحيد الرؤيوي اللي قدمه رئيس الجمهورية هيدا الاسبوع، لان كان في السؤال اللي وجهه للحريري لما قل له "شو جايي تعمل؟" هو فعلاً نحن كمان ما منعرف هو شو كان رايح يعمل او شو بعده عم يعمل او شو عم بحاول يعمل، حتى مع الخطابات الرنانة يعني بالقليلة منعرف انه جبران فشل كل هالعمر لان ما خلوه بس سبب فشل الرئيس الحريري بعد غير واضح لإلنا بكل أمانة.

مرات بقعد فكر انا مثلا اذا طلعوني بواحد من هول برامج اختار بين اتنين وحطوا لي صورة الشيخ سعد وتوم ب توم اند جيري مين فيهم ما بيزبط اي قرار بياخده ولا مرة رح احتار كتير رح احتار

خصوصي اني لازم فكر بالاجابة مرتين ما حدا بيعرف كيف بتقلب الايام خصوصي عم ينحكى بده يرجع يفتح تلفزيون المستقبل انه بالنتيجة ما بدي انعزم على مقابلة ويرجعوا يعتذروا مني متل ما صار مع بشرى الخليل بالمنار بس معليه نحن منعرفك كوبرليه وهالمرة فديتي الطايفة بكاملها وما رح ينسولك اياها، تماما متل لما سحبتي ترشيحك بصور كرمال وحدة الصف الشيعي تخايلي مثلا كنت تطلعي عالمنار ويصيروا اصحاب الدش بدهم يقطعوا المحطة بالبيوت الخاصة مناصرين الحركة.. اي كانوا لهلق بعد ما خلصوا فرز

يعني المنار مش ام تي في، ال بي سي، او الجديد حتى هيك بكبسبة زر تنمنع بكل الضاحيةكمان حفظوا لك مقامك بالقليلة ما حدا طلب منك تعتذري يوم الل اخترتي القذافي عالرئيس بري، يعني شفتي بعينك هالاسبوع اعتذار الشيخ علي خليل يعني المعتر كل اللي عمله قري مجلس عزا وصار اللي صار منيح ما ام المصلين، على كل حال اثبت جزء كبير منا كلبنانيين انه التفاهة عابرة للطوائف من انتقاد مجلس العزا لانتقاد الترتيلة وتحويل عملية اغتيال سياسية لمشادة دينية اجتماعية.

بالوضع الاقتصادي بلشت تطلع لوائح منها مبالغ فيها ومنها شائعات ومنها حقيقية عن مصارف باقية، ومصارف متجهة للاندماج وانه في ١٦ مصرف رح يسكروا.. هلق منحب نطمنكم انه القرض الحسن مش وارد اسمه بأي وحدة من هل اللوائح وبالتالي المصرف المركزي البديل وودائعكم بأمان

على الهامش ما يطلع حدا ويقل لي عم تتهرب السلع، هيدا اسمه تصدير، ما اسمه تهريب.. نحن عم نصدر فائض السلع المدعومة انه مش احسن ما تتخزن بالمدينة الرياضية؟ بعد في ثوار من طرابلس مسجونين، تخايلوا واحد يطالب بتحسين وضعوا الاجتماعي ويبقى برا، لازم تسجنوا ليعرف الفرق بين اللي عايشه اللي ممكن يعيشه، ما اذا المسجونين ٥ نجوم وما عاجبهم السجن، حرام قال بدري ضاهر عنده معلومات وما عم يستمعوا له وفي عالم عليهم مسؤولية وبعدهم برات السجن، انا تفاجئت صراحة ما كنت عارفة، فكرت انه كل المتورطين بانفجار العصر تسلموا ووصل للعالم حقها.

ما بعرف هالتخدير كيف متسلل هلقد على حياتنا، لدرجة صارت عمليات الاغتيال الجماعية او الفردية، هيك كإنها وقفة مع الاعلان، قبل ما يرجع يكمل مسلسل تافه سخيف وطويل مليان بمشاهد درامية من جوع وفقر وذل والكل عم من ميلة عم يتماهى مع الابطال ومن ميلة تانية ما عارف حاله ليه عم يحضره.

على كل حال التراشق الاعلامي على اوجه بين الاعلاميين والسياسيين، والاعلاميين مع مؤساساتهم الاعلامية، والاعلاميين بين بعض، والسياسيين بين بعضهم، والمرشد الاعلى المحلي عم يتحضر ليطلع يحط النقط عالحروف.

ان شاء الله موت اذا عم كذب انه اكتر مشهد بلعي النفس الاخبار المتداولة حول تشكيل الحكومة الحريري بيخطب والقصر الجمهوري برد انه الكم عين بعد تتراشقوا بالحق ع مين؟ ما شايفين انه صرنا بقعر الانهيار؟ بعتقد اذا عملوا جائزة نوبل للوقاحة السياسيين اللبنانيين ما رح يخلوا محل لمرشح آخر واللجنة المقررة رح تلاقي صعوبة بالاختيار مين الاوقح بيناتهم خليني ساكتة