خليني ساكتة ٤٩ - صورتنا صورة بعلبك.. وانتو الشحادين مش نحن!

خليني ساكتة

تم النشر في 6 يوليو 2020


هيدي هي الصورة اللي نحن بدنا اياها عن حالنا. نحن صورتنا صورة بعلبك مبارح، صورة البلد الراقي، صورة السهر والبحر وصورة العالم اللي بتشتغل وبتقبض وبتصرف من تعبها، انتو الشحادين مش نحن

مين اللي قال لكم نحن بدنا مشهد اننا شحادين والعالم توزع علينا اعاشات، او ٢٠ واحد يتكاتفوا ليدفعوا حق علبة حليب بسوبر ماركت؟ صورة التكافل الاجتماعي وتوزيع المساعدات

.

وانت دكتور حسان اكبر انجازاتي ببوس جبينك توقف انجازات

ال ٣٪؜ اللي بعدك ما حققتهم مسامح فيهم

انا بحملهم على دمتي

لان الانجازات وصلت لحد العالم بلشت توقف حياتها بإيدها بسبب العجز وانعدام الامل

اسبوع محزن، محبط، الاخبار راوح مكانك، الاخبار الاجتماعية طغت على المشهد، العنف، السرقة، القتل، والانتحار، الانقسام الاجتماعي اللي عم يبين خطير، خصوصي لجهة الشماتة اللي نابعة من التبعية للزعيم..

الاغاني الوطنية مع المشاهد العامة من الجو، بتعطي فكرة عن البلد اللي بدنا اياه، هيدا اللي بيشبه وطن مسارحيات الرحابنة، اللي بسبب الصورة العالية المترفعة عن التفاصيل بتعمله قطعة من السما عن جد، وبس تفوت كلوز أب بتتشوه الصورة بزعماء فاسدين وحكام فاشلين وشعب بمعظمه تابع رافض للتغيير وخانع

الدرون كمان حلقت مبارح، هيدي الدرون بتمثلنا، نحن الطامحين لبلد حقيقي، دخلكم المشهد مبارح أصاب كرامة حدا؟ خدش صمود حدا؟ هيدي الدرون غير اللي حلقت من شي ١٠ ايام لتصور قطع الطريق، وتقول للعالم كله بلبنان انه الشوارع تحت الرادار، وانه بتقدر تلتقط الصورة من وين ما بدها، درون لتصور عرس بدها ترخيص، بس في درونات عندها خط عسكري مش مطلوب منها حتى تبرير بأي حق حلقت فوق المواطنين.. ممكن فكرت انه المكان والزمان المناسبين بس طلعت كل القصة مجموعة محتجين على النظام الفاسد قرروا قطع الطريق. هلق هيدي الدرون صورها دقيقة وبين معها انه الشباب عم يقطعوا الطريق على اهل الجنوب، هلق بهيدا الفيديو شو ببين معها دخلكم الشباب عم الطريق لتمرير الشاحنات لوين تحديدا؟؟؟

منرجع لانجازاتك دولتك هيدي الانجازات مدموجة بقوة العهد مش انه قضت على ما تبقى من الدولة لاااا امتدت لتقضي على الدولة الموازية هيدي مش الدولة اللي ضمن دولة اللي كل مرة منحكي عنها شفتوا؟ ما حزرتوا هيدي المرة

هيدي الدولة اللي بتتمثل على سبيل المثال لا الحصر بموتور الكهربا، مثلا موتور الكهربا اللي كان عم يقوم بدور الدولة ويأمن لنا الكهربا، بلش بفضل الانجازات بالتقنين.. لا وغجر عم يتمنى ان الحكومة "تعتبر حالها معنية يوم التلاتا وتصوت على تعيين مجلس إدارة مؤسسة كهرباء لبنان والهيئة الناظمة"،

طب اذا وزيرك عم يتمنى انك تحس حالك معني وانت بتقول ما حدا بيسمع كلمتكم، فيكن تحلوها وتخبرونا مين ما عم يخلي مين؟

خلي وزيرة صورني انا ومش منتبهة تخبرك شو شافت.. وقت بكيت وضحكت وكانت آخر من تعلم وتفاجأت انها ما كانت شايفة الصورة كلها

خلص انحلت هلق بس تنزلي معاليكي توجهي مباشرة على سيكشن السلة الغذائية اللي وزير الاقتصاد روح عليه عشا بزيتونة باي بيقعد يشتغل عليها كل الليل

دخيلك معاليك لو تحط الشمع من بينها لان نور الوزير غجر ما بقى مكفي مع انه يستمد اشعاعه من وزارات ما خلونا المتعاقبة، لا وشو خايفين يسلموا الوزارة لحدا مش انه بلكي هيدا الحدا خلوه يعمل شي او مثلا كشف بالاسماء الهدر والسرقة لا لا النائب الحريص خايف حدا يقطف الانجاز بالوزرا من بعد تعب التيار بمراكمة ٤٢ مليار دولار بواخر وانقطاع متتالي للكهربا، بس اصلا رح تنحل لان رح يصير في محطة للمسيحيين، وترجع لهم حقوقهم، من يوم اللي طلع الخبر وكل المسيحيين سحبوا طلبات الهجرة من السفارات

ربطة الخبز صارت بـ٢٠٠٠، عادي، الدولار وصل لقد مساحة الوطن تصرف يوم الخميس ب ١٠٤٥٢ ليرة، ليرة عن كل كلم مربع، ورجع لل ٧٥٠٠ يعني اكتر ٦٠٠٠ ليرة من السعر الرسمي بس بقي اللبناني معتبر الدولار تراجع.. تصالح باسيل وسلامة، لا ما تصالحوا، سعد الحريري راجع، لااا لا مش راجع عنده شروط، بدهن يطيروا دياب ما بدهم يطيروا دياب وتراند ورا التاني عالسوشيل ميديا، بس كمان محلولة وزير الخارجية عم يتوسط عند الفانيكان يتوسطولنا عند الاميركان، لتمكين مسيحيي الشرق بأرضهم

آه ما كنتوا عارفين انه نحن كمان بالشرق؟ اي اي ما نحن بهيدا الشرق "الملعون"، متلنا متل العراق يعني لدرجة عم نقايض النفط بالغذاء، اصلا كان اسبوع الحكومة منتج لقاءات دولية من كل شرق وصوب.

