خليني ساكتة ٤٧- عين عالشرق وعين عالغرب... والشعب بطران بيستورد فودكا بـ ١٣٦ مليون$ وبده ينق!

خليني ساكتة

تم النشر في 21 يونيو 2020




نحن شعب مش معقول بطران لازم نتعود نصرف على قدنا.. يعني معقول اننا آكلين لحمة ب

٥٨٠ مليون $ وحليب ب ٣٦٠ مليون دولار وسمك ب ١٠٠ مليون $ لاااا وشربانين الكول ب ١٣٦ مليون$ كل هيدا بال ٢٠١٨؟؟؟؟ انه مينيموم ينهار البلد بالـ ٢٠١٩... ما بقى تمشي الحياة بلاجوني والكر هلق وغراي غوز رك شو بيشكي العرق والنبيذ اللبناني... معقول مللا شعب بطران نحن؟؟ لا ومش بس بطران الا وسكرجي

بعدين تفضلتوا بسبب الفوضى تبعكم وطريقتكم غير الحضارية بالتعامل مع خيرات الدولة قرروا وقف ضخ الدولار. شفتوا ٢٠٠$ فجرت الطوابير والعنفوان والكرامة عندنا؟..

اعطوني سبب وجيه بقول انكم بحاجة للـ٢٠٠$ لا سيما انه الشرق مستعد يتعامل معنا بالليرة اللبنانية... هلق الوحيدين اللي بفهم موقفهم اللي عندهم دفعات بالقرض الحسن، هول صراحة ما بينلاموا المصرف المركزي البديل، ما بيقبل الا بالدولار او بسعر السوق السودا.. طب بشرفكم هلق اذا ما قادرين تمونوا عالقرض الحسن يقبض باللبناني بدكم تمونوا عالشرق بأكمله؟؟

Should I go to right where nothing is left or the left where nothing is right?

هيدي حزورة رومانسية عادة بيستعملوها اللي عم يغرقوا بالوجدانيات والقرارات الكبيرة اللي منتظرتهم

تماما متل نحن اللبنانيين هلق واقفين بالنص منتوجه عالشرق او عالغرب؟

على اساس الاتنين تاركين كل شغلهم بالعالم وناطرين بس قرارنا

مشكلة سياسيينا مش الدينايل ولا الثقة الزايدة بالنفس ولا الوقاحة، مشكلتهم الحقيقية انهم مفهمينا انه نحن محط انظار العالم، والعالم ما ممكن ياخد قرار الا بعد ما نحن نوافق

ربينا على اننا اخترعنا الحرف، وبعدين صرنا العين اللي عم تقاوم المخرز ومن وقتها كبرت الخسة وكل يوم منسقيها شوي.. نصر الهي من هون جذور فينيقية من هونيك

الحدث الابرز كيف بحدده الواحد طالما فحوى الحديث وحدة والمشهد واحد باختلاف المفردات والوجوه؟ والعامل المشترك بين الكل "هني"

هني سرقوا، هني فاسدين، هني مسؤولين عن الانهيار

طب مين هني؟ فيكن مرة وحدة بس تقولولنا؟ اذا السيد هني، والشيخ هني والبيك هني والحكيم هني والصهر المعجزة هني والجنرالهني وما بينهم كمان هني طب هني مين يعني عن جد مين؟

الاسبوع كان عابق باطلالات الوزراء السابقين، هلق هني من يوم اللي فلوا بقيت ملائكتهم حاضرة، يعني اذا بدنا نحكي عن ملف فساد فيول مغشوش من هون، سلعاتا من هونيك، بسري، تعيينات محصصات، دايما موجودين، بس ارتأوا هالاسبوع يرجعوا يطلوا علينا واحد ورا التاني، اهضم والذ شي، هو التنظير على الحكومة الحالية، اعملوا ما تعملوا، طب معاليك بلكي ما عم عم بخلوا هني نفسهم اللي ما خلوك... هيدي على فكرة آخر مرة رح اذكر "ما خلونا" بالحلقة، لان انا اقتنعت من جبران انه هيدا نوع من التنمر يعني البوليينغ، فالتزاما مني بمكافحة التنمر ما بقى رح قول "ما خلونا" نجيب الكهربا، او"ما خلونا" نعمل سدود حقيقية، او "ما خلونا" نوقف المحصصات.

