خليني ساكتة ٨٤ - زعيم عالشجرة ولا عشرة بالإيد... وتلجة مباركة!

خليني ساكتة

تم النشر في 22 فبراير 2021



اكيد مفكرين بدي بلش بخطاب المرشد الاعلى المحلي، او التعليق على خطاب الصهر المعجزة

او على تنحية القاضي صوان او على غلاء البنزين والمازوت اوعلى جهابذة التيار او يمكن سعر صرف الدولار

صح ضروري نحكي عن كل هول بس منبلش بالاهم والحدث الاهم على الاطلاق بالاسبوع كان

زراعة الاشجار باسماء زعماء لبنان للقضاء على الطائفية

اي الطائفية تحديدا بلبنان طلعت بتخلص بزراعة شجر

باسماء الزعماء، هيدا مش اي حدا قايم بالحملة هيدي مصلحة الابحاث الزراعية شخصيا اكتشفت هيدا الموضوع

ومن هيك قررت تعالج المزح بالحيادية وتدويل لبنان الصادر عن بكركي وبمقابله اصبع التهديد المقاوم والحريص على وجه لبنان الفارسي قصدي العربي، بإنها تزرع شجرة باسم البطريرك الراعي وشجرة باسم السيد حسن.. لا ووحدة للرئيس بري وحدة لسعد الحريري، وما تغار يا جبران اكيد اكيد جاي دورك انت وبي الكل لان ناويين على كل الشخصيات السياسية والاعلامية

يا ريت تبلشوا بابراهيم الامين هيك بلكي بتلهوه عن كشف العملاء والتشهير فيهم بلكي ما لحقوا يتحسسوا رقابهم، يمكن لو بلشت الزراعة اللي بتقضي على الاحقاد من كم شهر كان بعده لقمان سليم بيناتنا.

هلق بمواضيع الخطابات والتراشق السياسي صار الواحد متل اللي ما اله عين يعني شو بدنا نضل عم نحكي ونعيد.. طالما كل واحد عنده جمهوره اللي شايفه وغاشي

منقل له زعيمك فاسد بقلنا عملا منقل له زعيمك جوعنا بقلنا خونة منقل له زعيمك سرقنا بقلنا السفارات عم تدفع لكم

خلينا بالمهم لا مش سعر صرف الدولار، لان شو يعني صار ٩٥٠٠ وممكن يصير ١٠٠٠٠ او ١٢ او ١٣ شو الفرق المهم الزعماء وجماهيرهم بخير، اصلا نحن مين لننصحكم شو بفهمنا؟ انتو وزعمائكم بتفهموا اكتر منا بتعرفوا مصلحتنا اكتر منا بتعرفوا مين عم يحاول يستغلنا نحن قاصرين ما منعرف مصلحتنا واذا جربنا نحكي عن مصلحتنا اللي هي مصلحتكم انتو الشعب التاني اللي عايش بالرفاهية والكماليات والعز والعنفوان بتقطعوا التلفزيونات لما يتلوث سمع الجماهير الخفيرة المؤازرة للعهد القوي وخطه المقاوم او بتتهمونا اننا عم ندعي لابادتكم والتحريض عليكم وبترفعوا علينا دعاوى قال انتو مآمنين بالقضاء

هيدا القضاء، اللي اذا لا سمح الله طلع مش حيادي، دغري دغري منعزله نحن ما عنا مزح ما منقبل اي حدا يصير في شبهة حول اي موقع.. مثلا اول ما عرفنا في تضارب مصالح بالتحقيق، وانه بيت القاضي صوان تضرر بالانفجار بشطبة قلم شلناه.. بعد ناقص انه بيته تضرر بالانفجار ويحقق ع عالم متهمين بالتقصير يتطاول على وزراء ومش اي وزراء وزراء وراهم زعامات كبيرة.. بكرا اوعى يطلع شي قاضي ما عم يلاقي حليب لابنه او دوا لامه يحقق بالتهريب، او شي قاضي خسر شقى عمره بلعبة الدولار يحقق مع رياض سلامة

نحن خلص صار لازم نرتاح نحن بأيدي امينة ما حدا رح يسمح بولا واحد بالمية لعب بأي مركز او ظظلم او عدوان او هدر حقوق وحقيقة، خدوا مثلا الرئيس بري عم يدعي لانتخابات فرعية، هيدي الدعوى ليه برأيكم؟ انه قصده يقول لجعجع وجنبلاط ما تحلموا بانتخابات نيابية مبكرة؟ او قصده يقول لعون وصهره المعجزة حضروا حالكم لمعركة انتخابية تفرجي حجمكم الطبيعي عالارض قديه صار؟؟ لا لا هو عم يعمل كل هيدا حرصاً على المادة ٤١ من الدستور.

على الهامش عناوين من عيار مع ارتفاع سعر الصّرف... هل لبنان فعلاً أمام مجاعة؟ او

الوضع المعيشي في لبنان خطير جداً..أسعار المواد الغذائية ارتفعت عن 2019 نحو 200%!

الوضع خطير جداً.. لبنان على شفير كارثة نفسية!

هجرة أطباء من لبنان تثير مزيدا من المخاوف بشأن وضع القطاع الصحي

هل بات "الأمن الغذائي" في لبنان مهددا؟..

كله مش مهم وهيدا كله هيك لتمييع انجازات العهد ومحاربة بيئة المقاومة، بس العهد بخير خصوصي مع المستشارين الجدد بقصر بعبدا، مش تبلشوا هلق جبران باسيل عم يدير قصر بعبدا على واتساب وانه هو حاكم القصر من انستغرام لا لا انا بعرفه ل جي بي ما بيعمل هيك، هو بس كيف يعني مثلا اولا ما ينتخبوا رئيس جديد بأميركا بصير في ادارة انتقالية لمدة معينة تستلم من السابقة حرصاً على استمرارية العمل بالمؤسسات اي هيدي هيك نفس الشي.. له اوعى تفكروني عم قول انه جي بي ناطر الكرسي ليورث ابد، قبل ما يبلش الذباب الالكتروني والجيش الالكتروني ومحرر الارض الالكتروني وحارق الاخضر واليابس الالكتروني يهاجمني، لا يعني هيدي الجحافل الالكترونية ما بقى حكرا على السياسة، انه اذا حدا عطي رأيه بقضية اجتماعية بخلاف القطيع بيتهشّم الكترونيا.. ما اسم الله صار اذا ممثل اعطى رأيه بمشهد تمثيلي بينفرم، انه صار لكل زعامة فنية او اقتصادية او سياسية ذبابها الالكتروني اي اي ما تستغربوا ما هيك وضع بهيك بلد شو ممكن يجذب غير الذباب الالكتروني والحقيقي.

بالعودة لارض الواقع والسياسة وحتى ما نضيع البوصلة وقبل ما يكبروا الشجرات ويكتروا ويصيروا على عدد الزعما ان شاء الله موت اذا عم كذب بس انا بقول لشو الاختلاف بالرأي، لشو التعبير عن اي شي ما بيعجب الاخر، يعني نحن بدنا نتفق انه كلنا منكون صوت واحد رأي واحد خيار واحد بصب بمصلحة المرشد الاعلى الذي لا يعلو على اصبعه احد او على الدنيا السلام خليني ساكتة