خليني ساكتة ١٢٥ - استقالة.. فاتصال.. فمبادرة.. فهل يسمح المرشد الاعلى بانعقاد مجلس الوزراء؟!

خليني ساكتة

تم النشر في 5 ديسمبر 2021



بأسف انه يكون الخبر الوحيد اللي الواحد بده يعلق عليه او ينطلق منه هو استقالة القرداحي

حقيقة ما هو دليل الا على مدى الافلاس اللي وصلناله بهالبلد،

اذا بده يكون في تعريف لعصر الانحطاط ممكن ننقي اي مشهد من مشاهد لبنان على اي صعيد من الصعد ونقدمه نموذج

ما في اسوأ من القرداحي واستقالته، الا التعليق عليها من قبل السلطة المعارضة والسلطة الموالية، لأن كتير مضحك بس يطلعوا جماعة تيار المستقبل او الاشتراكية او القوات ويدلوا بدلوهم بالموضوع.. انه هالقرط السياسية صارت عايشة لتعمل ردة فعل على اللي بحكوا زلم السلطة من الثنائي الشيعي والتيار الوطني الحر والقومي وغيرهم من الحاكمين الحقيقيين.. بيجي بين المعسكرين المعسكر التالت أو الثوار والناشطين، اللي عم يتحولوا كل يوم بعد يوم لغوغل محاولات شرح متتالية للشعب عن السلطة الموالية والمعارضة وكيف عم تحاول تاكلهم راسهم وكيف هني وجهين لعملة وحدة بتدمير البلد ومسؤولين عن الانهيار ولو بدرجات متفاوتة.

هيدا الخبر غير المهم لا شكلا ولا مضمونا، بذكرنا حقيقة بكل شي بالبلد، هو متل عجقة السير اللي بتعلق فيها ساعة لا بتعرف شو سببها ولا شو سبب فتح السير، ومن بعدها بتبطل عارف حالك شو مضايقك اكتر انه ضاع ساعة بلا ما تعرف ليه، او انه فتح السير بلا ما تفهم شو كان المشكل.

البلد بيتعطل ٩ اشهر ليجييوا رئيس حكومة، شو ما كان اسمه، لا منعرف ليه تعطل ولا على اي اساس تشكلت ولا ليه رجعت تعطلت ولا شو النفع بإنها ترجع تجتمع.

متلها متل كرسي الرئاسي اللي بيبقى فاضي سنتين ونص وبس يملى لا بتعرف كيف ملي ولا شو وزن اللي ملاه ولا حتى شو رح تفرق اذا رجع فضي

بونابارت لبنان استقال والتاريخ رح يذكر بس يتصالحوا المتحاربين انه في رجل من لبنان طالب بوقف الحرب العبثية، والاهم بحسب رئيس حكومة البدل عن ضايع انه الاستقالة من ٣ تشرين التاني يعني كان ناوي يستقيل من زمان، بس هو كرامته ما كانت سامحتله، النية كانت ماشية بخط والكرامة بخط تاني، الكرامة كانت لاحقة السيادة، بس التقت الكرامة مع السيادة سمح لنفسه بونابارت انه يستقيل، ليه بعد شهرين ولشو استقال ولشو كرامته نقحت عليه بالسابق وهلق سمحت له كمان ما منعرف، وفجأة صار حريص على اللبنانيين واهلنا بالخليج

على الهامش الوضع الاقتصادي دمار شامل، بس الرئيس وحرصا على السنة الاخيرة من العهد راح على قطر، لانه multitasked person حضر افتتاح كاس العرب ودعا امير قطر يدعي رجال الاعمال القطريين ينزلوا يستثمروا بلبنان.. طب والله معك حق نحن بحاجة لاستثمارات بس فينا مثلا بس ندعي العالم يجوا يستثمروا نعرض عليهم شي غير الكهربا؟ يعني اي شي تعا نعرض عليهم شي موجود منه يستثمروا فيه بالزبالة مثلا، او اذا بدك يستثمروا بالعزة والكرامة.. بس كهربا؟

واللي بعده عم يشكك بأهمية الرئيس ووضوح الرؤية عنده وقوة عهده، بدكم تعرفوا ليه استقال نابليون لبنان؟ (عون ساكت بالمقابلة) اي اي تحديدا صمته هدّار بس بقي ساكت عرفوا الجماعة انه فاض الكيل ولا بد من التحرك السريع.