بما انه معودين ع ٦و٦ مكرر بكرا بدنا ننطر لنشوف شي وزير يطلع ع شي مرجعية لتثبيت المسلمين بارضهم كمان، او الشيوخ مشغولين اكتر بصور النساء بالمايو عالبحر اكتر بكتير من صور ناس عم تقتل حالها من الجوع، او مثلا صور التحضيرات لقضم شط صور من مدام ٥١٪

على شو قلنا انه كان اسبوع محبط، لاننا شعب نقاق، حتى المطار فتح الف مبروك، هلق لا تآخذونا مرات ما بتقدر تهبط الطيارة لان ما في كهربا بس نحن عم نقطعها قصدا لان نوركم بكفاية، وصارت الضهرة اسلس ما هيك؟ مع الكمامات ما بقى تشموا الروايح العابقة بمحيط المطار، شفتوا دفع سعر الفحص مرتين وهيك ما بروح ضيعان وصلتوا على ارض الوطن.

ملاحظة عابرة، الامن العام والاقتصادي المشغول بالقبض على المتلاعبين بسعر الدولار اللي غير ملتزمين بسعر المنصة، ما اله وهرة ع ارض المطار ما هي سوق حرة، وما ادراك ما الحرة، حرة بقوة صاحبها وصاحب صاحبها

نحن ما بدنا النا، بس اعملوا شي محضر ظبط وقدموا قيمته للجيش بلكي يمرقوا لهم وجبة لحمة مرة بالاسبوع بالوجبات.. بس معليه طمنتنا الوزيرة انه مش مطول الوضع هيكك وانه في دجاج وبروتين والله معاليكي كنا مفكرين رح يقضوها الشباب فول وعدس.. بس برافو هيدي من علامات الانجازات كمان، اول جيش بالعالم بوجبات صحية.

البيك مع الثورة والثوار على شرط يتظاهروا خارج ااضيه، اي تظاهرة على اراضيه مشبوهة ويجب اعادة تصويب البوصلة، او بدهم يضطروا شباب الحزب الاشتراكي يصبولهم اياها.. تماما متل ما الشباب الاشاوس حاولوا يعملوا مع واصف الحركة

الاعتداءات والضرب، محصورين بالشبيحة منهم على الموتوسيكلات ومنهم بلباس رسمي، بس بهدف التصويت وبما انه المطار بما انه ارض حرة، انت حر تقول فيه اللي بدك اياه طالما انه مصوب بالاتجاه اللي ما بأثر على حكومة علّي الصورة ووطي الصوت

نحن اصلا شعب لانه مسترجع كل حقوقه وتظاهراته نجحت لابعد الحدود بلشنا نعمل تظاهرات لنصرة سوريا ضد قانون قيصر، وانقسمنا شي قدام السفارة الاميركية مع ترامب وشي قدام الحدود ضده، كيف بدي قل لكم طهرنا البيت الداخلي وفضينا لهيدا اللي عنده مشاكل عنصرية ببلده ينظر علينا

على الهامش في بعض الاشخاص بلشوا يشوفوا الامور من غير منظار، ولما وصلت الازمة لدولاراتهم عرفوا الحقيقة، وتصرفات البنك المركزي البديل عم يشحن العالم على الارض، ويبدو الصرخة قربت

ما تحملوا هم، اشارة اشارتين ٣ وبتنحل الاستراتيجية الوطنية لمكافحة الفساد الثلاتا هلق هي قوامها 7 امور اساسية، ما في وقت نعدهم كلهم هلق، وللصراحة ما انتبهت اذا في شي بيتعلق بتوظيف قرايب الوزراء "الناجحين" برعاية من الوزراء الانجح منهم. وضروري نعرف قبل التعيين هي مع شركة KROLL

او ضدها؟ يعني اذا بتريدوا الموضوع مش حمل العدو يشوف اقرقامنا دخيلكم قدام الاجانب تجرصنا مشينا الحال بس تجرصونا كمان قدام العدو لااا مش مقبول.. هيدا العدو اصلا اذا شاف الارقام رح يمنح لزعمائنا أوسمة شرف لانهم قدروا يعملوا بلبنان الشي اللي هو بنفسه ما قدر يحققوا

ان شاء الله موت اذا عم كذب بس المهم بلشت الاستراتيجية بس هو عمل تراكمي وتدريجي واهم شي في المواطن.. خلص يا مواطن افتاح هالجيبة بقى ورد الاموال المنهوبة لتنجح الاستراتيجية، هلق اقرار الاستراتيجية هو الانجاز؟ او نجاحها؟ بليز قولولي نجاحها لان اذا اقرارها يعني باقي بس ٢٪ وفعلا الله يستر من اكتمال الانجازات

على كل حال انتو خليكم بانجازاتكم الوهمية وانا خليني ساكتة