خليني ساكتة (٣٤) - شكراً إلنا طالما تبرعتوا من كيسنا !

خليني ساكتة

تم النشر في 23 مارس 2020



يعني يمكن منيح اجا كورونا لنعرف انه مش اسوأ شي بالدنيا انك تكون مواطن لبناني

هو الإنسان بحاجة لشي بهالحجم ليهزه حتى يعيد النظر بالأولويات

يعني شو هلق قصة الأموال المنهوبة قدام الصحة؟

يا عمي على سيرة الصحة، طلعتوا مش بس أنكم مش مأمنين لنا كهربا لا وكمان مش مأمنين لنا معدات طبية كافية

ما تصدقوا مش يعني انا مثلا كنت مفكرة إنكم لا سمح الله مثلا تاركين شي قطاع مش مقصرين فيه

انا بدي حيي الحكومة الحالية، اي انا جماعة كلن يعني كلن بكل وضوح وصراحة بدي وجه تحية للحكومة اللي ما استلمت شي ولا حتى skeleton بلد وعم تحاول تشتغل بشو تركتولها واللي هو ما شي، لا وكمان الكم عين تنتقدوها وتنظروا عليها واحد عم يوزع Hand sanitizer والتاني صابون بلدي والتالت عم يغرد يقبرني بالتوجيهات أعلنوا حال الطوارئ سكروا المناطق ممنوع هيك مسموح هيك وكإنه وقت كان بالحكم كان مغرقنا مشاريع وبنى تحتية ومساعدات وديون وفساد اه هول غير شي

خلينا بالتفاؤل البرامج التلفزيونية لا سيما تبع الطبيلة عملوا حملات تبرعات هيك بظاهرها بتبين تبرعات لكورونا وصالح المجتمع بس لسبب من الأسباب بتحسنها اكتر ميالة على fairy هيدا تبع تلميع الجلي كل ما دق سياسي او مصرفي وتبرع يعني شو بدي قل لكم وكأنه هو يا حرام عم يشيل اللقمة من تمه، يعني اسماء المتبرعين بتشرح القلب حتى متعهد الأخضر واليابس تبرع لنا

ما يا حبيبي انتو خاصة اللي بعد ما سمعنا أنكم فتحتوا كيسكم حطوا على عينا تبرعولنا اعتبروها فوائد الأموال المنهوبة اعطونا جزء منا لنأمن حالنا من المرض ومسامح بالباقي

اهضم شي العالم اللي أصروا يتبرعوا للصليب الأحمر لان بحملة وزارة المالية بكل بساطة لا ثقة معليه معاليك ما تاخدها شخصية بس انت بتعرف اللي محروق من الشوربة بنفخ عاللبن وكلنا منعرف يعني انتم كحكومة مين جايبكم ما حلنا ننسى

بالحكي عن التبرعات تذكرت لما الشعب اللبناني فردًا فردًا قبل كورونا تمنى يكون اسمه كانديس، وينك يا كانديس اليوم تجي تشوفي شو صاير فينا

القعدة بالبيت مكلفة خصوصا بظل بلد مفلس ما بيقدر يعطي الحد الأدنى من التقديمات، بلد ما عم يكون على اصحاب المصارف يفتحوا ليشحدوا العالم مصرياتها

ولكنها ضرورية لان فعلا نحن عايشين بشي اقرب لحمام مقطوعة ميته او لحارة كل مين ايده اله

عزل القرى والمناطق يا متعلمين يا اولاد المدارس ما بيحمل مزايدات ولا هو لعبة من ألعابكن الطائفية المجوية والوسخة

عزل المناطق عم بصير بأرقى دول العالم

بس مش متل ما شافت شعلة ذكا المجلس والشرق الأوسط عزل مستشفيات لان طرابلس ما بتحمل وما بيتذكروها الا بالمصايب، نحن اكتر عالم منعرف وضع طرابلس اللي فيها من سياسيين عفوًا من مصايب بيكفيها

هلق اذا وضع البلد المزري وانعدام القدرة على استقبال المرضى ومعالجتهم ما قنعكم تبقوا بالبيت تذكروا الحكيم ٤٤١٦ يوم قضى بالسجن

وزير الصحة الله يعينه ما بقى عم يعرف يلاقي مفردات يستعملها من خفت نسبة التفاؤل للانتشار الجماعي دفعة وحدة بتحسوا عم يلعب roulette يا رب تجي فعينه

وضع كورونا كله سهل بالقليلة الكل معهم خبر فيه، قدام قضية عامر فاخوري طلع الكل ما معه خبر ولا واحد معه خبر ولك حتى السيد بذاته ما معه خبر، لدرجة استعدوا السفيرة الاميركية لتشرح لهم شو صار وحيثيات وظروف اخراج فاخوري

ان شاء الله موت اذا عم كذب بس جبران باسيل اهتم اكتر بالموضوع هيك بقي يحلف يمين شمال بيانات انه هو ما خصه لا بدخول ولا خروج فاخوري ولا قابض حقها عدم ادراجه على لائحة العقوبات او وعد بالرئاسة انا مصدقتك اصلا اللي صار اكبر مني منك قصدي منك ومنه المعني الوحيد بالموضوع هو ايران ولما يحكوا الكبار... انا خليني ساكتة