خليني ساكتة (٤١) - الحكيم: زيح تكتيك زيح استراتيجية... وخلص انحلت الشيخ بهاء عالطريق!

خليني ساكتة

تم النشر في 11 مايو 2020


اي اللي ما عجبه ينزل من الطيارة

طب هلق شو منعمل الرئيس من كم شهر قلنا اللي ما عجبه يفل من البلد وهلق الست الحلوة عم تقلنا اللي ما عجبه ينزل من الطيارة

طب اذا قررنا نفل من البلد لأنه مش عاجبنا ونزلنا من الطيارة لان مش عاجبتنا شو بدنا نعمل؟

طب انت يعني مش بزيادة انك لبناني وكمان بدك تتنمرد وتعبر عن شو عاجبك وشو مش عاجبك؟

انت كلبناني اكتر شي بتسكر تمك وبتقبل بالذل بأي زمان ومكان، اذا بعدك مفكر حالك انك ليفيل اعل من غيرك لأنك تتحدر من الفينيقيين قوم اوعى بقى وطلع حولك قبل ما ترفع حسك

قال طلعت الشركة وقالت هي ما خصها بمقاعد الطائرة الحق على وزارة الخارجية وبكرا بيطلع حوت السما الزرقا ومع فرقة الزقيفة يخبرنا عن تضحيته اتجاهنا بإنه قبل رغم الخسارة بحق التيكيت ٣ مرات زيادة بالدولار مع ان هو كان لازم ياخد شي ٨ مرات زيادة بسبب الخدمة غير المسبوقة والاخلاق الرفيعة اللي يتمتع فيها فريقه على متن الخطوط الجوية الوطنية

على كل حال اجراءات اعادة المغتربين ما فيها تكون احسن من هيك، لان لازم تكون على ستاندرد وطن النجوم، حيث دائما تغلب مصلحة كبار المتمولين والشركات على مصلحة الموطن، خدوا مثلا وزير التربية وتمسكه اللا متناهي بالعام الدراسي، هيدا نابع من شغلتين الأولى يعني هو لو تصرف متل نظراؤه بدول العالم وأعلن من الاول إلغاء الامتحانات الرسمية وحدد تاريخ انتهاء العام الدراسي انه كيف كنا رح نسمع فيه من بعدها؟

طلع ذكي قال لك كل يوم بغير رأي بصل اسمي بالتداول مش احسن ما صير كمالة عدد بهالحكومة؟ الإعلام ما يجيب سيرتي؟ ملعوبة معاليك امّا السبب التاني ما في الا انه هيدا pass لاصحاب المدارس لتبرير الاقساط، اكيد نحن لازم نبلع خبرية حرصك على الطلاب ومستقبلهم المشرق، اللي اذا سلمنا جدل وتعلموا وتخرجوا ما رح يلاقوا شغل واذا لقوا شغل بأحسن الحالات رح يقبضوا نص معاش واذا ساقبت نقشت مع مجموعة منهم وقبضوا معاشات كاملة رح يجي البنك بعد سنين ينصب عليهم مصرياتهم، لان الدولة رح تكون نصبت نصبة جديدة عالبنك

ما نحن بالبلد اصلا عايشين على قاعدة، انصب عليي لانصب عليك، منتعلم من سياسيينا؟ مش كلهم اكيد لان مثلا متل ما عندك المواطن المعار اللي بيشتغل شغلتين في الوزير المدعوم اللي ليحتفظ بمنصبين حكوميين بموافقة رئيسين متل وزيرة صورني انا ومش منتبهة.

بس المشهد مش كله قاتم كان هيدا الاسبوع، سجل لقاء بعبدا نقطة فارقة فيه، لسبب من الاسباب ما ارتقت لمصاف التاريخية، يمكن لان غاب عنه سليمان بيك، هيك تزعزعت اساساته، خاصة انه اعلن عدم الحضور من موقع المستقبل الاخباري، هيدا اللي بقي من الامبراطورية المستقبل، اللي بعدهم موظفينا عم يتظاهروا ويطالبوا بحقوقهم.

انا شخصيا بظن انه اعتكاف بيك المردة، مش مرتبط برقم السيارة المفرد، باعتقادي انه بعده مرتبط بالرقم المفرد تبع عدد الساعات السبعة اللي جمعت السيد حسن بباسيل من أشهر، واللي على ما يبدو بلش الجنرال يمرقها عالمكشوف. واصلين للجنرال والصهر المعجزة، بس قبل هيك لا بد من الوقوف عند اطلالة الحكيم المدوية من قصر الشعب اللي سرقت الاضواء من زيارة بيك المختارة على بعبدا

