خليني ساكتة ١١٩ - اذا بيتنحى البيطار بيزبط البلد وبينزل الدولار واهالي ضحايا الطيونة والمرفأ بيوصلهم حقهم!

خليني ساكتة

تم النشر في 24 أكتوبر 2021




وين الغلط؟ عادي ما هاي انا كل اسبوع بحكي بحكي وآخر شي بقول خليني ساكتة

يعني ما عم افهم اذا واحد قال الشي ونقيضه ليه بتوقفوا ضده

اذا واحد ما كان بده يكون فساد والباقيين ما خلوه ليه بدكم تتمسخروا عليه

اذا واحد ما بده الا مصلحة البلد والقضاء عليه شو المشكل

خلينا بالمهم مبروك اقرار قانون الانتخابات، آه يمكن مش مبروك، لان الرئيس رده، ورد الرئيس ما بقدم ولا بأخر، مبلى بأخر الاقرار بس مش بالضرورة يغير التفاصيل، هلق ما تفهوه غلط وتفكروا مثلا ما بهون عليه عدم اقرار الكوتا النسائية، او الشوائب المتعددة بالقانون لا ابدا رده لان صهره المعجزة خايف من غيمة سودا ما تخلي المناصرين ينزلوا يحطوا اسمه بالصندوق، انا بقول هو خايف اكتر من شهر الصوم لان اكترية العالم بتصوم عن الكذب وعن ارتكاب افعال بتإذي، فمش معقول يإذوا بلد بكامله بإعادة انتخابه، هلق بكرا اذا خسر الانتخابات بكون القانون الانتخابي ماا خلاه مش انه فقد شعبيته او شي.

هلق انا حكيي هيدا محاولة اغتيال سياسي، وقبل ما قول هالجملة كنت اوليريدي قطعت على ٤ سفارات كبرى واخدت حصتي بس لدمر انجازات جبران باسيل وصيته، هني ذاتهم هول الدول اللي قاطعين الكهربا عن لبنان، وكمان ماشيين بمؤامرة تغريق البلد بالنفايات، على فكرة هيدي قصة النفايات بالبلد ابدا مش مستنضفتها وخصوصي انها اجت دغري بعد احداث الطيونة، بس رئيس اتحادات بلديات الضاحية بالمرصاد عم يهدد سيتي بلو، انهم اذا ما شالوا النفايات رح يشيلها هو؟ طب يعني شو ناطر؟ اذا في امكانية تشيل النفايات لا بدها تهديد ولا مقابلات ولا استعراضات شيلها، الا اذا انكم تعملوا شغلكم عالسكت بأثر على الأصوات بالانتخابات

هالاسبوع صار كتير كتير اشيا وما صار شي، ضجة وصخب وخطابات ومقابلات واتهامات ووعود، وهو بالحقيقة متل لعبة شد الحبل والكباش وكل ما يجي يوقع الفريق التاني عالارض اللي بوجه بيرخي ليطول اللعبة اكتر ويرجع للتوازنات، ويمرق القرارات المدمرة للشعب من دون رد فعل مثلا بيرفعوا تنكة البنزين ٥٠ / ٦٠ الف ضربة وحدة، وبتمرق متل نسمة الهوا العليل الخبرية، مش بس لان الشعب مخدر، ولان فرجوا الشعب انه الشارع ما بيحمل. طب يعني هيدا رفع الدعم الكلي؟ ما في اعلان رسمي كل واحد يفهمها على ذوقه، المهم ما حدا يهدد بالشارع، الشارع اله ارباب

وهول الارباب مسيطرين على كل شي حتى على مجلس الوزرا هلق النكتة وين؟ انهم هني جابوا الحكومة وهني ما عم بروحوا، طب يعني كيف بدنا نكمل حياتنا معكم، يعني عن جد هلق ابنتي ما بتحرد قدكم، كانت هي وصغيرة توقف وتلبط بالارض بدها شي، بعدين كبرت وصارت تعرف انه في شي الها في شي مش الها، طب يا جماعة الخير في شي اختصاص ما بتفهموا فيه؟

