!خليني ساكتة (٨) - "كلن يعني كلن ونصرالله واحد منن"

خليني ساكتة

تم النشر في 20 أكتوبر 2019


تفاجأتوا؟ فاجأكم الشعب انه تحرك؟

كرمال شو؟؟؟ ٢٠ سنت باليوم؟ غريب والله هالشعب صاير ما ابخله

انقطاع البنزين ما حركه وغلاء المعيشة ما حركه بس واتساب كول ولّعه؟

لاااا يا حبيباتي غلطانين كتير، اللي حركه بشكل حقيقي هو انه شلش الحياء عندكن انقطع

يعني الامور واصلة أنكم حتى مش قادرين تنتبهوا انه الشعب اذا في ذرة كرامة ما بقى يقدر يسكت لكم

حطوا حالكم محلنا، وزيرين متل قلب النهار، مشتبه فيهما بانهم ورا صفقة مشبوهة أدت لشراء عقار على الأقل ب ٧٥ مليون دولار، بينطلبوا للتحقيق بيرفضوا يمثلوا قدام القاضي،

علما انه هني من جماعة محبي الحياة، وبدل ما تستحوا وتلبدوا للعالم تنساكم، لا بيطلع الاول فيكم بيعلن انه بدكن تسحبوا مصاري لصالح نفس القطاع اللي متورطين فيه قال شو بدكم تعملونا متل باقي دول العالم

طب هالشعب قال هيك وهيك بدكم تعملونا متل باقي دول العالم هيت لنطالب بشو في عادة بدول العالم كهربا ومي وطبابة وتعليم وقلة فساد وحريات واحترام لرأي البشر وقلة استهتار بحياة العالم

هيدا التحرك معاليكم وسعادتكم وفخامتكم مش رمانة هيدا قلوب مليانة مليانة مآسي وتعب وقرف من وضع ما مبين له باب ضو والدليل العالم ما عم بتخاف لا من القنابل المسيلة للدموع ولا من الرصاص

لان شو بعد بدنا نخسر يعني نحن عامة الشعب شو رح نخسر اكتر؟ اصلا شو عنّا نخسره؟ اذا خسرانين مستقبل اولادنا غير خساراتنا المتتالية

هلق اهم شي هالمرة طال اسماءكم وصوركم عم تتهاجم بعقر داركم حتى رصاصكم ما عم بخوف جزء كبير من جماهيركم عم يصرخوا ، عم يقولولكم انهم ما عم بخونكم بس هالمرة عم يذكروكم انكم انتم خنتوهم

خنتوهم بس صوتوا مع الضرايب الجديدة خنتوهم بس حملتوهم بعد مرة فشلكم وفسادكم وقلة تدبيركم وسوء إداراتكم وتقديم مصالحكم للمرة المية الف على مصالحهم

شغب وحرق واعتداء عالاملاك العامة، هيدي ردة فعل مش مقبولة بس ردة فعل ردة فعل على الاعتداء على الحياة الخاصة بشكل يومي منرجع لردة فعل الشعب المحروق اللي شاف بعيونه أنكم ما نطرتوه ليوعى من حريق بلده جبتوا تكووه بالضرائب هددتوه تجرفوه تخرسوه تكتموه قام وصرخ وعبر وطالب

خلينا فيكن انتو بأنواعكم كمسؤولين بالتعامل مع الأزمات ومع اي حراك عالارض هيك فجأة كل واحد فيكم بياخد دور

هيدي المرة اخد دور

- اللي ما عارف مين بده يرضي متل الشيخ سعد عارفها مش راكبة وانها ما بقى تركب بس عم يكابر، لا عارف اذا لازم يستقيل ولا عارف اذا لازم يبقى على كل حال الشعب صار منتبه انه استقالته لحاله ما بتعني شي

- المتعاطف مع نفسه الوزير محمد شقير انه هو ما خصه اول شي نفى اللي قاله الجراح وأكد انه ما رح يقبل باي ضريبة عالمواطن رجع قال انه كل اللي بالجلسة وافقوا عالاقتراح وعدد حزب الله وحركة أمل والتيار والاشتراكي ورجع بالآخر قال خلص ما بقى في زودة بطلب من الرئيس الحريري ما هيك هي لعبة لعبتك لعبتك بطلتك بطلتك