هيدا اللي هلق سمعناه بعتقد انه موقف استراتيجي، عم يفكر الحكيم بأهمية القصر وموقعه، يعني بلكي دارت الايام وصار هو من سكانه، قبل ما يطلق مجموعة من المواقف التكتيكية هلق بال ١٨ دقيقة اللي طل فيهم الحكيم اطلق مجموعة من المواقف، بتذكر بحضور القوات اللي امن النصاب لجلسة الحكومة بمجلس النواب، يعني قال انه هو مع الحكومة بشرط ومع الحريري وكلن ومع قصر الشعب بس ضد العهد ومع جنبلاط الا انه، ما بده يحرج حدا من القصر بس ضد الكهربا، بيلتقي مع حزب الله بس ضد المعابر الشرعية... يعني كيف بدي قلكم لعبها زيح تكتيك زيح استراتيجية

بس الحكومة على الخطى الصحيحة، ولابد من انها تكسب ثقة الحكيم بيوم من الايام، هو اللي ناقش لساعات بالتكتل قبل ما يقرر يحضر بدل النائب جورج عدوان، طب لو طلع مثلا عدوان واعطى الموقف شو كان تحديدا رح يتغير؟

ما بعرف يمكن مثلا كان يمكن تأثر سعر الدولار، اللي تهديد الاطاحة بالحاكم ما أثر فيه، وسجن نقيب الصرافين ما حركه الا طلوع، على سيرة نقيب الصرافين نحن عارفين انكم بدكم scapegoat بس كان املنا لما ما زبط الحاكم تطلعوا طلوع بالاسماء مش تنزلوا نزول، هلق اذا رجعوا قرروا يحموه للنقيب واضطريتوا تفرجوا عنه مين بتوقفه محللين الاقتصاد؟

على الهامش بظن قربت تنحل، قال بهاء الحريري مطروح بجدية، ووئام وهاب عم بقلنا انه عنده علاقات دولية مخيفة، انا بقول ليه لا لازم نجرب التالتة ثابتة، جربنا الحريري الاب، والحريري الابن وهلق منجرب الحريري الابن الاكبر، معنا وقت شو عنا؟ لنكون مثلا خايفين ع مستقبل اولادنا؟ او حاسين رح نموت من الجوع؟ او اننا ببلد مأفلس؟ شيخ بهاء راح اعطيك اياها من الاخر بلا هالبيانات والآرمة اللي براسه وبلا حبر وشعر وسطور وسجع وصرف سمعت عندك كلمة متلفزة ما تعذب حالك ونحو كلمتين ما الهم تالت fresh money وخذ ما يدهش العالم... طعمي التم بتستحي العين، رح تكون شوي مكلفة هالمرة لأن الكل على الارض يا حكم، واللي نهبوا الاموال قاطعين ايدهم وشاحدين عليها.. بس عم يقول السيد وئام انك فعال لدرجة انه عودتك رح تبث الروح بمعادلة س -س انا بظن انه ام بي اس وقف نيوم وvision 2030 وقرر بس يرك على رجعتك عالبلد

المهم ما خلص الاسبوع بلا حدث تاريخي، الرئيس عون اجتمع بممثلين عن الصليب الاحمر الدولي من دون ما يجيب سيرة جبران باسيل وانجازاته. في عالم فسروها على انها قد تكون سقطت سهوا بس انا شخصيا بقول انها دليل على موضوعية الجنرال بالحكم على الانجازات وحرصه على وضع الشخص المناسب بالمكان المناسب. ان شاء الله موت اذا عم كذب، بس بتحس هالصهر قاعد متل الاخطبوط، كل شي بحب شو ما بحب اي وزارة اي منصب اي كرسي بس نقي واختار. والله مكملها معه، كمان السيد راضي عليه.

هلق باطلالاته الاسبوعية بيطلع السيد بوزع ادوار مين يحضر ومين ما يحضر انت دعام الحكومة، انت احضار لقاء بعبدا، انت التزم بالحجر، انت دير بالك ع كورونا، انت ابروم وجهك عالحيط، انت بالزاوية، هلق المهم انه بعده راضي على الصندوق الدولي، وبكل تواضع اعطى الضو الاخضر لنقبل الدين من البنك الدولي بس ممنوع يحط شروط، يعني ليك يا صندوق النقد بتحب تعطي المصريات على بياض من دون شروط اهلا وسهلا مناخدهم، ما بتحب ستين سنة والف عام، مناخدهم من احتياطي مصرف لبنان مناخدهم من ليرتنا اللي بألف خير.

للاسف يبدو انه قرار اعادة فتح البلد متل كل القرارات التانية شفنا دول العالم عم تعمل هيك قلنا ونحن كمان نسينا بعد مرة اننا شوي كتير بعاد عن دول العالم

ما بعرف شو بعد بده يصير لتعرفه انه ما بقى حدا بالعالم قاريكم انتو خليكم بأوهاوكم انا خليني ساكتة