خليني ساكتة (٣٠) - كورونا، جراد، خبز ودولار... كنا بدنا نحلها بس "ما خلونا"!

خليني ساكتة

تم النشر في 24 فبراير 2020


مجلس الوزراء رح ينعقد لبحث التدابير والإجراءات الوقائية ل كورونا لشو العجلة اصلا، الطيارات فايتة ضاهرة عالمطار شي من ايران شي من ايطاليا بس عادي اصلا يعني شو بده يعمل كورونا فينا

نحن عاملين بدل الدورة دورات

مطمر الكوستا برافا

مطمر برج حمود

مطمر الناعمة

نهر الليطاني

خبرة امراض سرطانية وغسيل كلى شو يعني كورونا اصلا بالنسبة النا

اصلا شو فينا نقول اذا فتحنا تمنا بتقولوا اننا عم نسيس الموضوع

ولك خلص اهلا وسهلا

نحن فداكم مين ما بتحبوا تجيبوا جيبوا

على قلبنا بدنا نقعدكم تعوا من وين ما بدكم بالعالم

شو وقفت على الجراِثيم التنفسية ما انتم ما خليتوا جرثومة بالعالم ما فوتوها علينا

بس انا مطمنة لان الجلسة رح تنقعقذ بالقصر الجمهوري تحت عيون بي الكل الساهرة

اصلا بعد ولا جلسة انعقدت مش برئاسته ما بقى بده يترك مجال لشي يقطع من دون رقابته

انبسطوا في خبرية انه الدولار راجع عل اي تي ام بس ضمن ال limit يعني شي ٢٠٠$ بالاسبوعين يعني الشي الوحيد اللي رح يتغير عليكم انه ما في حدا تتخانقوا معه اكتر شي رح تصرخوا عالآي تي ام

هلق المصارف معتبرين حالهم ضحايا من الصرافين وعامة الشعب، يعني اخبار من نوع مافيا بين المصارف والسياسيين والصرافين ما بدنا هيدا اصلا بهدد الامن القومي

ومن هيك التورية ضرورية بالاخبار، المصارف حريصين ع صورتهم مش متل القرض الحسن على عينك يا تاجر هيدا طلع اذكى من كل هالمصارف، ذهب مقابيل الكاش وبحاسب العالم على سعر السوق علما بإنه القييمين عليه وعرابينه قلبهن عالعالم مش بس مطمنين على حالهم وانما شاغل بالهم حالة عامة الشعب اللي عايشين معهم عالاراضي اللبنانية

في حدا تاني منتبه لاهمية الذهب هو زوجها لوزيرة الدفاع عم يذكرنا ليه ما منبلش نبيع الذهب اللي نيويورك اي على اساس لازم اذا طلع بإيدنا وقدرنا نخلعكم كلكم من حياتنا لازم ما تكونوا خليتولنا باب ضو نستترزق منه او نرجع نوقف ع اجرينا

بس في انفراجات حتى بالدين العام والعهد وابواقه مصرين على استرجاع اموال المنهوبة والمهربة من ايام فخر الدين

شو دولار ما دولار المهم الكل صار معارضة، انا ما فهمت تحديدا المعارضين عم يعارضوا حسان دياب وحكومته او عم يعارضوا بعضهم وهني وبرا؟


شعار ما خلونا عم يتمدد وينتشر بشكل اسرع من انتشار كورونا

طلع الشيخ سعد كل شغله معطل لإن ما خلونا

جبران زعلان لان ما حقق ولا انجاز هو وتياره لان ما خلوهم

حزب الله ما قادر ينأى بنفسه لان ما خلونا

القوات اضطروا يحضروا جلسة الثقة لان ما خلونا

الحركة ولو وزارة المالية بايدهم منذ شبه الازل حاولوا يصلحوا الهندسات المالية بس ما خلونا

الاشتراكي جرب يوقف بوج الفساد بس ما خلونا

كمان كان بدنا نتظاهر ضد الاموال المنهوبة ما خلونا

كنا بدنا نفرجيهم رخصة العمار على صخور نهر الكلب الاثرية ما خلونا

ونحن كنا بدنا نعرف شو طلع لغطاس خوري مقابيل الرخصة بس ما خلونا

كنا بدنا نعمل اجراءات احترازية بالمطار بتليق بدول العالم ما خلونا

كنا بدنا ما نوصل الدين العام لـ ٨٣ مليار دولار ما خلونا

كنا بدنا ندفع اليوروبوندز ما خلونا

كنا بدنا نوقف الصرافين عند حدهم ما خلونا

كنا بدنا نأمن ادنى حقوق المواطن بس ما خلونا

كنا مع حرية التعبير بس ما خلونا

مبروك اضراب الخبز انفك نزولا عند تمني ورغبة الرئيس بري، مش مهم ليه ما تمنى قبل ما تطلع الصرخة، المهم انه تمنى وغرقنا بمحبته

بس اصلا انتم كنتم فهمانين الموضوع غلط هني ما كانوا بدهم يجوعونا هني سمعوا الجراد جايي قالوا منشيل الخبز من الدرب

اصلا بكرا اكتر شي اذا وصل الجراد بيرجع عند اهله وبقل لهم بلبنان ما خلونا

الجراد انواع ع كل حال نوع بياكل الاخضر

نوع بياكل اليابس

وفي نوع بياكل الاخضر واليابس وبمسح تمه وبقول ما خلونا

هيدا النوع ممكن يجيب جراد ظل ويحمله مسؤولية التعويض عن كل شي اكله من قبل...

ان شاء موت اذا عم كذب بس نحن بدنا نبعت اولادنا عالمدرسة نحن ومطمنين بس ما عم تخلونا

بدنا نعيش ونطمن على حاضرنا ومستقبلنا بس ما عم تخلونا

بدنا يكون عنا ادنى حقوق المواطن والانسان بس ما عم تخلونا

بدنا نوثق فيكم بس ما عم تخلونا بدنا نعطيكم فرصة ما عم تخلونا

بين ما خلوكم وما خلونا وما عم تخلونا... انا

خليني ساكتة