خليني ساكتة (٤٣) - دبكت بالحلف "الاصفر الليموني".. وانجازات الحكومة رح تتكلل بالضخّ!

خليني ساكتة

تم النشر في 24 مايو 2020


قولكم دبكت بين الشباب؟ او زوبعة بفنجان؟؟؟

انا بقول الامور نسبية، يعني بالنسبة لنمور التيار انه هني عم يعلموا الحدود اللي ما حدا فيه يتخطاها

وبالنسبة لقيادة الحزب، ما في شي بيستحق التعليق، هون بيجي دور المصادر وسرايا y الميديا المقاومة هيدي اللي هيكك بتفوت بالعمليات الموضوعية اللي ما بدها كتير جهد

بس للصراحة نمر جزين ما قصر، انا شخصيا ما بقبلها على السيد، يعني هو بحط وقت وجهد وتضحيات لحمايتنا من داعش ومن الفاسدين وبقوم بواجبات الدولة بكاملها وبيطلع نمر جزين يقول هيك؟

هلق معذور النمر انه قال اللي قاله لان مقابلته اجت قبل خطاب السيد هيدا الاسبوع اللي اعلن فيه افشال المخطط الاميركي الصهيوني بكل المنطقة، لان لو كان سمع كيف تم انقاذ الكل من المؤامرة وخلصت كان اكيد غير رأيه لان بهيدي الدول كلها العالم عايشة بحبوحة غير عادية، هلق ما بعرف لو نجح المخطط كيف كان رح يكون شكل المنطقة اذا ربحنا وهيك

وكمان يعني وصلت بالشباب انه عم يستهتروا بهيبة الحزب لدرجة الاستهزاء؟

هلق ما تقولوا اني شمتانة او عم فسد بس لفت لي نظري دخول مصطلحات معابر غير شرعية، وتهريب، واستراتيجية دفاعية على التعابير وتفسير لمعاني الحلف الاستراتيجي ومين عايز التاني اكتر؟؟ شو القصة يا خيي؟ معقول مثلا السيد غير رأيه عن شو تم الاتفاق عليه بالساعات السبعة الشهيرة؟

لننطر ونشوف انا بقول اذا ما تدخلوا العقلاء من الطرفين رح نشوف مشاهد غير مسبوقة بالحلف الاصفر الليموني، هلق حلفاء الامس تبع الجنرال عون يعني قبل ورقة التفاهم، كانوا ناطرين هيدي النتيجة من تاني يوم التفاهم بس يبدو تأخرت شي ١٣ سنة

انا بقول انه الحزب اصلا ما بفرطوا بالتفاهم وخصوصي بيعرفوا الوزن التاريخي تبع وزير الخارجية السابق عند الاميركان وانه هو من الاصل مشكل الحصن المنيع تبعهم بوجه ادارة ترامب وكان بده يمنع العقوبات بس هني ما خلوه

صراحة ما لحقنا عليكم هالاسبوع هيك كان عابق بالوجوه النيرة، يعني بس نقصنا اطلالة الرئيس البهية لتكمل معنا، بعتقد ما كان عنده شي يقوله لان الرئيس بالوكالة كان مفتتح الاسبوع يوم الاحد ومغرقنا انجازات من فج وغميق، خلينا بالمهم الرئيس بري طل علينا، والكل بيعرف انه اطلالاته عزيزة متل البدر، طلع حط النقط عالحروف، الحل بقانون انتخابي خارج القيد الطائفي ولبنان دايرة وحدة على قاعدة النسبية، سهلة هينة فجة وواقعية، يعني استنتج الاستاذ انه الحل هو ذاته اللي اقترحه من شي ٣٥ سنة. جوهر كلمة الرئيس بري مش بالتحذير من المس بالودائع متل ما فكروا معظم وسائل الاعلام الجوهر هو برفض الفيدرالية، واهمية وحدتنا، طب اذا بدي سلم جدل واوقف ضد الفيدرالية، كيف بدها تزبط معي بس شوف يعني هيك في دولة اوليري موجودة ومشية امورها ودايرة البلد بامه وبيه ومعابره ومطاره وطريق مطاره، يعني حلال الهم حرام النا؟ بس اطلالتك على الشاشة غالية م رح نزعلك قوتنا بوحدتنا وراجع راجع يتعمر راجع لبنان والاوف والعتابا والكورن فليكس والرز بحليب

