خليني ساكتة ٩٨ - للسواح والمغتربين اليكم قاموس الانهيار اللبناني.. مطعم بانجازات الحكومة وقوة العهد!

خليني ساكتة

تم النشر في 30 مايو 2021


هاي كيفكم سافا؟ هيك كل العالم بعرف عن اللبنانيين اننا منحكي ٣ لغات، بس لاننا السباقين باللغات واختراع الحرف، صار عنا لغة خاصة بتحدى ارقى دولة العالم يكون عندها هيدي اللغة، هلق اذا ده يجي شي سايح لعنا لازم يطلب يحصل بس على هيدا ال dictionnaire وهو dictionnaire الانهيار

هيدا فيه المصطلحات الخاصة بالمرحلة، كل اسبوع بيطلع شي كلمتين ٣ بالقليلة يشغلوا بال المحللين الاقتصاديين والاخصائيين الاجتماعيين والاهم الاهم بال اللبناني العادي

وهيدا القاموس بيصلح كمان للبناني المغترب، ومن هلق لازم نصير خليني ساكتة نفسر شوي للمغتربين بعض التفاصيل عن حياتنا لسببين اول شي لإنكم املنا الباقي، وتاني شي والاهم حتى مش بكرا وقت الانتخابات يدفعولكم حق تيكيت الطيارة تجوا تنتخبولنا اياهم هني ذاتهم وترجعوا تفلوا على بلادكم الملونية، ولحتى اذا انتختوا من هونيك انتوا وعم تحطوا الورقة صندوق الاقتراع تتذكروا انه يعني هيدا الفاسد الجاحد المستقوي صاح العنفوان اللي عم تنتخبوا لنا اياه هو اول شي سبب هجرتكم وتاني شي هو سبب تحويل هيدا البلد لمزرعة.

وهيدي مقدمة لان نائبة رئيس الوزراء وزيرة الدفاع زينة عكر وزيرة للخارجية والمغتربين بالوكالة (واااو لقبها لحاله صار بده حلقة) اجتمعت مع وزير الداخلية وحكيوا بالانتخابات وبنواب المغتربين.. اي يعني عم تكبر قيمتكم عنا، ولان المنافسة رح تكون قوية لان للمرشحين عادة على الانتخابات مواصفات مدروسة متل المرشح السابق عن دائرة بيروت الثانية (رجا الزهيري فيديو)

ولان معظمكم ترك البلد على ايام شعارات متل سيادة واستقلال، والسرية المصرفية، وقوة لبنان بضعفه، والفوضى الخلاقة.. صار هيدا القاموس الجديد ضروري للمساعدة بتسهيل عملية دمجكم بالبلد من جديد.. بس ما تخافوا عم نحاول اننا نعمل فصل بالفاليه باركينيغ ونخلي كل ابن طايفة بمنطقته ما بصير كمان هالتعدي على المناطق )pierre masad(

خلينا بالمهم انا شخصيا بنتبه للمصطلحات الجديدة الصعبة نسبيا على المواطن العادي بس زور امي، اللي سألتني مبارح ماما شو يعني ترشيد الدعم

هلق غير انه هي امي وبرأيها اني كتير بتابع وبفهم وهيك، كمان بتعبر انه بحكم اني صحافية لازم يكون عندي الجواب والحل لكل شي، يعني تحديدا بدها اياني احكي عن الاخبار قبل ما تصير مش بعد ما تصير .

وانطلاقا من الشفافية رح قل لكم شو قلت لها: ماما ترشيد الدعم ما بيمشي الا التزامن مع البطاقة التموينية اللي دورها ما تنجح الا مع البطاقة التمويلية اللي ما ممكن يمشي حالها الا بصرف الاحتياطي اللي ما ممكن يحصل الا بصرف أموال المودعين

يعني ببساطة يا ماما في نصاب تاني عم يحاول ينصب على النصاب الاول اللي نصب مع النصاب التالت

وفي واحد رابع عم يجرب ينصب عالتالت بالتكاتف والتكافل مع نصاب خامس هول كلهم عم يجربوا ينصبوا من بعضهم الاموال اللي نصبوها عالموديعين واللي هي نفسها بتشكل الاحتياطي المتبقي عند كبير اللصوص واللي هي نفسها اللي بده يستعملها لترشيد الدعم عني باختصار يا ماما المجموعة نفسها عم بتنصب اموالك اللي هي اصلا انصبت من قبل هيئة النصابين برعاية كبير اللصوص. وهلق يا ماما هيدا خبر قبل ما يصير اسبوع الجاية رح ينزل ٣/٤ كلمات جديدة على قاموس الانهيار اول ما يوصلوا النصابين على طريق مسدود.

وحتى كبير اللصوص يبقى ماشي بمسيرته طلع بخبرتين كمان بينفع يفوتوا على القاموس الخاص وهني المنصة الجديدة ومن بعدها اعادة اموال صغار المودعين، ومتل ما المنصة بتاخد اللبناني الفريش وبتحول الدولار مباشرة للمصارف المراسلة، يعني النسبة للمودع نفسه شم ولا تذوق، كمان بموضوع صغار المودعين اذا صدق الحاكم بأمر الليرة، بده يقسط لهم مصرياتهم على ٥ سنين معدل ٤٠٠$ بالشهر، ومن هلق ل ٥ سنين يا ماما او كون مات جحا او الملك او الحمار. المهضوم بكل هيدا انه من بعد كل هيدا الشرح للست الوالدة قالت لي ايه فهمت عليك بس شو يعني ترشيد الدعم؟!