- المتعاطف مع الشعب عالشاشة ومع حزبه بالحقيقة هون صراحة هيدا الدور مع ان الكل بيلعبه بس بيلبق اكتر شي نواب حزب الله مثلا النائب حسن فضل الله اللي مرق على وعده بفتح الملفات اللي بتطير رؤوس كبيرة عمر هلق للاسف اذا صح احتراق ملفات بوزارة المالية بكون نخبز بالافراح

- اللي عايش denial ببين من تلفزيونهم الدنيا ولعانة وتينا لطيفة عم تطبخ لنا ما نحن شعب جوعان هلق مين جوعنا تفصيل المهم انه نحن جوعانين، كانوا واعدينا انه اذا حسه في ضرورة يعزمونا عالتظاهر تحت شعار نفذ بس ساقبت نحن شعب ضايق خلقه ما يحب النطرة قال بدي ثور لحالي

هني ذاتهم هول مع اعتبروا انه التظاهرة بتخدمهم الهم بس يجب تصحيح الشعار وقلبه لنفذ يا حبيبي وين عايش انت؟ يمكن افضل تروح عاليخت تستجم مع زميلك بالكتلة

- المعارض المتحالف مع طائفته (وئام وهاب) هيدا يعني اللي بينطبق عليه مثل انا وابن عمي عالغريب دغري دافع عن الوزير اكرم شهيب وحوله لشهيد حي رجع بعد شوي انتبه وبلش يطالب بانتخابات مبكرة قال بلكي هالمرة البيك بيترك له المقعد اله بدل إرسلان او الحزب بيحسبوا حسابه

- اللي ناطر رأي الزعيم الأكبر منه ليعرف شو بده يقول (حدا متل كرامي) هولي كتير مهضومين انه حتى وزير ما عندهم بس بيطلبوا باستقالة الوزير المحسوب عليهم بيرجع بطالب الشعب بضبط النفس بتابع تصريحات اللي اكبر منه وبغير موقف على اساسها هلق وبلوح جوا جوا أحلام بتدغدغ مشاعره بلكي نقشت وما بقي غيره واجت رئيس حكومة

- اللهم اني بلغت هيدا الرئيس بري وجماعته ما خصهم معترين قادة حركة المحرومين يحذروا من الفساد ليل نهار حماة الدار وبيضة القبان المعتدلة بالثنائية الشيعية درجة اعتدالها تقريبا ٥١٪؜ غير هجمات الكر والفر عالمتظاهرين

- اللي ببين ع حقيقته (اكرم شهيب) بيتظاهر قبل بيوم كرمال الحريات وبينبح صوته وبيعترض على الجرف وتاني يوم بصفته وزير تربية مرافقينه بيحملوا سلاح عالعالم وبقوصه لان ابنته خريجة الـ اي يو بي معه بالسيارة بفهمك معاليك كلنا منخاف على اولادنا حتى نحن الشعب الرتش اللي درسنا بالجامعة اللبنانية وعم نبق الدم لندرس اولادنا هول اللي حطيت لهم كاميرات تراقبهم بالامتحانات الرسمية شفت الكارما الكاميرات فرجت تحديدا شو صار معك

-وفي هيدا اللي عيني فيها وتفو عليها (جعجع) بينصح بوزع مواقف يطالب بالمحاسبة بس ولا مرة بيستقيل ودايما بلاقي طريقة لتدوير الزوايا انه البلد بخطر وما فينا نتركه ودايما بيتشاور مع الحلفاء اللي هني ذاتهم اصلا متهمين بالفساد ويلاقي دايما دايما حل وسط مع انهم بشكل عام يعني دايما براعوا مشاعر غيره على حسابه اله

- اللي ناطر دوره (المشنوق) هيدا عادة بتخونه الذاكرة ببطل عارف حاله مع مين عم يحكي بيعتمد على ال gold fish memory انه اللبناني بسامح وقلبه كبير وزهق من الطبقة الحاكمة هيك بقدرة قادر بينسى انه هو كمان جزء من الطبقة الحاكمة وانه يكون نائب بس مش وزير او وزير بس مش رئيس وزارة ما بيعفيه من المسوؤولية

-الحنون وليد جنبلاط دايما قلبه عالبلد ما بيعرف شي عن الاقطاع او التوريث السياسي  

- اللي عم يدعي لدرء المؤامرة (ما ادراك ما المؤامرة) هيدي إجمالًا بتجي اميركية صهيونية بترودولارية حاطة حطاتنا ما شايفة غيرنا هول اهم شي تحذيراتهم من انه حدا يخطف الثورة ويحولها عن مسارها