خليني ساكتة ٥٥ - بتعرفوا اي سفارة دفعت حق منقوشة الثوار.. بس٢٧٥٠ طن من نيترات الامونيوم ما معكم خبرها

خليني ساكتة

تم النشر في 9 أغسطس 2020





تحاربتوا ١٥ سنة قتلتوا منا ١٥٠ الف وروحتوا مئات الالوف من الجرحى والمعوقين و٢٠ الف مفقود لليوم ما منعرف مصيرهم

ب ٢٦ آب ١٩٩١ منحتوا حالكم عفو عام عن كل الجرائم اللي ارتكبوتها

وب ٤ اب ٢٠٢٠ قتلتوا عالقليلة ١٥٨ واحد وجرحتوا اكتر من ٦ الالاف ولهلق في حوالي ٢١ مفقود بعد ما بينوا

يعني تحديدا من يعني تحديدا من ٢٩ سنة الا كم يوم من بعد العفو اللي منحتوه لحالكم غسلتوا اديكم من دمنا، غيرتوا تياب العسكر والميليشيات، لبستوا كرافاتات وكافأتوا حالكم بكراسي ثبتوها على اساسات المقابر الجماعية واضرحة أهلنا

نحن البلد الوحيد بالعالم خلص حرب من ٣٠ سنة بلا محاسبة او مصالحة، اول بلد بالعالم بيعمل الصلحة بين ارباب الحرب وبيستبعد اهل القتيل

وبعدنا لحد من كم شهر كل ما يسقط قتيل بتتراشقوا بدماته وبعد كم يوم بتعملوا صلحة من دون حضور اهله لإنكم انتو اولياء امرنا وهيدا الشاب او الصبية بتعتبروها شهيدة فدية البلد وعلى اهلهم او يسامحوا لدرء الفتنة

انتو لما سامحتوا حالكم من قتلنا عالهوية ومن خطف عمرنا ومن قصف بيوتنا وتدمير بلدنا، قلتوا اذا حدا منكم بيرتكب اي جريمة من بعد تاريخ العفو يحاكم عن كل ما سبق وارتكبه من الـ١٩٧٥

وانا اليوم عم قل لكم انتو من كم يوم ارتكبوا جريمة حرب، ارتكبوا مجزرة، وعليه نحن كشعب رح نطالب بمحاكمتكم عن كل جرائمكم السابقة من ١٩٧٥لحد هلق مرورا بالقتلى اللي سقطت بالمفرق خلال هالسنين

مئات الالوف من العالم عضة عالجرح سنة بعد سنة، وبقيتوا حاكمينا بتهديد مبطن من شبح الحرب، عيشتونا على قاعدة يا رب السترة، ربينا متقبلين كل الشي المهم ما ترجع هيديك الايام، واذ فيكم بتقرروا تغتالونا بزمن السلم، على غفلة من القدر، كل واحد من اللي بقي على قيد الحياة بقي عايش بالصدفة

واللي ماتوا هول شهدائنا النا، وما حدا منكم يطلع ويقول انهم شهدا، انتو ما بحق الكم توصفوهم بالشهدا، نحن اهلهم ونحن اللي كنا رح نكون محلهم نحن بس بحق لنا نقول انهم شهدا، لان هني ما اختاروا يموتوا ولا اختاروا طريق الشهادة ولا تطوعوا بقتال، هول شهدائنا لانهم صورة عنا نحن

اللي سقطوا مش ارقام، ولا رح نسمح انهم يكونوا ارقام متل ما اعتبرتوا اهلنا ارقام بحروبكم، ونحن ما رح نسكت عن حقهم

رح نطالب بحقوقهم وين ما كان، رح نصرخ اسمائهم بالمحافل الدولية، لإن ما منوثق فيكم ولا بحكمكم ولا بحكمتكم

سرقتونا ونهبتونا وقتلتونا بمية نوع سرطان ونوع من ورا اهمالكم وفسادكم وهلق جيتوا تقتلونا بالكيماوي

قصفتونا قنبلة ذرية، وطلعتوا عالتلفزيونات تمشوا بجنازتنا، الرئيس احتفل بعودة مساعدات المجتمع الدولي، ووليد بك طلع يقول انه ماكرون لا يثق بالطبقة الحاكمة على اساس هو من طبقة الاوزون ما خصه ابدا، والحكيم جعجع نطر العالم مشغولة بالتظاهرة لتطالب بالحساب وتسلل عالاشرفية بين مناصرينه ليبين انه مقبول من الشارع، لانه لو نزل بأي وقت تاني كان بالحد الادنى رح يلاقوه متل ما استقبلوا وزيرة العدل ووزير التربية، والاستاذ نبيه رثانا بقصيدة، والشيخ سعد خبرنا انهم اغتالوا بيروت بالوقت اللي هو قعد رئيس حكومة بالقليلة ٣ سنين بالوقت اللي نيترات الامونيوم كانوا قاعدين بالمرفأ، والسيد حسن طلع مش عارف ولا حتى حافظ رقم العنبر اللي كان محي نص لبنان، انت بالذات يا سيد ان كنت تدري فهي مصيبة وان كنت لا تدري فالمصيبة اكبر، ما على اساس حامل سلاحك وماسك الدنيا كلها وبتعرف البيضا مين باضها بالبلد، ومنقوشة الثوار اي سفارة دفعت حقها، طلع ما معك خبر بالامونيوم بالمرفأ؟ ٢٧٥٠ طن من النيترات ما كانت بتستاهل ٧ ايار او حزيران او تموز او تشرين او كانون؟ والقوى الامنية من الجيش للامن العام لامن الدولة للمخابرات للقوى الضاربة ما معها خبر، شو تحديدا مهام كل هالحجافل من الامن والامن والامن والقوى الامنية ودفعات المتخرجين والخريجين والعديد والاعداد؟ هول كلهم مسؤولين عن حمايتكم انتو؟ من التغريدات ومن المسبات ومن التظاهرات؟ ما فكرتوا تفصلولنا شي فصيل لالنا يحمينا النا؟ يكتشف اننا عايشين على قنبلة نووية موقوتة؟

عندي سؤال واحد قبل ما اختم هيدا لقوى الامن والجيش اللي عم تواجه المتظاهرين، شو عم تحسوا؟ كيف بترجعوا على بيوتكم شو بتقولوا لاولادكم ونسوانكم؟ عن مين دافعتوا؟ عن اللي سارق لكم مالكم وتعبكم؟ عن اللي رفع الدولار لدرجة صار معاشكم ما بكفي حق خبز لاولادكم؟ او عن اللي دمر عاصمتكم وبيوتكم وما رح يكون معكم مصاري تصلحوا متلكم متلنا؟ او يمكن عن اللي سبب بقتل واحد من اخواتكم او اصحابكم او جرح اولادكم واهلكم اللي كانوا قاعدين ببيوتهم

التوقيفات اللي صارت مش كافية، ولا رح تروينا، ما رح يروينا الا الرووس الكبيرة، ما رح نقبل غير ما نشوفكم كلكم برا، نحن العالم العادية العالم المتضررة العالم اللي عم تحمل المكنسة وتكنس اجرامكم

انتو غير مؤتمنين علينا، نحن ما منوثق فيكم، واحد بعيش مع قاتله بنفس الغرفة؟ انتو قتلة وارهابيين ونحن منخاف نعيش معكم لان ما في مين يحمينا منكم من هلق لتنتبهوا انه ما بقى في محل الكم بهيدا البلد واننا رح نلاقي طريقة نحاكمكم ونحمي حالنا منكم... خليني ساكتة