خليني ساكتة ٨٨ - عون حط الخطاب الفخري ونصرالله رسم خارطة الطريق.. لبنان بين الاب والمرشد والصهر المعجزة!

خليني ساكتة

تم النشر في 20 مارس 2021

مبروك يا سيد واخيرا نصر الهي جديد ولقب ممكن تزيده على القابك الحسنى سجلك التاريخ انك نلت رضى رئيس تيار الافقار والتعتير وصرت على قد طموحاته بتطوير ورقة التفاهم

اي ما تستهون فيها ابدا يعني هيدي الخطوة انك تطلع على قد تطلعات رئيس الما خلونا هيدا مش تفصيل هيدا بزيد على قيمتك كمرشد اعلى محلي ذو امتدادات اقليمية وبُعد دولي

اول شي بحب هنّي ثلاثية الاب والمرشد والصهر المعجزة على دورهم الريادي والقيادي بالحفاظ على دود القز وقصب السكر بلبنان.. الثلاثي المترفع عن الدنايا الزاهد بالدنيا والمتطلع الى الماوارئيات معتمدا على البصيرة.

اسبوع عابق بالاحداث التصاعدية، بدي بداية هادية بإطلالة الزاهد بالسطحيات يوم ١٤ آذار حامل هم العباد بلحية شايبة طل جي بي، بتحسه كان عباله الاصبع هو بس السيناريو مرسوم عالقد والخروج عن النص مكلف.. من بعدها اطلالة بي الكل صاحب الهيبة التي لا تقاوم دقيقتين ونص كانت كفيلة بإنها ترجع البلد لمحل ما كان: بلا كهربا، بلا مي، بلا انترنت، بلا طرقات وبلا زيت..

قري عناوين النشرة وعاجله تاني يوم المرشد الاعلى بالتفاصيل.

التفاصيل بتقول نحن كحزب الله ما خصنا ومنفتحين على كل الحلول والدولة لازم تتحمل مسؤلياتها ونحن ما منتدخل بس

١ - شكلوا الحكومة والا منغير الدستور

٢- بتفتحوا الطريق او نحن منفتحا

٣- الوجهة ايران والصين شاء من شاء وابى من ابى

٤- بدكم حكومة تكنوقراط جربوا بس رح نسقطها بالشارع

٥- رياض سلامة نزل الدولار وقد اعذر من انذر

٦- قائد الجيش اذا بتريد بكل محبة واحترام اعمل شغلك انت شغلتك تفتح الطرقات وتطفي دواليب محروقة مش تطلع تخطب الخطابات خليها لجبران باسيل المرحلة حساسة وكل كلمة محسوبة بمعركة الرئاسة

٧- نحن رح نشحدكم بس ما بقى بدي اسمع جعنا يا سيد

٨- وقفوا مزح عالسوشيل ميديا بموضوع الجوع والفقر

٩- كل شي عم تشوفوا عالارض مضخم تصديقه خدمة للعدو الاسرائيلي

١٠- اذا مش مصدقين الاميركان خربوا البلد امطروا داعش كمان راجعة

على كل حال بحاول الواحد يعني يكون شامل بالحلقات شوي بس ما بتعطوه فرصة، هلقد اهضم وارق وارقى شخصية بالبلد الشيخ سعد بتصير انه عبالك تفهم شو عم يعمل ماااااا بتزبط معك طب شو حاول يعمل بس استقال كمان مااااا بتزبط معك طب شو ممكن يعمل كمان ماااا رح تزبط معك هو هيك شي وجوده عابر للفهم، واللي بيعمله عصي اكتر عالفهم لما بتسمع بي الكل والصهر المعجزة عم يحكوا عن دوره بالتعطيل بتحس انه عنده وزن.

هلق خطاب رئيس الجمهورية هيك يعني خطاب فخري، اما خطاب المرشد الاعلى المحلي فهو الاساس برسم الخطوط العامة واللي اعطى رئيس حكومة التصريف الاعمال المهدد بالاعتكاف دفعة دكتور حسان اكبر انجازاتي وطالبه يلاقي مخرج قانوني ليرجع يتحمل المسؤولية هيدا كله من باب الحرص على البلد وعدم الوقوع بالمجهول.

على الهامش طلعوا المتظاهرين هني السبب بالانهيار العمودي للبلد وانهيار اقتصاده وتفقير الفقير وتعطيل الاشغال كل واحد فيكم بليز يلزم حده يضبب حاله يطبخ من الزيت اللي عم يرشح من الخطابات المعففة

الاجواء السياسية هديت جنبلاط مع التسوية ولو جي بي قطف الاشادة الوحيدة بخطاب السيد بس الكل قريه بتروي وتطلع بالنص المليان من الكباية خاصة بموضوع السلاح والحياد

والاهم انه الدولار قشطت من ١٦ الف ل ١١ وتنفس اللبناني الصعداء

والشعب تأمل انه جاية الحكومة لحد ما اجت حدًا وقال انها مرتبطة بكارتيل الصرافين.. وحدا تاني ربطها بالاجواء الايجابية العامة و نسي اللبناني انه الدولار ما نزل وانه كتير مرتبه طالما سعره الرسمي اصلا هو ١٥٠٠ ليرة غير انه هلق صارت البضاعة بالمحلات عال ١٦ الف لان التجار بس بغيروا الاسعار طلوع هني الوحيدين بالبلد ما عندهم arriere

ان شاء الله موت اذا عم كذب بس اكتشف الشيخ سعد سبب ارتفاع الليرة مش مهم نحن فهمانين عليه انه قصده الدولار بس اللي ما فهمته شو قصده بالافق، طالما بعدهم اللعيبة هني ذاتهم. للأمانة كل هيدا ما مهم ولا كل هالخطابات البديلة والاصيلة لان حل ما في وتكرار الكذبة مرة ورا مرة ما بيعمل منها حقيقة وانا خليني ساكتة