خليني ساكتة ٧٨ - لو ما نحن خبرة بالتعطيل كيف كنّا انتبهنا انه اميركا بمأزق داخلي؟

خليني ساكتة

تم النشر في 10 يناير 2021


من ايجابيات ثورة ١٧ تشرين اللي بالنسبة للبعض ما انجزت شي، بالقليلة التجربة المتراكمة من اكتر من سنة علمتنا ننظر بالسياسة

انه مستقلين مثلا مناصرين ترامب يفوتوا عالكونغرس ونحن ما نكون مراكمين اكتر من سنة خبرة انتفاضة؟

انه مثلا كيف كنا بدنا ندلي بدلونا، لو ما تجربتنا مع حرس المجلس؟ او كيف كنا بدنا نعلق على الاحداث والديموقراطية والديموقراطية المضادة لو ما لمسنا التغيير بإيدينا

لو ما نحن شعب خبرة بالتسليم السلمي للسلطة كيف كنا حكمنا على افعال ترامب؟

لو ما نحن منعرف قيمة الديموقراطية التوافقية كيف كنا بدنا نظر على ديموقراطية الاميركان الهشة؟

لو ما منعرف كيف رئيس المجلس بشلش وبيحمي المجلس بصقور ونمور وديناصورات وشبيحة كيف كنا بدنا ننصح نانسي بلوسي كيف تتصرف؟

لو ما نحن شعب بيعرف المعنى الحقيقي لضياع صناديق الاقتراع والتزوير بالانتخابات كيف كنا بدنا نجزم انه ترامب ما عنده دليل عالتزوير؟

لو ما عنا دولة ضمن دولة كيف كان بدنا نفهم بالدولة العميقة؟

لو ما منعرف قيمة التوريث السياسي كيف كنا بدنا ننتبه انه الديموقراطية باميركا انتهت؟

لو ما عنا شيخ ومفتي وبطرك بحطوا خطوط حمر، كيف كنا بدنا نتعاطى مع الدعوة لمحاكمة ترامب وعزله؟

لو ما نحن خبرة بالتعطيل والفراغ المؤسساتي كيف كنّا بدنا ننتبه انه اميركا بمأزق داخلي؟

لو ما خبرتنا بالقمصان السود كيف كان بدنا نقدر خطورة ال domestic terrorists اللي فاتوا عالكابيتول

هلق اللي صار صار بس باختصار بعتقد انه اللي صار مع ترامب رح يعلم كل الرؤوساء الاميركان اللي جايين يتمسكوا بالتلت المعطل

على كل حال خلينا بحالنا، المرشد الاعلى المحلي فضي وطلع حكي معنا بهمومنا، اصلا كان واعدنا من اول الاسبوع ووفي بوعده. وطلع حكي بكل التفاصيل ودعي المحقق العدلي يخبرنا الحقيقة، طب منيح بما انك يا سيد عارف الحقيقة ليه ما خبرتنا اياها؟ مَش عّم يتهمونكم الكم طلاع خبرنا الحقيقة، انا بقول انك خايف عالسلم الاهلي، يعني لو حسن فضل الله خبرنا الاسماء اللي بملفاته من ٥ سنين ما كنّا وصلنا لهون. نحن مأكدين من حرصك عالمصلحة الوطنية، بس هيك وهيك عرفت خبرنا. وكمان خبرنا مين قبض وقديه قبضوا ليحكوا عن القرض الحسن، ما نحن الشعب عّم نبرم عالحقيقة وما قادرين نوصلها، وانت العالم بكل شي بما فيهم خطورة ترامب عالزر النووي غير الزراعة والمظلومية قلنا. على فكرة انا بحيي سعة صدرك وصدر الناس اللي ممكن تتحرك لتسكر القنوات اللي عّم تفتري عليكم. ونحن معك اصلا مَش منتظرين شي من الدولة، اصلا نحن ابناء قطاع لبنان المحتل، شو بعد بدنا ننتظر.

على الهامش السيادة طايفة ، ولا الموضوع مش موضوع صورة تعلقت من هون او تمثال انرفع من هونيك، هي قصة نهج... يعني مثلا ما حدا بيقدر يلوم المرشد الاعلى المحلي عادي كلنا منعرف qui donne ordonne، مين فينا نعاتب قولكم بي الكل؟ انه ولو استدعي لك شي سفير، اكتب لك شي بيان، اعلن لك اضراب مطنطن بضهره اعتصام، اي شي هيك على عينك يا تاجر بس كمان بفهمك ما حدا طلب توقيعك حتى تنتفض. بس بي الكل واعي للوضع وعم يتصدى للانهيار وطلب من المجلس الدستوري يفسر الدستور.. وهيدا الطلب اللي هوبحد ذاته غير دستوري اجا من باب الحرص عالدستور...

