خليني ساكتة (٧٢) - بعد "مجسم الحقيقة".. تمثال لجبران باسيل على بوابة فاطمة؟!

خليني ساكتة

تم النشر في 29 نوفمبر 2020


بي الكل ضميره مرتاح

الرئيس بري ضميره مرتاح

السيد حسن ضميره مرتاح

الحكيم والبيك والشيخ والصهر المعجزة وعموم الوزراء والنواب والزعماء ضميرهم مرتاح

حتى حرس المجلس ضميرهم مرتاح

الوحيد اللي عم يعزبه ضميره هو انا

الايام عم تركض ركض وفجأة بلاقي لازم اكتب حلقة جديدة.. ولان الكل هالاسبوع ضميره مرتاح، عزبني ضميري

يعني كلن يعني كلن اقره توصية بالتدقيق الجنائي، فمن الطبيعي ضميري انا يأنبني انه معقول اطلع ونق بالوقت اللي الكل عمل واجباته باقرار توصية بالاجماع

يعني معقول مثلا اطلع اطرح اسئلة من عيار شو يعني توصية؟ وين تحديدا بتنصرف هاي؟ شو بتقدم او تأخر؟ كيف حرامي وفاسد ومجرم هو رح يدير التحقيق الجنائي بعمليات النصب اللي ارتكبها وعمليات النهب اللي مارسها؟

هلق رح نشوفهم وزير وزير وزعيم زعيم حامل ضميره على كفه ورايح عم يعمل جردة بعمليات السرقة والنهب والاستزلام اللي ارتكبها هو وجماعته

ابر مورفين للعموم، تدقيق جنائي، دولار طلع دولار نزل، شكل لم يشكل شكل والتشكيل

انطروا بايدن، لا انتقدوا التطبيع، بلاد العالم عم تنبذنا مش مهم يسوانا ما يسوى جبران هو ما حدا بيستقبله ونحن كمان..

يعني ضميري انا كيف بده يسمح اني شكك بنوايا التيار الوطني الحر والعهد القوي بعد هالمجسم اللي نصبوه بساحة ٧ آب؟ تبجيلا لنقطة من نقاط المبادرة الفرنسية؟ معقول مثلا يطلع ماكرون اللي بده يعمل مؤتمر مساعدات للبنان ويسأل التيار ليه ما حطوا تكلفة هالمجسم لمساعدة الاسر الفقيرة؟ لا ما بظن يكون ماكرون بلا ضمير ويسأل اسئلة من نوع شو هالشعبوية السخيفة بوقت العالم ميتة جوع

انتبهوا اخر مرة انرفع شعار الحقيقة وقت اغتيل رفيق الحريري لا وحطوا عداد... وقام بس بينت الحقيقة انرفعت اسماء المتهمين يافطات واسماء شوارع

بعدين مين هالفنان ورا المجسم، عجبني اول شي انه اللي حامل ميزان العدالة امرأة فستانها حلو مرتب معبر هيك تفاصيله خرج التدقيق الجنائي بتتماشى مع سيف الحق اللي حاملته بايد وميزان العدالة يإيد تانية، ولفتتني علامة الدولار ببلورة القبان ليش مثلا مش ليرة لبنانية او مش سيكسي كفاية العملة المحلية، بس ليه مغمضين لها عيونها؟ مش من المفترض هي عم تبرم عالحقيقة؟ او خايفين قوة الكهربا اللي مشعشعة ٢٤/٢٤ تأثر ع نظرها؟

انا بقول لازم تبلشوا تفكروا بتمثال لـ جي بي ترفعوه بعوكر بطلعة السفارة الاميركية او ع بوابة فاطمة مع شعار ما خلونا هيك حصرم بعين الكل

على الهامش ما بعرف اذا حدا انتبه بس بلش البحث بقانون انتخابي جديد، من بعد ما الكل ارتاح ضميره وعمل واجباته اتجاه التدقيق الجنائي.. الهيئة بدهم يعطونا انتخابات نيابية مبكرة ما نحن الشعب طلباتنا اوامر.

هلق العونية والقوات انتبهوا للعبة التكتل القوية والجمهورية القوية ما حدا بياكل لهم راسهم دغري انتبهوا انه حقوق المسيحيين بخطر فهبوا للوقوف بوجه التوقيت المشبوه.. كل شي عم بصير تاني مش خطر كفاية بس الغاء الطائفية باطل في تعددية القطيع لا بد من حمايتها.. خدوا نفس ما تخافوا ما حدا رح يعمل شي، بكرا بتطلعوا توصية جديدة على عيار توصية التدقيق، ما التانيين مستمدين زعامتهم من نفس المكان تبعكم بس باختلاف التسمية او نسيتوا انه كل زعيم ع طايفته صياح؟

الاسبوع الجاية مفعم بالانجازات الاستباقية مؤتمر حنفية جديدة للنهب، اجتماع لرفع الدعم

وعودة للمدارس، انه مبارح شب بجبيل عمره ٣٥ هو بالمستشفى لان المستشفى ما معها حق الدوا المفقود اصلا من قبل المحتكرين بس وزير الادمغة المهاجرة مش هاين عليه بده يبعت الاولاد عالمدارس ما من هلق ليتخرجوا رح يكون اللبناني بطل في يهاجر من الصالون عالمطبخ

انا ضميري بقل لي لازم كون مع الاو تي في نقنا كلبنانيين صاير بلعي النفس كل الوقت بدنا كهربا ومن سنة بلشنا نطالب بمصرياتنا اللي انسرقت ومنطالب بعدم التهريب وانه ما نموت بالسلاح المتفلت ولا باهمال طبي، لا وبكل وقاحة مبارح بس غرقنا بالمي والمجارير ما خلينا كلمة ما نقيناها افتراضيا.. وين ضميرنا كشعب هالطبقة الحاكمة شو بدها تحمل لتحمل، انه الدنيا شتت فجأة بآخر تشرين التاني شو منتظرين منها خصوصي انه الدنيا مليانة كورونا

شكلنا نحن الشعب مفكرين انه الدولة هي حزب الله، انه قادرة تأمن لنا دولار

ومساعدات وقروض وحماية وتلحق كمان على كل القضايا الخارجية تستنكر الاغتيالات الجبانة وتعطي رأيها بالاتفاقات الجبانة .. وناسيين انه نحن عايشين بالجزء التاني من البلد.. عم نتحول غزة الشرق الاوسط وما همنا المهم الكرامة والعنفوان

ان شاء الله موت اذا عم كذب بس في بعض اللبنانيين بعدهم بخافوا يطالبوا بالتقسيم قال بيختل النسيج اللبناني ومش منتبهين انهم واصلين على محل رح يطلبوا لجوء سياسي على زواريب الاحزاب الضيقة مش بس حزب الله...

وبكون بلا ضمير اذا بقول انه المستفيدين من هيدي تقديمات الحزب هني الشيعة لا ابدا المستفيدين هني حصرا مناصري الحزب ظالما او مظلوما من ابناء الطائفة يليهم مناصري الحركة فحلفاء الثنائي وصولا الى المحزبين المعميين بالاحزاب الاخرى المستفيدة من فساد المنظومة بكاملها.. هول اللي ما عندهم مشكل يصير هتافهم بالمجارير بالعتمة نفديك يا زعيم

اما باقي ابناء الطوائف واولهم الشيعة فهني اكلين الضرب متلهم متل غيرهم من اللبنانيين غير الحزبيين... والامل الوحيد بإننا نرجع نتكتل بعشرات الالاف بوجهم كلن يعني كلن خليني ساكتة