لاحظتوا معي انه خطاب السبت كان متبع نفس منهجية خطاب التلاتا؟ الحكي الهادئ، اولا، ثانيا ثالثا، في الداخل، في الخارج، وبعض الاستراتيجيات بالاخر، وبصلب الموضوع بيقطع التهديد، هلق واحد بقول سنقتلكم، سنقتلكم سنقتلكم، والتاني بقلنا انه مهدي الشباب، يعني بالنتيجة كل واحد بهدد قد حجمه...

وهون الكم والعنكم كمان مجهولين متلهم متل الهني.. بس كلمة حق تقال لاول مرة من فترة بشوف الصهر المعجزة حامل هم، هلق حامل همنا او هم قيصر او هم العقوبات او هم الرئاسة ما بعرف

معه حق على فكرة، من كل شي عندكم ٢ كهربا واشتراك، اه نسيت حاليا هول الاتنين ما عم يجو، بس انه.. مي خدمة طالعة ريحة الكرامة من حنفياتها ومي للشرب.. انترنت متل السلحفاة و ٤جي ما بشوفها.. ماشي المهم السياسيين واثقين فينا كشعب وبقدرتنا على التحمل ومعولين علينا نحن بالصمود.. ما حدا منهم رح يتركنا نجوع، هلق صحيح مثلا باسيل مع القضاء على مرج بإمه وبيه ممكن يشكل سد منيع للامن الغذائي، بس معليه مندمر مرج ومنزع عالبلكونات والسطيحات. وبعدين ما بدكم مي هيدي مي لكل لبنان، ليه ما شفتوا التجربةالناجحة بسد المسيلحة؟؟؟

على الهامش طوني بيك صاير ينكت ويحط مواقف سياسية، والله برافو بيت فرنجية خطفوا الانظار بيوم واحد الكبير بعين التينة والصغير على تويتر شفته شو حلو التوريث السياسي عقبال الثيرد جينيرايشن يا رب.. وكان لافت لقاء البيك بالشيخ سعد هيك ذكرنا بالذي مضى.. اما الحكيم فبقي مترفع عن اللقاءات وتمسك بالتغريدات التكتيكية

بس بشكل عام خطينا فشخة لقدام اسبوع هادي راضي مشبع بالكرامة، لولا مشهد الطوابير عند الصرافين، ومشكل مارسيل ووزيرة الدفاع، ما كان شي خرقه..

على كل حال صار الوقت نوقف نق، الدنيا بألف خير الاسبوع الجاية رح يفتح المطار، فإذا بتريدوا وقفولنا تظاهرات وشتائم واشاعات عن وضع البلد افرشوا السجاد الاحمر واستعدوا لاستقبال السياح نحن بحاجة للفريش ماني

هلق اطلعوا اضربوا الموسم السياحي بشعارات متل مكافحة الفساد واسترجاع الاموال المنهوبة ارجعوا تعوا قولوا ما في مصاري بالبلد

ان شاء الله موت اذا عم كذب بس يعني اللي بطفش السياح وبعض اسبوع بيطلع بنق شاحطته من البلد

مش بزيادة الاميركان حابسين الدولار عندهم؟ وما عم يحولوه يعني بتكونوا انتم والاميركان علينا؟ ما انا من الاول مش مستنضفتكم على فكرة

بعدين كم مرة صيرنا قايلين المسبات عيب؟ وبتفوت عالحبس؟ انا شخصيا بدي بلش حط حر وركع بالزاوية، هو المشكلة انه كما تكونون يولى عليكم (اي شو بس جبران بيعرف يستشهد بأحاديث واقوال دينية؟) فنحن منشوفكم عم تسبوا لنا منقوم منقلدكم...

خلينا بالمهم عين التينة استرجعت مكانتها، وعم تثبت يوم بعد يوم انه لا مكان لمغرّد خارج اسوارها، بالتعاون مع اللواء ابراهيم الصلحات والوساطات ماشية لرئب الصدع بالبلد.. والتحضير للقاء بعبدا الجامع الكامل المتكامل خشبة الخلاص والوصول لبر الامان بالبلد.

انتو خليكم بالتحضير لليوم التاريخي الجديد بـ٢٥ الشهر وانا خليني ساكتة