خليني ساكتة ١٨٥ - عويدات عم يقبع تحقيق المرفأ بانقلاب قضائي.. وباسيل عم يهددنا بالترشح!

في مدعى عليه بتفجير المرفأ أطلق سراح موقوفين بنفس التفجير وإجا عالعدلية بحماية جهاز أمن رئيسه مدعى عليه بتفجير المرفأ، وطلب من مدعى عليه آخر بذات التفجير انه يمنع سفر القاضي اللي مدعي عليهم كلهم بجرم تفجير المرفأ

قاضي تنحى عن قضية لإن في واحد بيقربه مشتبه فيه ومدعى عليه بالقضية، بس صار القاضي شخصيا مدعى عليه قرر يرجع عالقضية،

قاضي ما خصه بالتحقيق قرر يطلق سراح كل الموقوفين اللي اصلا مش من حقه يتركهم، بس لإنه بكل بساطة بمون عالنيابة العامة تنفذ قراره، وبيقدر يمنعها تنفذ قرارات القاضي المعني بالقضية.

اهالي الضحايا اللي كل كم يوم بيرجعوا بحسوا انه اولادهم انقتلوا من جديد من ورا تنكيل السلطة بملف المرفأ نزلوا يعترضوا، على قرارات غسان عويدات، ونزل كم نايب يوقفوا معهم اكلوا اتلة من مرافقين ما بيعرف وزير العدل مين هني مع انهم مرافقينه، وفاتوا المحامين يعترضوا تم اعتقالهم..

هيدا كله مش افتراضات لسيناريو كوميدي سودا لواقع القضاء، هيدا بالتحديد

انقلاب قضائي نُفِذ بكل سلاسة، هيدا باختصار قمع، اعتداء، تسلط عالقضاء، تعطيل المؤسسات، وفساد مستشري كلها مفاتيح ديكتاتوريات بمحلها لإعلان الدولة البوليسية احكام قبضتها على رقابنا.

بس هو الحق عالاميركان، تحديدا السفارة الاميركية، اللي هددت وقالت لهم منسحب قلبكم اذا بتطبقوا القانون، بدنا هيدا اللبناني الاميركي اللي معتقلينه عندكم او منحط عليكم عقوبات، ولانكم نضاف الكف وضميركم مرتاح وما في شي تخافوا منه رضختوا..

ما عم اقدر بقى افهم شو هالعلاقة بين الاميركان والممانعة، امريكا بتأمر بيتحرر الفاخوري، اميركا بتأمر مدعي عام العزة بيفرج عن الموقوفين كلهم، وأمن عام الكرامة بودعه عالمطار.. بس اخر شي بيطلع انا اللي عم نفذ الاجندات الاميركية لاني عم بعتقد الوضع بالبلد..

صعب كتير تلعب بالقانون مع سلطة، ما بتعرف شو يعني قوانين، التعليق على مشهد العصفورية القضائية اللي صار اقرب للما يكون توم بتوم اند جيري راكض وبيجي حدا بيصفقه مقلاية بنص وجه بيبقى راسه عم برن من الضربة.

حقيقة اللي صار بخلي الواحد يحس بفقدان التوازن، بده وقت ليلملم حاله من الصدمة، الصدمة مش بإنه هيدي السلطة مجرمة، لا نحن منعرف انها مجرمة، الصدمة من ليفيل الوقاحة لوين وصل، نحن معودين عليكم بالاغتيالات انتو ومخبيين وجوهكم متل خفافيش الليل ولو جرائمكم بترتكبوها بالنهارات، بس هيدا الاغتيال للقضاء ولتحقيق المرفأ ارتكبتوه بوجوه مكشوفة، لان ما بقى في شي يردعكم، لانكم تستطيعون.

من اصعب المهمات بظروف متل هيدي، تكون عم تسأل هلق شو بده يصير؟ لان المفترض انه القانون هو يكون معروف وواضح ورادع، طب لما بكون المجرم هو واضع القانون وهو مطبق القانون وهو خارق القانون، كيف بدنا نتصرف؟ كضحايا وأهالي ضحايا حاليين أو محتملين؟

القضاء ما انتحر، القضاء يُنتحر، انتو عم تنتحروه، عم تهدوا آخر أعمدة الهيكل، يعني بيقدر الواحد يعمل فيكم فيديو بعنوان كيق تدمر وطن ب ٣٠ خطوة بسيطة.

