خليني ساكتة (٤٦) - البلد يوم فتنة، يوم وحدة وطنية.. وحسان دياب ينافس خليني ساكتة!

خليني ساكتة

تم النشر في 14 يونيو 2020


بينزل الدولار ما بينزل

شو؟ مش واثقين فيي؟ اكيد عم تتساءلوا شو المعطيات الاقتصادية المالية العلمية النقدية اللي اتبعتها تيما، لتحديد اذا رح يطلع او ينزل الدولار. يعني حدا يقل لي اي شي من اللي هني قالولنا اياه اكتر علمية من اللي انا عملته

اوكي وافق الحاكم بأمر الليرة على ضخ الدولار بالسوق، وضخ، يضخ، ضخ والضخ والمضخة وبعدين مين وين بده يجيب دولار؟ هول الدولارات المفروض يكونوا للاولويات المعيشية، مش ليحموا الطبقة الحاكمة وسياساتها الاقليمية

انا شخصيا مش حاملة هم الدولار عارفة رح يكون بأمان، لان الصرافين رح يضمنوا انه ما رح يتهرب على سوريا او ايران اصلا هول الدول مش بحاجة لجميلتنا الدولار عندهم بالشوالات..

بس نحن كشعب مطلوب منا نساعدهم بضبط السعر وما نصرف بالسوق السودا، يعني اذا حدا قال لكم الدولار تعوا صرف لكم بـ٧ الاف الدولار اشحطوه قولوا له روح من هون نحن بدنا نصرف عند الصرافين عالسعر الثابت. هيدي مسؤوليتنا كشعب بمساعدة بلدنا تماما متل ما قال رئيس الحكومة.

بعدين انا بقترح عالصرافين يحطوا عازل خشبي وكرسي متل كرسي الاعتراف يعني مثلا بلكي شي شاب عايز ٥٠٠$ يبعتها لابنه من زواج تاني بالسر؟ او بلكي شي سيدة مثلا ما بدها اهالي الحي يعرفوا قديه قسط بنتها بالجامعة؟

مش بس يكفي، يكفي وبفيض

يا ريت حطوا وراك هيك مشهد الغروب وطلعت الكمانجة صدحت شي لحن حزين...

الا يكفي انك مرقت مشروع سلعاتا؟ مبلى يكفي الا يكفي انك قربت موعد انعقاد الجلسة ليلحق مدير عام الاقتصاد يعيد بمكتبه الجديد؟ مبلى يكفي، الا يكفي انه تعيينات الفا وتاتش اجوا مراعيين للتوازنات؟ مبلى يكفي

الا يكفي انك عم تستقبل نقيب الصرافين بعد ما سجنته، لا عرفنا ليه انسجن ولا على اي اساس طلع؟ مبلى يكفي

بعدين دولتك، خلص شهر رمضان، الفوازير اللي قلتها بخطابك لوين منبعت الاجوبة عليها؟ مين يعني مَن اللي وردت بخطابك بين كلمة و كلمة؟ ومحاولة انقلاب؟ شو عرفني عادة الانقلاب بده قوة والقوة بدها سلاح والسلاح عند الحليف والحليف..

خلص ما رح احرجك وقل لك تسمي بعرف الوضع حساس، طب شو رأيك تسميلنا حدا من الفاسدين اللي حكيت عنهم؟ طب شي assistant منهم.. يعني شي واحد بالمالية او بالطاقة

بس مبروك احباط المؤامرة، ونحن عالموعد الاتنين مع السعر الجديد تبع الدولار؟ بس الدولار كان بـ ١٥٠٠ يعني اذا تثبت على ٣٢٠٠ بكون ارتفع الدولار الدوبل ودفشة ما بكون نزل

بجميع الحالات يديم عزكم علينا كلكن يعني كلكن، وخصوصي الاستيذ يعني عم نعزبك معنا بدك توعى لتحمي الحاكم، ويوم بدك تسهر لتصالح البيك والمير، وما بينهما الشباب بمسرحولنا البلد، حتى ندين لبكي ما ممكن يطلع معها مشاهد هلقد متنوعة ومختلفة، يوم شيعة شيعة، ويوم تاني وحدة وطنية ويوم تالت يا قاتل يا مقتول يما بيعطوني اياك؟؟

يعني لولا الحنكة اللي بيتمتع فيها الاستاذ نحن شو كان صار فينا؟روح يوجه لك الخير كيف ما برمت وجهك بتضحياتك معنا

يعني الشباب بعفويتهم رجعوا الشيخ سعد عالارض، ليوقف على خاطر اهالي بيروت، بونجور شيخ بس من يوم اللي صار وجه فرانكلين مطبوع على ورقة خضرا صغيرة ما بقى ينفع الوقوف الناشف على خاطر العالم، خصوصة بظل الوضع الحالي. ومتل ما قلنا للشيخ بهاء هيديك المرة الحل بكلمتين ـ فريش ماني.. قل لي معك فريش ماني اقل لك من انت..

