خليني ساكتة ٩٤ - يمكن صار لازم نشيل الارزة عن العلم.. ونحط شجرة رمان!

خليني ساكتة

تم النشر في 2 مايو 2021


يأست صراحة

قلت بجي لهون بشكيكم للارزات

بلكي هالارزة بتفهم عليكم اكتر بتوشوشني بتقل لي شو اعمل

احزروا شو وصلت لقيتها عم تقل لي ما تشكي لي ببكي لك

طلعت عارفة بعمايلكم، بس تفوت عالغابة بتحس الارزة بدها تسألك انت لبناني؟ انت مين بالزبط؟ بعتقد انها بترجع بتنتبه لحالها انه ما ممكن انت تكون من هوليك من كلن يعني كلن وجاية عم تدعس ع ترابها بحنان واعجاب، بتعرف اني لو كنت منن كنت بكون بشي غرفة سودا عم امضي على شي كسارة او شي سد او شي صفقة نفايات تمحي اي امل الها بالعيش

بس توقف هون بين الارزات بتحس انه بالدوائر الرسمية الحالية لازم ما يكون في ولا ارزة على ولا مؤسسة منهم ولازم نستبدل الارزة بالمؤسسات المفوخرة بالرمان مثلا لان بتلبق اكتر لانجازاتهم ولادائهم.

على سيرة الانجازات، حسان اكبر انجازاتي قال استغل زيارته لقطر وقدم سي في من ١٣٦ صفحة ليفتشوا له على شغل بعيدا من بلاد الارز بس تتشكل الحكومة، بتعرف شو لازم نساهم بدفع معاشك عندهم بس ليخدوك على السريع

هيئته على اياك ما كان في وزير ادمغة مهاجرة متل وزير التربية الحالي، من هيك ضاينت مطولا بهالبلد عن جد ضيعانك فيه لازم تفل بس انتبه يردولنا اياك مرتجع مع الشكر، ويطلبوا مثلا القاضية غادة قلب الاسد عون بالاسم بصفتها ارزة شامخة من ارزات الوطن بوج الفساد.. هلق صحيح بعد ما عرفنا شي عن الداتا او عن شو لقت او عن اي شي بس مشكلها مع القاضي المكلف القضية بدالها بعد ما فسدوا لها انه اجا على مكاتب مكتف بيثبت مدى تجذرهها بمكافحة الفساد وخصوصي بعدم تأكيدها انه الملف معها وما بتعترف بأي قرار تاني عن مين ما صدر.

خريج ميريل لينش كبير اللصوص مفوكس على المنصة الاكترونية، تراب الارز فخور فيك وبهندساتك المالية بس لمست انا من الارزات قلق من أنه شهرة منصتك الإلكترونية الجديدة تاخد كل الزخم بالعالم بدالن. بعدين الله ستر وسلموك المصرف المركزي ما حطوك ناطور على الارزات لان كنا وعينا بليلة ما فيها ضو قمر لقينا حتى الارز المرسومة على العلم مش موجودة متلها متل ودائع المواطنين.

جي بي راح على روسيا من بعد الجح محمد رعد ورئيس السيلفي والبلد خلفي، راح يرفع شعار الما خلونا بالعالي، ليرفرف بسما موسكو اصلا معه حق شي كتير بضيق الخلق يبقى الواحد قاعد بوطن النجوم عم يرزح تحت العقوبات الاميركية.

وهيدي الزيارة بتجي بعد يومين على استقباله التاريخي لوزير خارجية هنغاريا بمركز التيار مع التأكيد على انه الزيارة شخصية وما الها اي ابعاد توسلية، وانه وزير الخارجية الهنغاري متفهم موقعه كأرئيس اكبر حزب مسيحي بلبنان يمكن اجا يبرم معه تحت الطاولة على حقوق المسيحيين. ميشال ضاهر قال 900 مليون دولار تكلفة البعثات الدبلوماسية في الخارج سنويًا، يا بلاش لازم يكون اكتر بكتير، هول مبعوثي بلاد الارز

الانظار كلها تحولت على الرمان وانفتحت تحقيقات داخلية بالموضوع، وانبعت مراسلات ليسامحونا بالبلاد التانية، وانتشرت نظرية المؤامرة بإنه السعودية هي من الاول مش طايقتنا بس بدها حجة ويمكن مش صحيح انه صار تهريب مخدرات من لبنان، يعني باختصار طلعت السعودية مهربة لمخدرات عند حالها لتوقع بلبنان وتقطع العلاقات معه لتضيق على خط الممانعة وحليفه الماخلونا.. طب بدي سلم جدل انه النظرية صحيحة طب يعني شو بيمنع السعودية تاخد هيدا القرار بلا لف ودوران لتكون خايفة نقطع عنها المساعدات مثلا ونسكر انابيب النفط بوجها ويقوم يثور الشعب هونيك لانه ما عم يلاقي ياكل؟

على الهامش او بصلب الموضع او بالنهاية متل ما بدكم كل الارضية لرفع الدعم تحضرت، وهي مسألة ايام معدودة بس عم يأجلوها قد ما بيقدروا لكان الشارع اوليردي تعود على الفكرة، تحديديا لكان خلصت كل تحضيرات الجمهورية الموازية بالدويلة الابية وتوزعت بطاقة السجاد بما يضمن هدوء الارضية، وهيك بيمرق رفع الدعم على وقع شعبنا ما رح يجوع، اما المتضررين الاخرين بينقسموا بين مش طالع بايديهم شي وبين بريستيجهم ما بيسمح لهم انه يعبروا عن فقرهم كلبنانيين اصيلين وبيمرق رفع الدعم شي قدام شي لحد ما يقضوا على النفس الاخير اللي فينا

ان شاء الله موت اذا عم كذب بس بتحسنا رح نصير متل الاسماك النافقة اللي عم يطعمونا اياها من القرعون.. او يمكن مجموعة منا تجي تتلقح تحت هالارزات تنطر النفس الاخير هيك بموت شبعانة كرامة وعم تحلم بلبنان الجديد والمواعيد خليني ساكتة