ما تحرق نَفَسَك! خود نفس مع لارا (٦)

خود نفس مع لارا

تم النشر في 11 يونيو 2020

بحلقة اليوم من 120 درجة.. "من 20 سنة"

مرحبا، انا لارا طوق سليمان 180 ثانية، بلشنا

سنة 2000 كلية الفنون، قسم المسرح، الجامعة اللبنانية، كان عنا استاذ غِنى وإلقاء مسرحي وكان عم يشرحلنا درس عن النفس والاقتصاد باستهلاك النفس بمونولوغ مسرحي، وعم يفسرلنا ليش لازم ما نروِّح كل نفسنا على مشهد بسيط وعطانا متل، قال "تخيلوا انكن آخدين شاحنة على البقاع تتشتروا جوز كلسات".

2020.. عالهوا باستديو صوت الغد لقيت حال عم بستعمل نفس التشبيه بحديث ما صار، بعد 20 سنة! عظيم، والمعنى.. المعنى انو الحياة رح تقطعلك نَفَسَك بطلعاتا ونزلاتا وما تخاف حصتك من النزلات محفوظة، اذا مش اليوم بكرا، فا ما تحرق نَفَسَك اليوم ع شي واصل بكرا، ما تحرق نَفَسَك اليوم ع شي ما بيستاهل نَفَسَك.. بتعرف، مشاكل الشغل بتصغر قدام حادث سيارة، وحادث سيارة بيصغر قدام خسارة صديق، وخسارة صديق بتصغر قدام مرض ولد من ولادك، وغسيل الكلاوي بيصغر قدام السرطان، والسرطان بيصغر قدام الموت.

فكِّر بالشي اليوم اكبر من حجمه، تنفس صح وبالمطرح الصح.. في نَفَس اخدتو ع خشبة مسرح من 20 سنة حسيتن من كم يوم.

الـ180 ثانية لليوم خلصوا بس الـ180 درجة هلق بلشوا.. تنفس صح، حِبّ الحياة.. لأنك قدا


لمتابعة لارا على قناتها على يوتيوب الضغط على الرابط

https://www.youtube.com/channel/UC3S_qRJVmseyz_0aKYwsbrQ