هلق بونابارت لبنان ما فل من دون اي انجازات، بصفته وزير اعلام هنأ نقيب المحرريين بفوزه هو لائحته بانتخابات النقابة، هيدي النقابة اللي من سنوات ما بتفتح جدول الانتساب للصحافيين الجدد مريحة راسها ساحبة فتيل المنافسة جواتها. بس للاسف فل بحرقة قلب وانه المحطات الاعلامية ما استجابة بتصوير البلد بخانة المشع.

خبر استقالة بونابارت لبنان، متله متل خبر تشكيل الحكومة، متله متل خبر تعطيل الحكومة، متله متل اي خبر لا رح يقدم ولا يأخر بالواقع المأساوي، وهيدا ان بي اس اتصل هو وماكرون بالميقاتي، وعملوا مبادرة فرنسية - سعودية، يللا هيت لنشوف اي متى رح ينعقد مجلس الوزراء؟ اي متى رح تجتمعوا؟ بما انه تطرقوا بن سلمان وماكرون للملف النووي الايراني كيف رح يقرا المرشد الاعلى المبادرة، وبكرا شو رح يطلق عليها مؤامرة عالمية؟ اقليمية؟ استوائية؟ ارض - جوية؟ اوروبية اطلنتيكية؟ وهلق شو الميقاتي؟ زلمة مين وينه رئيس السيلفي والبلد خلفي يا دلي ما ع اساس انه اميركي صهيو ماسوني فرنسي مدعم بالطعم العربي الخليجي، انه هيك فجأة بطل حدا يذكر حتى انه موجود وكله صار داعم الميقاتي.. على كل حال اللي بعد ما حزر البلد اللي معطله مش السعودية، ولا هو محاصر من الخارج، عادي البلد اللي معطله الحاكم بأمر السلطة اي المرشد الاعلى المحلي، واوامره واضحة لوزراؤه لا اجتماعات قبل تنحية البيطار.. السيناريو الاول بقول انه استقالة الاسكندر المقدوني هيدية مفعمة بالكرامة والسيادة لماكرون والسيناريو التاني انها جزء من الاتفاق الكبير اللي بيجي وراه اقرار محاكمة الوزراء والرؤوساء قدام مجلس النواب.. وسيناريو تالت انها تمريرة قبل ما يقبله طعن جبران باسيل ضد الطقس.. شو قولكم رح يلحقها في شي خصه بأحداث الطيونة؟ لا لا هيدي الاحداث تفصيل منستخدمه بحسب الحاجة، متل اذا اضطررينا نلغي الانتخابات او نمدد للرئيس.. بجميع الحالات وشو ما كانت السيناريوهات ما هي الا دليل غير قابل للشك بمدى انحلال هالسلطة اخلاقيا واقتصاديا ومهنيا وكل ما ينطبق عليها

ان شاء الله موت اذا عم كذب بس لفت لي نظري باستقالة الامير فخر الدين مش بس انه رجل من لبنان طالب بانهاء حرب عبثية، لا بس كمان بإنه عنده حلفاء وحلفاؤه اعتبروه اكبر من المناصب، وباعونا بيعة جديدة من الالقاب والمواقف اغدقت علينا مواصفات فرخ زعيم جديد.. للأمانة ضميري عم يأنبني اني عم خليكم تحضروا حلقة كاملة محورها شي هلقد فاشل.. خليني ساكتة