عن جد هلق ما بقولوا اعطي خبزك للخباز لو اكل نصه، طب انتو خبراء سلاح ومقاومة وقتال وحاية حدود وتفكيك الغام معنوية وسياسية وارهابية، طب ما في احتمال ولو ضئيل انكم ما بتفهموا بالقضاء؟ يعني مثلا مع القضاء الدولي شفناكم ما قلعتوا ولا مع القضاء المحلي الجزائي مقلعين ولا مع القضاء العدلي طب يعني مثلا فينا نحكي كلمتين لنحدد مكمن الخلل؟ بلكي القضاء مش شغلتكم بلكي او ما في خلل هلق القضاء العسكري معكم والعدلي ضدكم.. بعرف انه الهدف تطيير التحقيقين par elimination بس انا شخصيا برأيي التحقيقين محلولين الاول يتفضلوا المدعى عليهم يمثلوا قدام القاضي متل ما لازم يصير حتى لو كنا بغابة كان اذا صار محاكمة بده المدعى عليه يمثل قدام ملك الغابة، وبموضوع الطيونة محلول كل افرقاء النزاع واولياء الدم وزعماء الاحزاب اللي كانت عالارض بيتفضلوا بينزلوا بيدلوا بافاداتهم..

ونحن بكل طيب خاطر مع محاكمتكم كلكم يعني كلكم وكل واحد بيطلع بريء بفل ومنعترف له..

بعرف اللي عم قوله مؤامرة خارجية وعمالة وتدخل بعمل القضاء بس انه شو بفرق عم غيري من المرشد الاعلى المحلي وصولا لخالد الضاهر بعكار.. المهم خلص الاسبوع لا عارفين اذا في حكومة بعد ولا اذا في تحقيق ولا اذا في محقق ولا اذا في استدعاءات هيدا على صعيد القضاء وحده

وبما انه رفع الدعم حاصل بس ما تم الاعلان عنه، بيوقف بالصف دغري ورا البطاقة التمويلية هيدي اللي تم الاعلان عنها بس مش حاصلة، وبلاقيهم على المفرق غلاء المازوت طب اللي مستورد فهمنا انه عم يغلى بغلا الدولار بس المازوت الايراني ما ع اساس اجا مرة او مرتين وهيدا لا عليك جمرك ولا عليه ضريبة وانشرى على اساس باللبناني او بالقليلة غير خاضع لسعر السوق على اي اساس عم يغلى، هلق انا شو بفهمني اصلا انا حكيي كله مؤامرات وتجييش ضد هالسلطة الحاكمة والحاكم بأمرها

نحن عنا حاكمين واحد بامر السلطة اي المرشد الاعلى المحلي والحاكم بأمر الليرة اي كبير اللصوص، هيدا اللي رايح يفاوض صندوق النقد الدولي، رايحين وفد بس كل قرطة معهم ارقام، وكله رايح يفاوض ليجيب ٢ مليار دولار وهول منقبضهم يمكن قبل الانتخابات يمكن بعد الانتخابات، ليه في انتخابات اي يمكن تصير ويمكن ما تصير.. يمكن اضمن اذا الحاكم بأمر الليرة بفاوض نظيره الحاكم بأمر السلطة وبياخد منه هالمليارين، يعني اذا اخدوا ال ١٠٠ الف مقاتل annee sabatique وحدة ويتبرعوا لنا بمعاشاتهم بينقذوا البلد اللي عم يحاربوا اصلا ليتنقذوه

على فكرة ترسيم الحدود ماشي على قدم وساق وهيدا شأن الدولة بصرف النظر عن جنسية اللي عم يستقبلوه ويتباحثوا معه وأخيرا هالدولة اخدت فرصتها بشي، على امل انها تكون عند حسن ظن المرشد المحلي او رح يضطر يتدخل.

على الهامش قال ممكن المطار ما بقى يفتح بالليل بسبب نقص المراقبين الجويين والتعيينات بدها مجلس وزرا ومجلس الوزرا بده الثنائي الشيعي والثنائي الشيعي معتكف اعتكاف غير معلن والاتحاد العمالي العام بده يتظاهر والعمال بدها زودة ومصاري مافي

واهالي الضحايا بعد بدهم الحقيقة والحقيقة عند التحقيق والتحقيق مسيس، واهالي الطيونة بدهم الحقيقة والحقيقة عند التحقيق والتحقيق تسيت، ومين اجا قبل الصوص او الدجاجة؟

ان شاء الله موت اذا عم كذب الشي الوحيد اللي بدي اعرف جوابه انه هلق اذا بيتنحى البيطار بيزبط البلد وبينزل الدولار واهالي ضحايا الطيونة بيوصلهم حقهم؟ وبيبقى مطلوب محاسبة القوات على الي صار بالطيونة او صافي يا لبن؟ وتحقيق بطير تحقيق؟ على كل حال اللي بيقبل على عقله وضميره انه يقسم اهالي جمعتهم مصيبة متل جريمة المرفأ ممكن يقبل اي شي لحساباته السياسية خليني ساكتة