لا وبيطلع لك حدا من تيار الما خلونا وبيسأل ليه بعدهم ما حجزوا على اموال رياض سلامة؟ هلق انت كلبناني عادي غير انه اول سؤال بيجي ع راسك طب اذا الموضوع هلقد جدي ثابتة عليه للزلمة، كيف رئيس الجمهورية يستقبله اسبوع اي اسبوع اي.. مش مهم المهم النية تماما متل ما كانت نية جبران باسيل بموضوع البواخر انه يكون اكتر عقد شفافية بتاريخ لبنان بس ما خلوه، ورطوه هو ومستشارته ومستشاره ومستشار مستشاره ولحد هلق بعدها عملية التوريط قائمة بفرض التعطيل الحكومات الكل عم يحلف يمين او وزارة الطاقة لتيار الما خلونا او ما في تشكيل.

من دون ادنى شك انه كلمة رئيس السيلفي والبلد خلفي بمجلس النواب شكلت علامة فارقة، وقد ما تقيلة بتحس انه الاستيذ شخصياً كاتبها واذا مش هو كاتبها مدوزنها واذا مش مدوزنها اجت هيك music to his ears لدرجة حتى المرشد الاعلى المحلي طلع واعطى تعليماته واستعان بصديق لحل العقدة الحكومية، وكإنه فجأة ما بقى ملاقى انه التعطيل سعودي اميركي، وكإنه هيك فجأة حس انه العقدة شوي كتير داخليه ومرتبطة بالصهر وعمه او بالرئيس وصهره.

ورجعت مصطلحات كنا اشتقنالها على الساحة حلحلة العقدة الحكومية، تفاؤل، اسهم التشكيل مرتفعة، والاهم من هيدا رجع يرن اسم الخليل والحاج وفيق يعني عد ناقص اشارة اشارتين واسم الخليل التاني ومن بعدها بيطلع الرئيس بري وبقول ما تقولوا فول ليصير بالمكيول ومن ثم

.....

ما بعرف ما فيي اوعدكم انها تتشكل الحكومة او الادق ما بقدر اوعدكم انه اذا تشكلت في اي شي رح يتغير.

على الهامش مشهد طوابير العزة والكرامة عم يتعمم، بس شو بده يحكي الواحد، نحن شعب ما عرفنا قيمة حالنا، صار كسرنا واذلالنا سهل، نحن تعودنا على التعامل معنا كإننا منستاهل اللي صاير فينا، بيقتلونا بالمئات وبينهبونا بالالاف ويحكمونا وبذلونا.. وبيتركونا لمصيرنا.. كله هيدا ممكن يمرق بس ما وممكن انهي الحلقة بلا ما ذكر مرور عام على ذكرى ال ١٠٠ يوم على انجازات حكومة حسان اكبر انجازاتي وقت اللي خبرنا انه رحلة الإنقاذ بدأت.. والعالم يراقب بدهشة ما أنجزناه

ومن وقتها ما عم نلحق ندهش العالم، دهشة انفجار المرفأ، دهشة انه بال. ٢٠٢١ بعدها الميليشيات بتسريح وبتمرح وبتهدد بالشوارع

دهشة بالقضاء اللي ما في لزوم نوصفه يعني لو انطلب من حدا يرسم كاريكاتير عن وضع القضاء بلبنان ما كان ممكن يرسم شي اكتر تعبيرا عن العصفورية الدايرة هالايام.. هول هني ذاتهم اللي المفروض نلجأ لهم ليحمونا القتلى المسؤولين عن انفجار العصر ومن اللصوص اللي استولوا على اموالنا والبلطجية اللي يقرروا اي متي يهجموا علينا

هلق بي الكل بارك لنظيره السوري بس عندي سؤال انه لو ربح مثلا ب ٧٥٪‏ كانت رح تفرق؟ مش قليل والله كل هالحرب كانت بس ضد ٤.٥ ٪‏ من الشعب السوري منيح ما كانوا المعارضين اكتر يمكن كانت تدمرت البلد وبي الكل معزوم علي قمة مناخية مع قادة العالم الاكيد أنا بقول لازم يروح بنفس الطريقة اللاجئ سافر فيها ع نيويورك اخر مرة سافر انه العيلة صار الها زمان ما عملت رحلة عائلية بعدين وروح علمهم كيف بتكون قادة العالم واشرح لهم شو يعني ترشيد الدعم وكيفية تمويل البطاقة التمونية

ان شاء الله موت اذا عم كذب بس سرقوا لنا اموالنا اول مرة لا ما ننبته، وعم يسرقونا كل يوم تقسيط مصرياتنا على سعر ٣٩٠٠ بلا ما نفتح، وهلق عم حاطين عينهم عالاحتياط اللي هو اصلا من اموالنا يا خوفي وكل خوفي ما يطلع هالاحتياط متل البلوك رقم ٤.. خليني ساكتة