يطول بعمرك دولتك ع كل حال وشكرا للباس على سورية كمان كان ضروري خاصة انه من زمان وجاي هيك ما دغدغت له مشاعره للنظام بكلمتين حلوين، بس اصلا لشو ما هو السيد مكفى وموفى والله ما مقصر مع حدا بالمنطقة لا سورية لا ايران لا العراق، حتى مع اللبنانيين صاير عم يجيب سيرتهم بكل خطاب، هيك بخصص لهم آخر كم دقيقة لتصويب البوصلة، هيدي غير وضع القطار عالسكة، لان القطار والسكة اختصاص حسان دياب، اااااه شو فكرتوني نسيت شريط الانجازات والحلقة رح تخلص بلا ما احكي عنه، لا لا ما بنسى شي، بس بليز ابقوا للآخر لان في مفاجأة آخر الحلقة عن يوم الاربعا

المهم الدكتور حسان الحمدالله، اطلق طلب قدم مشروع قانون وغيره من الامور اللي ما بعرف تحت اي خانة بتندرج، ممكن مثلا تكون واجبات الحكومة خطة الحكومة عمل الحكومة بس انجازات الحكومة ما بعرف هيك مش حاستها راكبة، يعني بعد الخطاب حسيت انه الانجازات لا تعدى ولا تحصى ولا حتى ترى عالقليلة لا ترى بالعين المجردة، يمكن بدها توولز خاصة بس هو الرئيس دياب بيملكهم ممكن جبران باسيل كمان يكون عنده اياهم لان هيك بتحسهم على نفس الوزن من الوقاحة الانجازات من الطرفين قصدي هيك انجازات كتير كتير وقحة واوقح من اللي بده يصير يوم الاربعا.

هلق اللي ما مصدقني في يشوف تعابير وجوه الوزراء يعني ما بحاجة الواحد يشرح، وقال دول العالم حاسدتنا على طريقة تعاملنا مع كورونا، بس شو صار انه عشية الـ ١٠٠ يوم صارت الحالات عم تضرب الـ١٠٠ كل يوم؟ وما في حكي لا عن تعبئة عامة ولا خاصة ولا ما بين التعبئتين؟ والسؤال دولتك لما بتحكي ليه بتوقف بتاخد نفس ع كل جملة كإنك ناطر حدا يرد عليك؟ بحسك الواحد انك ببرنامج صار الوقت وناطر مدير المسرح يعطي اشارة للزقيفة؟ بعدين انت اللي كاتب الخطاب او حدا من عندك؟

اول شي انا بنصحك تغير فريقك الاعلامي مش قطع برزقة حدا لا سمح الله، بس الفيديو مع كل هالانجازات اللي بقلبه والموسيقى المرافقة حرام ما يدخلها كم لقطة سلو موشين لالك مثلا عم بتشم الورد بجنينة السرايا هيك اضفاء جو درامي؟؟ يعني دولتك للصراحة لا الفيديو راكب ولا الخطاب راكب، هو عادة اذا بمقدمة الخطاب السفينة عم تغرق بصلب الخطاب لازم تعالج السفينة وبآخره تنقذها هيك علمونا من ايام المدرسة ودروس الانشا وديسيرتاسيون انت دولتك طلع معك السفينة عم تغرق باول الخطاب بنصه صلحتtim السكة وحطيت القطار عليها وبآخره طلعت لبنان من النفق هرولة، هول ٣ وسائل نقل مختلفة، واذا السفينة تبع اول الخطاب غرقت كل شي تاني ما بقى اله قيمة دولتك، يعني تحديدا بصير السيناريو اللي نشرته بالانكليزي بواشنطن بوست انه اللبنانيين ما رح يلاقوا رغيف الخبز

ان شاء الله موت اذا عم كذب بس بعد خطاب حسان دياب كان بدي استغني عن الحلقة حط بس المقطع تبع السلطة والدولة والواقع وقول بالاخر خليني ساكتة، طلع الزلمة مقهور اكتر مني عتبان اكتر مني ومظلوم اكتر مني انا كمواطن يعني.. خلص ما بقى رح طول عليكم ونطركم اكتر بليز ركزوا معي منيح مفاجأتي الكم انه الغيمة السودا بلشت تزيح عن لبنان، وهيدا الشي ببلش ابتداء من يوم الاربعا ٢٧ ايار مع رياض سلامة اللي قرر يباشر باجراءات حماية الليرة، وقرر يضخ دولار بالسوق، هلق ما بعرف مين وين بدون يضخوا دولارات وهو البلد في دولارات قد ما في مي بسد المسيلحة، يعني انتظروا يوم ٢٧ ايار المقبل رح يصير يوم تاريخي جديد بلبنان وبانجازات الحكومة... ومن هلق ليبلش الحاكم بأمر الليرة يضخ انا خليني ساكتة