المهم الدولار سجل رقم جديد بالاسبوع الاول من السنة، ضرب بالـ٩٠٠٠ والخير لقدام، والحاكم بأمر الليرة انتبه اخيرا انه الليرة مَش بخير وبده يحرر سعر الدولار، بس ما تخافوا السيد اعطاكم حل عنده استعداد انه يفتح القرض الحسن بكل لبنان والمناطق.

الدولار مَش لحاله طلع، كمان عدد الاصابات بكورونا هلق مختلفين بين بعض الحق ع مين الشعب البلا مخ بحسب الدولة والاعلام او الدولة المقصرة على مدى السنين وخططها الفاشلة بالاحتواء.. بس اوعى حدا يسأل وزير الداخلية اي سؤال الزلمة اعصابه مش حاملته

يللا بسيطة منيح ما الها اسكتي احسن ما اصفقك بقفا ايدي

وبعدين على شو قامت القيامة وما قعدت ع وزير الصحة كل شي عمله غدا عالضيق مع شي ٤٠ شخص وقبلها قطعة غاتو عالماشي بالسوق وقطر عالدبكة بمهرجان.. معليه يعني شوية احساس مع الزلمة ما بتشوفوا الا النص الفاضي من الكباية، عمل كل شي بيقدر عليه خطة الاحتواء ما نجحت لان نحن الشعب بلا مخ هي كانت مدروسة بشكل كتير قوي، جيبوا لي بلد بالعالم استخدم استراتيجية المفرد مجوز غيرنا كل عمرنا السباقين.. وبعدين شو بدكم يعمل يستقيل متل وزراء العالم المتحضر اللي بيغلطوا؟ ما هو اصلا مستقيل منيح اله خلق علينا وعم يشتغلنا بعده..

قربت تنحل الشيخ سعد خلص الاجازة ورجع بالسلامة واول ما رجع تذكر انه مش هو اللي معطل الحكومة هيدا جي بي واللي وراه، اصلا كان ضروري الرجعة عالبلد ليحط هيدي التويت لان بالاجازة تويتر ما بيمشي بتلت... الله ستر انه الشيخ سعد انسان مسؤول بحكيه او ما كنا عرفنا إراؤه الجهنمية لو مثلا تويتر حظره متل عمل بترامب. واول ما يشكل هو شخصيا الحكومة اردوغان بده يساعدنا نرجع نعمر.

ومنيح اللي لحق حاله ورجع قبل القرار بالحجز بفندق يومين ودفع ٥٠$ قبل الطلعة عالطيارة.. طب الفندق وما حدا يقول انه الدولة مش سائلة حتى منقايتلنا اوتيلات فهمنا بس ال٥٠$ لشو ما ع اساس نزلتوا سعر ال بي سي ار ل ١٠٠ الف نسيتوا انه الـ ٥٠$ ٤٠٠ الف ليرة بالحد الادنى؟

على الهامش الوضع الصحي مائل الى مأساوي، والاجتماعي حدث ولا حرج، اما الوضع المصرفي فالضرب بالميت حرام.. هيدا كله بس لنذكر عالسريع نتيجة سياسات متعاقبة من ٣٠ سنة كل واحد فات عالحكم وشارك بالحكم مسؤول عنها اي انا معكم مسؤولية متفاوتة بس كلكن يعني كلكن مسؤولين

بس شو همنا نحن؟ متل ما قال السيد نحن ما كان النا وجود حتى عالخريطة

مين نحن اصلا؟

ان شاء الله موت اذا عم كذب بس المرشد الاعلى المحلي لقي وقت وحكي بالشأن المحلي بهالكم يوم، وبده يتطرق من الحكومة للتحقيق بانفجار المرفأ والمصارف والمودعين وحتى يحكي بالقرض الحسن والخيارات السياسية والخيارات الاقتصادية.. واكيد اكيد كلنا لازم نصغي منيح، نفهم منيح نصدق منيح ننفذ بدقة ولا نعترض

خليني ساكتة