من المفترض إنه العدالة والمؤسسات أساس بناء البلدان، نحن السلطة التنفيذية بحكم تصريف اعمال، السلطة التشريعية حاطة كل مجهودها كيف تفشل طلب دستوري لنواب معتصمين لانتخاب رئيس، وهلق صارت السلطة القضائية تحت المقصلة.. والجماهير مقسومة.

المهللين لغسان عويدات وارتكاباته كتير كتار، انا بفهم كتير منيح السلطة وازلامها وابواقها تهلل لغسان عويدات واللي عمله، بس اللي ما عم اقدر استوعبه هو الشعب، عامة الشعب كيف قادرة تهلل ضد استكمال تحقيق بجريمة متل تفجير مرفأ بيروت.

اول ما طلّع القاضي بيطار قراراته، وانه راجع عالتحقيق ما لقي الخط الممانع الا الجنون يتهمه فيه، وبلشت ابواقه تحكي عن جنون البيطار وانه بده يوصل البلد لحرب اهلية، وصلت ببدر الجاهلية يوضف البيطار بإنه بوسطة عين الرمانة… والثنائي معتبرين انه عنده وظيفة تخريبية، وتحذيرات من تحويل بيروت لأم الشوارع بدل الشرائع، انه على القافية هيديهو وضع أصلا بيحمل سجع وجناس ونحو وصرف.. بس من الضروري نفهم ليه مشكل بين قاضيين بده يحمل بطياته تهويل من حرب أهلية؟ إنه البلد مقسوم طائفيا ومناطقيا وشوارعيا وهلق صار مقسوم قضائيا؟ هلق معروف انه العادلية فيها جزر تابعة لأخزاب وسياسيين بس بدكم تفهمونا مثلا انه عويدات عنده ميليشيا عالسطح وبيطار عنده ميليشيا عالمفرق وممكن بأي لحظة يهجموا ع بعض؟ وفي هيدا النوع التالت اللي بده يبقى ماسك الحبل بالنص، انه اي الاتنين خرقوا القانون بس عويدات خرقوا أكتر، هول جماعة ما حدا يزعل مني، خلص الاتنين مغلطين وتعوا by elimination ننسى اللي صار

على الهامش البطريرك الراعي كان نجم استقبل وودع هيدا الاسبوع تعشى مع الصهر المعجزة وتغدى مع سليمان بيك وشرب قهوة مع سوبرمان لبنان.. كل الشخصيات اللي استقبلها البطريرك اكدت على اهمية انتخاب رئيس جمهورية وضرورة الحفاظ على الوحدة الوطنية.. والارجح الارجح يكونوا اثنوا على اهمية القوانين ودوره بتحقيق العدالة… والبطريرك عم يلعبها استراتيجية وتكتيك كمان بيستقبل اللي حامي بدري ضاهر واللي حامي يوسف فينيانوس واللي حامي نفسه، بس بيطلع بعظة الاحد بيطلب من القاضي بيطار يكمل التحقيق ويطلع القرار الظني.. طب نيافتك سؤال باستقبالاتك طلبت من ضيوفك انهم يتعاونوا مع التحقيق ويدفشوا لتحقيق العدالة، ويوضعوا كل اللي حاميينهم تحت سقف القانون؟ او ما صار في مجال؟

قبل ما اختم باسيل يلوِّح بالترشح لرئاسة الجمهورية، منيح انك عارف حالك تهديد للكيان اللبناني، وقال انه في ناس ناطرين يشمتوا فيه وبحزب العزة والكرامة اذا انفصلوا، لا للامانة مش ناطرين نشمت نحن اصلا شمتانين لإنكم متحالفين لانكم طنجرة ولقت غطاها.. نحن بس خايفين على حالنا منكم لانكم حلف حارق خارق متفجر.. مهضوم جي بي قال المنظومة عم بتدمر لبنان، هو بصفته رف يشتغل، شفتوه راح حضر ٣/٤ مباريات بالمونديال صار قطر شريك بالغازات.. خليني ساكتة