خليني ساكتة ٧٩ - "تحت درج المدينة الرياضية" الثقب الاسود.. لبيك يا زعيم!

خليني ساكتة

تم النشر في 17 يناير 2021

لوين وصلتونا؟

لوين نحن قبلنا انكم توصلونا؟

اللي عّم بصير مجزرة جديدة عم ترتكب بحقنا بأقل من سنة


اهمالكم اللي وصلنا لهون قلة مسؤوليتكم وصلتنا لهون

اي اللي عم نعيشه يوميا مجزرة انتم المسؤولين عنها، مش الشعب اللي بلا مخ

هيدا الشعب اللي بناسبكم كتير يكون بلا مخ يوم التصويت بصناديق الاقتراع،

مين المسؤول عن اللي وصلناله؟ انتم الطبقة الحاكمة الفاشلة بكل شي حتى بخطة احتواء.

صح كل دول العالم ما قدرت تحتوي كورونا بس اذا خلص كورونا بلملموا حالهم نحن شو بدنا نعمل؟ بظل

الطبقة الحاكمة الجوعانة اللي عم تبرم على الليرة اللي بدها تنصبها وعلى الدولار اللي بدها تنهبه

الشعب اللي سرقتوه وقتلتوه وجوعتوه مش هو المسؤول عن اللي عم بصير، ولا تهافته على السوبر ماركت، ولا شراؤه للمارون غلاسيه والكافيار متل ما محطاتكم التلفزيونية عم تروج اللي ما عم تشوف تهافت عالعالم التانيين على الاكل من الزبالة والشحادة لتطعمي اولادها

لا فشكلم الاول والاخير هو اللي وصلنا لهون، من اول الاسبوع ما بقي ولا وزير صحة سابق ما ادلى بدلوه، وين كنتو كلكم وقت اللي حكمتوا شو حضرتولنا وقت ولاياتكم؟ لأي سيناريو حضرتونا كشعب كل عمرنا نموت ع ابواب المستشفيات بالمفرق هلق صرنا عم نموت بالجملة

صح كل دول العالم فشلت بإنها تحتوي كورونا بس ما في دولة بالعالم ربت وحش اسمه المستشفيات الخاصة بياكل ما بيشبع وفاتت معهم بكل انواع ضروب الاحتيال ومص دم الدولة وبس تراكمت مستحقاتهم الخيالية امتنعتوا عن الدفع وهني امتنعوا عن استقبال العالم

تماما متل ما فتوا مع المصارف بعمليات استدانة لا متناهية نصب على مدار الساعة وهندسات لصوصية باحتراف وبالاخر وقفتوا تدفعوا للمصارف اللي وقفوا يدفعوا للعالم

انتم السلطة الحاكمة، واللي منكم مش بالحكم اليوم كان مبارح، شو بنيتوا لنا؟ حتى المدفن بدنا ندفع حقه

لا وبعدكم بكل وقاحة بتطلعوا بتتراشقوا مسؤليات التعطيل، بي الكل اللي مَش منتبه ع شي لقي وقت ليمثل هو وحسان اكبر انجازاتي فيلم المظلوم وشفقان علينا نحن كشعب قال حظنا عاطل

الواحد كيف بده يحكي معكم بأي لغة تحديدا؟

جي بي متفائل خير بالرؤية العامة لان هو رؤيته اشمل من الواقع المحلي عم يخبرنا انه هيدي سنة مصيرية سنة انتخابات بايران وسورية، عن جد؟ ما قادرة انطر صراحة ليتسلم بشار الاسد السلطة من بشار الاسد

وخامنئي السلطة من خامنئي يعني لحظة مصيرية تاريخية غير مسبوقة رح تغطي على الانتخابات الاميركية اللي اثبتت هشاشة الديموقراطية بالعالم كله.

تخايلوا حتى ترامب المعروف بأنه هيك كيف بدي قلكم بولي لما غلطوا مناصرينه طلع واستنكر العنف ودعا للسلم هيك دغري ذكرني بردة الفعل وقت ٧ ايار يوم اللي تعرفنا على مصطلح "يوم مجيد" ومن يومها تعلمت حدود القوة. اللي راح راح شو بدنا بالتاريخ خلينا بالحاضر، شو سألتوا الجيش عن التحقيقات؟ ليه بعده ما خبرنا مين المسؤول عن نيترات الامونيوم؟ هلق قولكم الجيش وصل بتحقيقاته للي وصله فراس حاطوم؟ انا بقول الجيش مش اختصاصه تحقيقات استقصائية او ما كان المرشد الاعلى المحلي تجرأ وطالبه يكشف عن النتيجة

مبروك مجلس النواب اقر استقدام اللقاح، على امل ما يختلفوا على اي مناطق بده يتوزع وتحت شعار اي حزب ويخلص متل المستشفى الميداني القطري او المستشفى التركي اللي واقف منذ الازل على خلافات مين بده يعين المدير العام

على الهامش هيدا الاسبوع سجل موقف لسامي فتفت اللي استنكر وصف الحريري بالكذاب من قبل رئيس الجمهورية، وميشال ضاهر حس معنا نحن الشعب اللي مش معود عالبهدلة، والحزب القومي جاهز لمناصرة سورية بأي حرب ضد العدو الغاشم، الل وبهالحشرة قاسم هاشم اكد حق اي لبناني الوصول لاي نقطة بمزارع شبعا اي هيدي هي ذاتها الشماعة ما ترسمت حدوها مع سورية بعد.

وشهدنا امر قضائي لالزام كهربا لبنان بتأمين الكهربا لمستشفى بهيدي الحشرة بدها امر قضائي شو الكهربا ببلاش؟ لنكون هدرنا ٤٢ مليار دولار بالكهربا ليجي مستشفى حكومي بأزمة كورونا يطلب كهربا؟ مش مسموح هالاستغلال

كله تفصيل قدام، "تحت درج المدينة الرياضية" المخزن اللي بده يفوت عالتاريخ، بكل قلة ضمير في مستشفى ميداني من قطر مخصص لكورونا تحت هيدا الدرج، بس وزارة الصحة رح تستعمل ال ٥٠٠ تخت وال ٥٠ جهاز تنفس الاسبوع الجاية لو ما حدا عرف وكشف الموضوع وزارة الصحة يمكن كانت قررت تستعملهم الشهر اللي جاية او السنة الجاية ما الوضع تحت السيطرة

هلق المشكلة بده ارض مسطحة ليتركب، والدول العظيمة والزعماء الاكتر عظمة ما قادرين يلاقوا تكاليف يسطحوا ارض ليأمنوا اوكسيجين للعالم.. اكيد ما هلق مش وقت انتخابات تتزفت سطوح المباني

ان شاء الله موت اذا عم كذب بس كتير مرات بقعد فكر كيف بتناموا؟ كيف بتقعدوا؟ كيف الكم عين تحطوا عينكم بعين اولادكم برجع بقول مش الحق عليكم

خليني ساكتة