خليني ساكتة (٦٢) - كيفك؟

خليني ساكتة

تم النشر في 20 سبتمبر 2020


كيفك؟

هيدا اصعب سؤال بتسأله للبناني او لبنانية هالايام

كل مرة بتسأل حدا كيفك على الارجح بتذكره انه مش منيح

بتحس اللي عم يسأل مستحي واللي بده يجاوب ما عم بلاقي الجواب

بس مش مهم المهم انه وزارة المالية ممنوع تطلع برات الثنائي الشيعي واللي عنده اي مشكلة يجرب الرئيس بري هلق اذا كتير ازمت بياخدوا الداخلية انه مش غلط يجربوا شي ما مجربينه قبل

ذكرى اربعين يوم على انفجار المرفأ قطعت وقطع وراها ايام وحق ٢٠٠ ضحية بعد ما بين وحق الالاف من الجرحى مهدور وحق عشرات الالاف من المتضررين مجهول بس مش مهم المهم المثالثة على النار او حتى المرابعة بس التيار بالمرصد وما رح يخليها تقطع

هيدا الاسبوع اعطانا نموذج ملموس عن حياتنا، نحن شعب بموت او حريق او غريق او برصاصة طايشة عالطريق

في قضايا مسؤول عنها التلفت الأمني، وقضايا مسؤول عنها الاهمال الرسمي وقضايا بترسم ببساطة خطوط حياتنا

ممكن تكونوا بريئين من كل هالقضايا وهيدي كلها مش من مسؤولياتكم، بس النظام الصحي مسؤوليتكم شي؟ انه يكون عنا دفاع مدني مؤهل وحقوق افراده محفوظة من مسؤوليتكم شي؟ انا بدي اسألكم سؤال واحد نحن يعني كشعب اذا بدنا نقارن بين وجودكم بحياتنا ووجود افراد الدفاع المدني انه برأيكم مين منقي اذا بإيدنا ضرايبنا تندفع على حدا مندفع الكم معاشات لتسرقونا او لهول الشباب اللي كل يوم بينزلوا بوج الحرايق؟ انتم اصلا ليه بدكم تسألوا عنا لما نكون على ابواب المستشفيات عم نفتش على مكينات وادوية لاهلنا، انتو هيك بتنطرونا وبتنطروا اهلنا واولادنا ليموتوا وبتبعتوا ممثلين عنكم ليعزوا.. بس بظن صارت واضحة عندكم لا عزاكم مقبول ولا وجودكم مرحب فيه بين العالم اللي قتلتوها هي وقاعدة ببيوتها

على كل حال مش مهم المهم التناتش على الحصص ماشي على قدم وساق، وبعد ما كان الكل ما بده شي، رجع صار الكل بده، بس انتبهوا الكل متمسك بالدولة المدنية، والاغلبية بالمداورة، هلق النكتة الاساسية تكمن بهول اللي مفكرين انهم بيقدروا يقنعوا الرئيس بري بالمداورة، ما هو تاريخه عابق بالمداورات مين اخبر منه بالمداورة صار له من الـ١٩٩٢ كل ٤ سنين بداور رئاسة المجلس مع نفسه

على فكرة انا مبسوطة للشيخ سعد، هيك عم يطلع اسمه كتير بالاخبار هالكم يوم، انه بتحسه هيك مع الاتصالات بين بيت الوسط وعين التينة والاليزيه كإن عنده شي يقدمه للبلد من بعد ما كان على ايام د. حسان اكبر انجازاتي كتير بعيد عن الاضواء.. بس بعدها الحكومة معرقلة لدرجة السفير المصري نزل بكل تقله عالارض لتقريب وجهات النظر

للأمانة انجازات حكومة تصريف الاعمال بعدها مستمرة، مثلا وزير التربية اصدر قرار للمدارس الرسمية باستقبال النازحين من المدارس الخاصة من دون افادات، احساسا مع الطبقة المتوسطة اللي صارت فقيرة.. هلق للصراحة ما عارفة النازحين من المدارس الرسمية وين بدهم يروحوا؟ لتحت السنديانة؟ منيحة الفكرة او لتحت الاشجار المثمرة من ميلة منكون حققنا وصية السيد بالزراعة للامن الغذائي ومن ميلة تانية open air و safe distancing بزمن كورونا، وهول الطلاب اللي عم يسافروا لبرا ليدرسوا بوفروا على اهلهم دولار طلابي، فضلا عن منوفر قرطاسية وبصير الولد يروح آخد بإيده شملة بقدونس او شي رغيف خبز هيدا اللي رح يطلعلنا ببلاش ابتداء من الاثنين، اي الشعب صار بيقدر يتمتع برغيف خبز كامل بربطة الخبز من دون ما يزيد سعرها هيدا الرغيف بضاين ٦٢ يوم من بعد ال ٦٢ بترجع ربطة الخبز لحجمها الطبيعي

هلق المنيح بالموضوع بخلال هال ٦٢ يوم بتكون خلصت الانتخابات الاميركية وبين الخيط الاسود من الابيض اللي ناطره "الثنائي الشيعي" بمالية او بلا مالية بالثلث المطلع بالمثالثة او بأي حجة بدكم اياها، ما هو يعني هلق ما وصلنا لهون للسيد يتنازل للفرنسيين، صرنا بالجزء الاخير ولا بد من انه يرجع الاصيل الايراني لحلبة التفاوض مع الاصيل الاميركي ويصدر القرار اللي بينسحب علينا نحن كشعب رهينة تحت ايد الوكيل

على الهامش في عبارة الوضع الاقتصادي بلبنان هيدي وضعها اخطر من وضع كيفك؟ يعني بتحرجه للبناني بشكل عام انه بتحسسه انه اول شي في وضع وتاني شي في اقتصادي علما انه لا الاول موجود ولا التاني اله وجود واكيد هيدا بفضلكم كلكن يعني كلكن كمان مش مهم ولا مهم الاطفال اللي غرقت بالبحر لما اهلهم قرروا يهربوا من الفقر

ان شاء الله موت اذا عم كذب، كنت عم فكر بالجيوب الانفية تبع بدري ضاهر ما حدا طمنا عليها هالاسبوع وضغطه هو شفيق مرعي، انه ما عرفنا بعدهم معززين مكرمين بالمستشفى او صلحوا لهم ال AC بالسجن وردوهم في حدا يطمنا لان نحن كضحايا واهل ضحايا واصدقاء ضحايا مشغول بالنا كتير كتير عليهم

بعدهم ضحايا الانفجار عم بغيبوا واحد ورا التاني وبعد في ٩ مفقودين والتعويضات على ما يبدو على الله، الخوف انها ما تكون واصلة هدية شخصية لشي زعيم متل ما صار بالشاي السيلاني والمتضررين يخبزوا بالافراح.. من هلق لتبلش المحاسبة الحقيقية بجريمة العصر بجريمة الحرب اللي ارتكبتوها بحقنا خليني ساكتة