خليني ساكتة ٤٨- اذا السفيرة سكتت من وين بده يعرف السيد اخبار؟... ووزير الداخلية مش قاتل الا ٢!

خليني ساكتة

تم النشر في 28 يونيو 2020



طلتكم علينا بتسوى الدنيا متل الثري ماسكيتيرز، دغري حسنيا بالامان، الامان الاقتصادي مشي بعروقنا لمجرد رؤيتكم حد بعض.

يعني شو بدي قل لكم اذا انتو مطمنين وهيك وجوهكم منشرحة، كيف ممكن تطلوا علينا لو لا سمح الله بدكم تعلنوا الانهيار التام؟

يمكن صار الوقت انه نحن الشعب نصارحكم انه نحن عارفين اننا منهارين خالصين، نسهل عليكم نريحكم نفسياً، انه ما تضطروا كل ترسموا الابتسامة كم يوم تطلعوا تطمننونا انه عم تعملوا جهدكم؟

بعدين سعادة اللواء توقيف ١٥٠ واحد ما رح يكفوا.. بدك توقف شي ٣ ملايين لبناني على القليلة ليمشي الحال.

بس الحق مش على حدا بالبلد، الحق على الاميركان مش عم يقبلوا يشحنوا دولار… آآآآه السفيرة الاميركية نفيت الموضوع وقالت انه الحق على الفساد؟

قلت لكم قبل هيدا مروان بده يورطني، يا مروان ما فينا نستشهد بحكي السفيرة الاميركية بخليني ساكتة.

عن جد كبيرة المزحة هاي، يعني كيف بدي قل لكم جرصتونا قدام الاجانب.. هلق القصة وين؟ مش إذا الحكومة اعتذرت او لا، او اعتذرت ورجعت ندمت بعد ما اثنى الحزب على موقف القاضي، القصة بإنه يا ريت حدا ينبهوا للقاضي، انه مش منيح نمنع السفراء يصرحوا للاعلام وخصوصي الاميركان، مش بس كرمال حرية التعبير، لان مثلا اذا تم تهريب عميل تاني، كيف بده يعرف السيد؟

على كل حال، على ما يبدو الاميركان عم يزيد حرجهم بالمنطقة، انه الدولار الاميركي بإيران وصل ل ٢٠٠ الف ريال ايران، وبسوريا ل 4000 ، وبلبنان لمحنا ال ٨٠٠٠ ليرة… يعني نحن ومنتصرين ع ترامب وهيك وضعنا قدام الاميركي المهزوم يا خوفي ما يجي يوم ويربح علينا… بس مشي الحال حرقنا العلم الاميركي، قولكم انه الشباب اللي حرقوا العلم بيعرفوا انه العلم هو لدولة بينجامين فرانكلين اللي عم يوقفوا بالطوابير ساعات لحد ما يحصلوا على ورقة الـ ١٠٠ دولار اللي بتحمل صورته… بقل لكم شي لما يروح تعبكم عالفاضي ليه ما بتاخدوا شقفة من العلم المحروق وبتدفعوها سندات بالقرض الحسن؟ او هيدي ما بتنصرف عندهم؟

وشو قصة الطوابير على الافران؟ كإنه الكرامة حاف طلعت ما بتشبع؟ آه نسينا اللي بيوقفوا بالطوابير عند الصرافين وعند الافران غير اللي بيحرقوا العلم، الفئة الاولى اذا وقفت حد براداتها بكون هيك شكلها… اما الفئة التانية فبكون هيك شكلها…

على الهامش، عقد لقاء بعبدا. خلص خلص الخبر. شو تفاجأتوا انه كل خبر بياخد على قد حجمه، يمكن بقدر قطع تعليق واحد بس، بارك لتيمور بيك مشاركته الاولى بلقاء رسمي من دون بايبي سيتير.

وليد بيك تغيب لاسباب صحية، مش لإن بده يخلي اجر بالبور واجر بالفلاحة لا لا، كان عم يسترجع قواه، لينزل يحذر من الايام السودا القاتمة اللي واصلة على الجبل وبتطلب اكتفاء ذاتي.

من شو خيفان يا بيك، مش عم تسمع الشباب العونيين؟ البلد عم يرخص ما عم يغلى… معك حق ارخص من هيك ما بقى ممكن يصير.. رخص كل شي بالبلد وارخص شي صار فيه الانسان.. بس خلص عم نتعلم نعيش على قدنا شوف كيف عم نبادل تيابنا عالاكل، والاغراض ببيوتنا على الحليب والحفاضات

بس الحكومة عم تفلح فلاحة، صحيح قال د. حسان اكبر انجازاتي انه ما حدا بيسمع كلمتهم، بس مثلا وزير التربية سجل اعلى صوت هيدا الاسبوع، لانه بده يعين زوجته الدكتورة مديرة ورئيس الجامعة ما قبل.. يا ريت سمعنا هالصوت بأقساط المدارس…

وزيرة صورني انا ومش منتبهة، انتبهت لوجع الناس بعد ما تجولت بين عامة الشعب، وقدمت اقتراح يجب البدء بدراسته، هو اعتماد طحين البطاطا لفوائدة الغذائية.. شفته انها بتستاهل وظيفتين حكوميتين؟

وزير الداخلية مشغول بأمنا كتير كتير فنسي حتى انه يعتذر او يطلع اي بيان عن اعتداءات مكافحة الشغب والطريقة الحضارية اللي تعدوا فيها على العالم… بس للأمانة ما نسي يعتذر عن تاريخه… هيدا اعتراف معاليك كان لازم تحطوا قدامنا كشعب تسألنا اذا منسامحك قبل ما تقبل الوزارة، او يا ريتك اعتذرت عن المشاركة بالحكومة من الاول وخليت انت وسيدنا علاقتكم شخصية،.. يمكن كان فيها اكتر عبرة واحترام النا كشعب، يا حرام علينا كنا مفكرين انه تم مكافأة زعما الحرب لمرة واحدة فقط بتعيينهم رؤوساء وزعماء أبديين علينا بعد العفو، طلع انهم بعدهم لهلق عم يكافؤا جنودهم

ان شاء الله موت اذا عم كذب، بس نحن الشعب منستاهل اكتر من هيك بكتير، والخير لقدام، لا المنصة ولا الخطط رح تنقذنا، والحقيقة الكل ناطرنا نجوع، والزعماء بدهم يجوعونا ليشحدونا الاعاشة ويرسخوا زعامتهم على ضهرنا، وبعض الثوار ناطرينا نجوع لنوعى ونزل عالطرقات، وعلى ما يبدو المازوت رح ينقطع، الخبر رح ينقطع، اللحمة رح تنقطع، المواد الغذائية رح تنقط

رح ينقطع النفس الباقي بهاليومين

وانا خليني ساكتة