خليني ساكتة ٥٢ - كورونا سرق الضو من فساد الدجاج والسلطة.. والشهادات الكبيرة بتوجع الراس!

خليني ساكتة

تم النشر في 26 يوليو 2020



الله لا يضر حدا

ما حدا بيتمنى كورونا حتى لعدوه

على امل المصابين يقوموا بالسلامة، وقف البلد على اجر ونص بانتظار نتيجة فحص الرئيس بري وغير اللجان ال ٩٧ تبع حكومة حسان دياب ظهرت لجنة اللجنة المشتركة لشبكات التواصل الاجتماعي بين "حزب الله" وحركة "أمل" هيدي دغري نبهت لوحدة الصف وضرورة نبذ اي تعليقات متسرعة او مشبوهة لان على ما يبدو جمهور الحزب السوشيل ميدياوي مخروق واجت تعليقاته سيئة بحق حامل الامانة

وطمنا البيان انه التوجه الواحد والمصير الواحد للحركة والحزب بأمان

من دون ادنى شك فات البلد بالمرحلة الصعبة وبالوقت اللي حذرنا وزير الداخلية انه اذا بقي الوضع هيك لنص آب ما رح نلاقي محل بالمستشفيات طلع خبر عن وفاة اول مصاب بكورونا لعدم توفر سرير اله، بكل شي حساباتكم دقيقة فظاعة شو هالدقة اللي بتتمتعوا فيها

من شي قليل الصندوق الدولي بطل عارف حاله شو بده يعمل؟ كل يوم بقول بكرا بيتفقوا على ارقام الخسائر وما بيتحقق هالشي

ولك يللا جرصة وجرصتونا اياها ما. بقى عارفين وين بدنا نودي وجنا، يعني لو دريان ما قدر يبلعها ليسافر قالها بوجهكم قال انه عم يودع لبنان كوطن مش بس كدولة وفل

بس هو اصلا حاقد يمكن لما وصل انتبه انه بحكومة ما عندها انجازات تُذكر، ولا عهد ماكرون بقوة العهد قرر يدمرنا معنويا غيرة هيدي كلها غيرة مع هيدا ما بخل علينا والمساعدات للمدارس الفرنسية اقرت بالوقت اللي المصارف عم تحدد للعالم المستوى العلمي اللي اولادهم بيستحقوا يوصلوله اي عيني مين بكون ابنك او بنتك حتى بده يقرر يعمل ماسترز او دكتوراه بطلع يعجبكم هلق ليسانس؟

اصلا ما بدنا اكتر من ليسانس للزراعة، بعدين الشهادات الكبيرة بتوجع الراس بتجيب معها طموح بمستقبل افضل والعيش ببلد فيه ادنى مقومات حقوق الانسان لشو كل المطلوب منك اصلا كلبناني تشبك مع شي حزب اوتيار وهو بقوم بالواجب عنك، خود مثلا اورور فغالي انه متهمة بقضية الفيول المغشوش بس لان الوزير غجر صاحب ضمير والتزاما منه بقرينة البراءة عينها بادارة منشآت النفط.. ولك يا عمي يعني الواحد اذا مدمن كحول بتشغله ب نايت كلوب؟

بس مكافحة الفساد ماشية على قدم وساق

التدقيق المالي الجنائي رح يبلش هيدا غير التدقيق المالي هلق صحيح كله بيصطدم بالنهاية بالمادة ١٥١ من قانون التسليف، وما حدا يطلع هلق ويقول شو بدها تعمل الشركة؟. هي لهلق ما بتعرف بدهم قريبا يحددوا الscope of work

على امل تبقى الشركة دولية وما يطعوها وفجأة تصير

تغطي على افعال الحاكم والحكومة

بس انا شخصيا اللي شاغل لي بالي، القرارات القضائية، يعني غير اورور فغالي، مثلا اذا طلع شي قاضي حكم وفقا للتحقيق الجنائي وطلع له حدا على نسق الريسة نجاح عيتاني ابطل القرار شو منعمل؟

بلكي نلجأ للمجلس الدستوري بس نروح لعنده خط VIP

متل آلية التعيينات يمكن هيدي بيتسجل فيها سابقة تاريخية بسرعة البت فيها، بس ابطالها ما بيعني تحييد الكفاءة الله بخليكم ما تفهمونا غلط خصوصي انه العهد نجح مش من هلق من سنة ومكمل بالنجاح (....)

