خليني ساكتة ٨٦ - الجوع "تسلّل" لجمهور الثنائي الشيعي.. وبلبنان إن لم تكن نصّاباً أكلك النصّابون!

خليني ساكتة

تم النشر في 7 مارس 2021





خي واخيرا نزلت ال budget الجديدة تبع السفارات هلكونا هلك لأفرجوا عن الدفعة الجديدة

الهيئة هالمرة الدفعة مبحبحة لشملت جمهور الثنائي

اي هيك من الاول فتوا اموال بشكل حقيقي خليها تتغلغل الانتفاضة بشوارع الضاحية

ما هو بالنتيجة اذا ما دفعت السفارات لجمهور الثنائي متل ما عم تدفع للثوار ما حدا رح يتحرك

سجلوا عندكم شو دفعت السفارات لفاضت العالم بالشوارع، اول شي بسبب تمويلها الفاسد جاعت العالم وصارت عم تتخانق على تنكة الزيت وكيس الحليب

وبسبب تمويلها الفاشل حط الدولار وراه الـ ١٠٠٠٠ ليرة وبلش يحلق صعودا، يا ريت بس بقي شي اسبوع ١٠ آلاف بالقليلة الحسابات كانت سهلة بلا كسور بلا بطيخ.

وبسبب تمويل السفارات الفاجر بعدهم مختلفين على الحصص بالوزارات ومين بده يوزر مين ومين بيه أقوى من بي مين.

هلق الشيخ نعيم قاسم قالنا انه حزب الله لا بيقدر يمون عالحريري ولا على باسيل لحد ما يحلوها بين بعض، هيدا التصريح مع وصول اموال السفارات خلا الشارع يغلي وينزل من شمال لبنان لجنوبه وبالوقت اللي جماعة المناديين بكلن يعني كلن وانا منهم مبسوطين بالزخم الجديد اللي بالشارع لاقت الاحزاب ببعض ازلامها فرصة لتوجيه الرسائل السياسية

وهيك منشوف جمهور الثنائي لقى فرصة للتعبير الحقيقي عن الرأي شي مع انتخابات مبكرة وشي ضد جبران باسيل وشي شطحت معه شوي وصفق الاستيد نبيه بالطريق. بس بكل الحالات التعايش المشترك حتى بالتظاهرات كرمال الوضع الاقتصادي المزري واصل للركب، ومرات بين ابناء الجلدة الوحدة، وقد ما السلم الاهلي ركابه عم تسك اضطرت بلدية الجية بإمها وبيها تطلب من الاعلام عدم تضخيم مشكل فردي حصل بالسلاح الابيض وأكدت ببيانها انه كل الجرحى من أبناء الجية ما مصارين البطن بتتعارك.

للحقيقة البلد مقسوم بين مشهدين، الاول عجقة العالم على بيستات التزلج والمشهد التاني التضارب على كيس حليب وصرخة ام انه اولادها كيفو بس عرفوا انها رح تجب لهم نيدو

ومشهد تاني بين قطع الطرقات بالدواليب المحروقة او بالسيارات على فاريا

هيدا مش انفصام بقدر ما هو projection لواقع اللبنانيين، الجزء اللي عم يجرب يعيش والجزء اللي عم يجرب ما يموت

وفي عندك الزعيم اللي عم يسأل شو صار بالبلد، والزعيم اللي عم يستنكر ارتفاع سعر الدولار، ووزير التربية اللي مستاء من وضع التعليم، ووزير الصحة اللي متفاجئ بوضع الطبابة وعدم احساس المستشفيات بالشعب وانها بدها فواتيرها على سعر المنصة

هيدي المنصة اللي من ابتكارات خريج الميريل لنيش، يا حرام هيدا الكوكب تارك كل شي وحاطط حطاته هو وجي بي، هلق قال رياض سلامة بده يرفع دعوى ع بلومبيرغ لان عم تسيء لسمعته، يعني بكل أمانة لو انك تحط كل هالمجهود لترد على اللي عم يفضحوك ويكشفوا بلاويك بإنك تصحح هندساتك الفاشلة يمكن كنا لحقنا حالنا شي شوي.

رئيس الما خلونا بعده مفكوس على البابا وزيارته عالعراق، وبعد ما جرب يروح يشوفه وما خلوه، وجه رسالة للبابا سألوا فيها ينتبه على مسيحيي الشرق وحقوقهم، بس نسي يخبره انه مسيحيي لبنان عم يتروقوا عز ويتعشوا كرامة بعد ما صار قسم كبير من العالم على لوائح الاعاشات الغذائية والطبية ناطرين مكرمة زعيم المنطقة من جهة وانه جبران باسيل يتواضع شوي ويبطل يحلم بالرئاسة.