بعدين دخلك يا شيخ كيف شفت لنا منظر السرايا من هيدي النقطة من البلد؟ كيف بيّن عليك هيك يكون واحد عايش فيها بكامل "انجازاته"، انا بقول انك تذكرت ايام ٩٠٠ الف وظيفة..

شو يا شيخ في سيناريوهات بتدغدغ المشاعر عم تنطرح، عم يقولوا انك راجع عحصان قيصر؟

ع كل حال واضح انه في شي اكبر مني ومنكم عم بصير، يعني مش قليلة يوم فتنة يوم وحدة وطنية،

منيح اجت بالوقت المناسب لان وزير الداخلية قرار المفرد مجوز، هيك منصير نتحرك يوم فتنة يوم وحدة وطنية لان تعودنا عالنظام

بس اصلا ما في خوف لان القوى الامنية واعية، واذا بتريدوا ما تلهوها لوزيرة الدفاع بموضوع انها قاعدة بالسرايا عندها امور اهم بكتير تهتم فيها، بضبط المشهد عالارض، وهيدا الشي بين بشكل واضح لا غبار عليه بردع الشغب...

لاااا يا مروان مش هيدا الفيديو (هيدا مروان مدسوس من هول تبع الثورة الحقيقيين كي مرة بيلعب بالمونتاج على ذوقه)

انا قصدي هول (....) بوج هول بتحس الشباب ما يسترجوا يصيبوا كل اللي بيعملوه بحاولوا ما ينصابوا لان اذا انصابوا ما رح يسترجوا يبلغوا ولو ببيان

على الهامش الصهر المعجزة ما بين هالاسبوع، من شي ٦ ايام من يوم اللي دعا لدولة مدنية اختفى، معقول يكونوا شباب التيار بدائرة بيروت الاولى سلموه مبادرة بيض الفري؟؟؟ بليز بليز لا لان ما صدقنا طلعتوا بمبادرة على قد قوة العهد ما بدنا آخر شي ما يخلوه

بالعودة لخطاب دكتور حسان اكبر انجازاتي

ان شاء الله موت اذا عم كذب بس بكل امانة لحد الدقيقة ١٦. ٢٢ ثانية من خطابك، بقيت كل ما تخلص جملة فكر انك رح تعلن استقالتك

ما فهمت انه عم تتحمل كل هالمرارة كرمالنا؟ نحن شعب ما منستاهل ما فينا خير.. راقبنا منيح اذا للي سرقونا ٣٠ سنة ما فينا خير لالهم وعم نتظاهر ضدهم، تخايل واحد هيك فايت عاللعبة مرور الكرام نربح له جميلة

دكتور حسان، انت حاسس متل ما انا حاسة؟

يعني انا حاسة انه في منافسة بيني وبينك، خلص دولتك مش بيناتنا تعا خود خليني ساكتة، واطلاع انت كل اتنين خبرنا شو عم بصير بالبلد، لان كل مرة بتحكي بتصعبها عليي كتير، بطل عارفة شو بدي خلي تيما تقول لتنافسك، يعني شو ممكن الواحد يزيد على كلام دولتك؟ انا بس بشلت البرنامج كان عبالي نق من حالة اليأس من الوضع، من يوم اللي انت ترأست الحكومة وصرت تنق اكتر مني، معليه دولتك يعني مش بالضرورة اذا اختصاصي فيزيوتيرابي صار مدير عام بوزارة الاقتصاد انت تحط عينك عالصحافة، خليك بمهنتك رئيس حكومة قد الدنيا

بس دولتك من باب الحرص يعني هيدا الخطاب، نسيت النسبة ما قلت لنا قديه صارت، لان نحن خايفين يخصلوا ال ١٠٠٪ بصير بدك تكتب الاعمال الكاملة، مجلد واحد ما رح يكفي، على كل حال انت خليك عم تراقب الدولة لما تظلم ابنائها وانا خليني ساكتة