مرج بسري فرض حاله علينا، مددوا لا وقفوه لا جمدوه ومن ثم حددوا ٤ ايلول يوم نهائي للبت بأمره، الصندوق الدولي ضد العنف، ووليد بيك فجأة صار ضد السد، حتى وزيرة صورني انا ومش منتبهة قالت بمقابلة على صوت الشعب انه هي بصفوف الناشطين بما يتعلق بالسد، وقالت انه هيدا موقف الثوار وهي معهم عالارض مش عم تتماهى مع موقف وليد بيك

هلق السد سادد الطريق بوج الحكومة، لدرجة البنك الدولي شخصيا بده يبعت لهم خارطة طريق للتعامل مع الناشطين اللي ضد السد

واكيد اكيد السدود كلها برعاية التيار والاربعين ما خلونا، يعني بتحس السد ابن عمه خي بيه لسيزار ابي خليل قال هو حريص على انه اهل الضاحية وبيروت يشربوا مي وقام وليد بيك وطلع احرص منه عليهم وحذر من انه المي رح تكون مسرطنة

مي مسرطنة، دجاج مسرطن، نفايات مسرطنة، لبناني عنده سرطان، صارت الكلمة سهلة، بتذكر نحن وصغار كان اسمه البعيد من هون، هلق صرت اذا بتوقف بالشارع وبتصرخ مين عنده سرطان او بيعرف حدا عنده المرض برد اكتر من النص.

اسبوع عابق باطنان من اللحوم والدجاج والاسماك الفاسدة، لا وبتطلع محامية الشركة المتهمة معصبة علينا وعم تتسمسم علينا "هول كانوا ناطرين التلف نحن شو خصنا اذا الوزارة ما عطيت الاذن" قبلها وحدة من العيلة قال هول للتلف بس نسيوهم "نسيوهم ٤ سنين" ووصلت الكميات للاطنان بس في مين كشف اللعبة كان واحد من المحمودات بده يشتري الشركة بس ما باعوه اياها فضحهم

هوية صاحب الشركة بعدها ملتبسة مش معروف تحديدا تابع لمين هلق الاكيد الاكيد مش صديقي الي انا ولا انا اللي حاميته والاكيد اكتر ما ممكن الا يكون محمي يعني لازم مش بس هو يتحاكم لا لازم كمان اللي حاميه يتحاكم

بس بجميع الحالات الدجاج الفاسد اكد علاقة الثقة اللي بتجمعنا فيكم، كيف بدي قل لكم حتى بردود الفعل على الدجاج الفاسد والمعفن انقسمنا، قد ما واثقين فيكم وبخوفكم علينا وعلى مصلحتنا شككنا بإنكم قررتوا تحمونا من السم

نحن بلبنان عايشين على قاعدة انت بتعرف عالم وغيرك بيعرف عالم، بس في مثلا متل اللي اعتدوا على واصف الحركة هول عالم بيعرفوا وزير والوزير بيعرف مير والمير بيعرف حليف والحليف قوي كتير ما حدا بيقدر يدق فيه

على الهامش الدولار هدي عال ٧/٨ الاف، الكهربا صارت عم تجي شي ٤ ساعات طبيعي هيدي كلها تسجل لرئيس الحكومة حسان اكبر انجازاتي، الامن العام تدخل بموضوع المازوت بالزهراني حيث حاملي الامانة وحماة الديار كانوا متحكمين بالسوق نحلت حبيا اهلية بمحلية بما يؤكد على التوجه الواحد والمصير الواحد للثنائي

لقاء جمع الصهر المعجزة ووئام وهاب ذكر بلقاء الجبابرة، جولة سياحية زراعية انمائية ارض جوية باللقلوق تخللها بحث مبادرات للخروج من الازمة

ازمة شو بدكم تخرجونا منها؟ ما هو اي ازمة غير وجودكم بحياتنا كلكن يعني كلكن كتير سهلة، اصلا الاكتر تعبيرا عنكم برنامج الزقيفة، قال بيبقي استاذ مارسيل ٥ دقايق عم يبهدل الحكومة، بيدخل عالخط استاذ جورج لترميم الثقة بين المصارف والمودعين مش بمطالبة المصارف اعادة الاموال لا لا مطالبة كل واحد عنده مصاري بالبيت يحطهم بالمصارف لدعم القطاع، من بعدها بفوت وزير المال واثق الخطى على وقع الزقيف، قبل ما يتخانق مع نقولا شماس مين حريص اكتر ع اموالنا هيك بتحس هون لازم تنزل دمعتك وتقفل الستارة

ان شاء الله موت اذا عم كذي بس بظن هيدا المشهد الاكتر تعبيرا عن حالتنا كلبنانيين

هيك بتحسنا شعب عم نرقص حول توابيتنا، اذا طلعت وجوهنا بالشوارع معبّرة، الفراغ بعيونا اكتر تعبير

ومنرجع ورا شاشاتنا منكتب منضحك منكت منبكي، تماما كإننا حاملين تابوتنا وعم نرقص، ومجموعة من العالم عم تتفرج، ما فيك تفهم ع شو عم تتفرج بالتحديد، علينا عم نرقص بتابوتنا؟ او مفكرين حالهم بالتابوت ونحن عم نرقص فيهم؟

بهيدي الحلقة بكون ختمت سنة من البرنامج.. وما قادرة لاقي شي قوله الا خليني ساكتة