أكيد تراند الرجعة عالشارع وحرق الدوليب وقطع الطرقات، غطت على تراند الحياد تبع الاسبوع الماضي، واللي كان انتهى بمشهد سوريالي لمحور السيادة بمسيرة موتويات بتحمل اعلام ايران، وكمان غطت على تراند اللقاح والملقحين لدرجة صار ايلي الفرزلي يقدر ينام مرتاح.

رئيس السلفي والبلد خلفي، قام بزيارته الخامسة للامارات، عندي شعور رح يمنحوه قريبا الاقامة الفخرية، يا ريت بالقليلة بيلتهي عن هالكرسي وبيتركنا بحالنا هيك وهيك ما رح يفلح.. وأهضم شي اللي معتبر انه مطالبة الشعب بتشكيل حكومة يعني هو مطالبة برجعة سعد الحريري، ما عم اقدر اعرف كيف الواحد بده يفهمكم شعار كلن يعني كلن. وقال جنبلاط قلب وصار ما عنده مشكلة تتوسع الحكومة، والحكيم بده انتخابات مبكرة لانه طمعان بالرئاسة، وعلوش اكشف المي الباردة بإنه عون ما عم يفصل بين رئاسة البلد والتيار الوطني، وبري مش راضي عن وصول الدولار لهون هو بعده عند وعده اللي اطلقه بتموز الماضي انه الاتنين راجع الدولار ل ٣٢٠٠ منيح بوقتها ما حدد اي اتنين لا بأي سنة ولا بأي قرن، شو بدكم مش مصدقيني طب شوفوا كيف زبطت مع ليلى عبد اللطيف بترؤس الله يرحمه جان عبيد، بس قربت تنحل مصباح الاحد طالب المنظومة الحاكمة بالاستقالة فورا، هني لقبل هيدا الطلب كانوا بعدهم مفكرين مطالب الشعب لعبة بعتقد رح يبلشوا يحسوا بالسخن.

هلق بيطلع واحد وبقل لي انتو الثوار خليكم على صف الحكي ما قدمتوا قيادات ولا مشروع، اوكي معك حق بس انا رح اعطيك سبب واحد لعدم تقديم قيادات للثورة وهو نقطين منفتح المزدوجين الثوار عم يحاربوا السلطة وهيدي السلطة قسم منها معه سلاح بيقتل والدليل لقمان سليم، قسم منها متمرس بتركيب ملفات التعامل والدليل الاتهامات الجاهزة يمين شمال للتوزيع، يعني باختصار ما في توازن قوى حالي وما رح نلسمكم رقابنا منسكر المزدوجين.

على الهامش لهلق ناطرين نسمع باسم القاضي بيطار عم يستدعي المسؤولين بملف المرفأ، يعني صح هو اله بس شي ١٥ بمنصبه بس جريمة العصر فاتت بشهرها السابع والمذنبين والمقصرين معرفين بالاسماء والاشكال والمناصب، وبدنا حق الضحايا وحق اهلهم واولادهم.

قيل ما اختم من الواضح انه السلطة مقتنعة انها اذا انهت كم صراف بينزل سعر الدولار، هيك متل ما بيستات التزلج اعلنت انهاء الموسم وسكرت للحد من جلقان اللبناني صاحب البرستيج.

من ميلة تانية وزير التربية عم يهدد بانهاء العام الدراسي، والسوبرماركت قررت تنهي موضوع استغلال الفقير لحقه بالسلع المدعومة، وعم تفرض عليه يشتري بالمبلغ المرقوم قبل ما يحق له يشتري سلع مدعومة، لا معليه اذا كنتو مفكرين انه بس السلطة وحاشيتها بيعرفوا ينهبوا ويسرقوا اي بعدكم ما شفتوا شي، تعوا شوفوا النصب اشكال الوان بين عامة الشعب، ما هو بالنهاية اذا لم تكن نصّاباً يمكن ياكلوك النصابين.

ان شاء الله موت اذا عم كذب، بس لما تكون بعجقة الطريق المقطوعة، حتى لو انت مع قطع الطريق بتصير تطلع بوجوه العالم وبوج اولادك اللي معك بالسيارة وتفكر وين العدل؟ نحن ذاتنا عم نعاني من كل شي من الغلا من السرقة من النهب من الاستغلال ومن قطع الطريق وهني قاعدين على كراسيهم حاميين بعضهم البعض وكل واحد منهم مفكر حاله مش معني، ومفلت جمهوره ذبابا الكترونيا او رابطين زندهم بانتظار المواجهة خليني ساكتة