خليني ساكتة (٦٥) - بتعرفوا الدولة والدولة ضمن الدولة.. بس الاساس هي الدولة "الموازية!"

خليني ساكتة

تم النشر في 11 أكتوبر 2020



بما انه كل شي واقف بانتظار الانتخابات الاميركية، 

وبما انه كل الاخبار اللي عم نسمعها ونشوفها ما هي شي الا تعبانة هوا لا اكتر ولا اقل

عبالي احكي بتوصيف عام للبلد اللي هلق فجأة زعمائه صار بدهم مؤتمر تأسيسي ليغيروا النظام

(غير له النظام)

فدرالية لا!

الكونفدرالية لا!

مثالثة لا!

اللامركزية الادارية لا!

الدولة المدنية اي اي بس مع المداورة بالوزارات واهم شي المالية تبقى للشيعة!

هيدا الواقع وقع من زمان ومستمر بوقوعه، رغم الاحداث السياسية والاجتماعية اللي عم تعبي هوا

يعني نحن اذا بدنا نشرّح واقعنا بصرف النظر عن ١٤ و٨ آذار و٧ ايار و١٧ تشرين

و٤ آب و٣ نوفمبر وغيرها من التواريخ نحن من مشاكلنا تفاصيل صغيرة او كبيرة قد ما بدكم حسبوها غير النظام الطائفي العفن وكل اللي نتج وبينتج عنه يوميا من تهديم حقيقي لأي شي ممكن يشكل مقومات بلد.. من مشاكلنا الدولة الموازية، ما قصدي الدولة اللي ضمن دولة ما غيرها اللي نحن مستهدفينا وآخدينها رهينة أحلامنا وطموحاتنا ببناء بلد حقيقي.. لا الدولة الموازية بتسيير حياتنا اليومية كبديل عما يجب ان يكون دولة

يعني نحن اليوم منحب نحكي ببلد وبحكومة وبنظام، بس بالوقت ذاته، اللي فعلا حاكمنا هني مجموعة من المصالح المشتركة، بتمشي على هامش الدولة اللي مفترض تكون حقيقية.

ليه مصالح مشتركة، لان هيدي المصالح او مدعومة من زعيم او من طايفة او من بلدية اللي هي بدورها مدعومة من زعيم او من طايفة، شي مرة مثلا جربتوا تقاطعوا موزع الموتور عندكم بالحي، وتتحدوه وتروحوا عند صاحب الموتور اللي بالحي التاني وتقولوله نحن بدنا نشترك معك؟ هيدا التاني هو بيرفض، حتى لو عرضت عليه مصاري اكتر بيرفض، اصحاب الموتورات بعملوا حدودهم مش بالpipi بشرطان الكهربا ما حدا بفوت على التاني، مسألة مبدأ هي...

وبعدين هول بيتكاتفوا ضد اي قرار بيطلع عن اللي اسمها دولة او من يمثلها حكومة، وزارة، بلدية، يعني قد ما فيك انت دولة لازم تتجنب تعلق بلسان

أصحاب المولدات؟ ما بالاخر طلعت الدولة ما عم بتجبلك الكهربا لان اصحاب المولدات عندهم اولاد بدهم يعيشوهم

كارتيل النفط ما بوازيه قوة بالبلد الا كارتيل التهريب.. بكلمة وحدة بتبقى انت وابنك وابن ابنك وابن ابن ابنك بلا بنزين اذا اختلفوا هني ورياض سلامة على سعر صرف الدولار

اما موضوع التهريب فما في داعي نحكي كتير بالموضوع بيختصر بهالكلمتين

هلق بالعودة للعب على قدنا نحن عامة الشعب الرتش، عنا اصحاب سيتيرنات المي، السؤال يعني اذا الدولة امنت لك المي انت المواطن العادي، هيدا تبع السيتيرن كيف بيشتغل؟ وقبل ما تفتح عليي هلق وتبلش تنق على سعر السيتيرن وغلاء والمعيشة، يعين انت اذا ما دفعت هول ٢٠ الف كيف بدك تقدِّر النعمة؟ هيدي المي اللي عم تشتريها هي عادة او هي مالحة او هي طالعة ريحتها يعني بدك الريحة والملح ببلاش؟ وبعدين فيكم تاخدوا بنصيحة اللي عايشين على الكوكب الاورانج (اشربوا من الحنفية) بس برضايي عليكم قبل ما تشربوا من الحنفية ما تنسوا تودعوا اولادكم واهلكم وتكتبوا الوصية

من مميزات الدولة الموازية اللي ما بتلاقيها بغير محل.. موزع كابل الانترنت بالحي ما تقولوا لي انه الزلمة مش عامل معكم خدمة! اذا هو مثلا ما اعطاكم الانترنت من عنده وربحكم جميلة بالسرعة اللي مش موجودة اصلا.

قدامكم حلين او تنطروا الدولة تجيب خطوط دي اس ال عالمنطقة وهيدا يعني شو بدي قل لكم.. او فيكم تروحوا عند تاتش والفا شو بيشكي تدفعوا انترنت قد اجار بيت بالشهر؟ بدكم جنات تجري من تحتها الانهار ببلاش؟ بعدين كلها شي عقدين ٣ وبيخلص الفايبر اوبتيك بكل لبنان

وبعدين انت ليه بحاجة لخطة نقل عام؟ مش عم افهم شوفيريت الفانات شو مقصرين بحقكم؟ شي مرة كنتوا بدكم مثلا تنفذوا اضراب عام وما شاركوا؟ ولك بينزلوا بكل تقلهم على الارض هني بأهمية شوفيرت الكميونات يعني تخايلوا وزير المفرد مجوز هلق مثلا بده يفرض على الشاحنات يمشوا بوقت محدد، لنشوف اللعب الحلو على الارض

وخلص الصيف يعني سمفونية شواطئ مجانية، مأجلكة، وبعدين اذا حضرتكم سبحتوا وسبّحتوا اولادكم بهيدي الشواطئ المجانية، المعتدين على الاملاك البحرية كيف بيربحوا؟

انتو بهون عليكم هيدي الاستثمارات بملايين الدولارات تخسر؟ مش بزيادة كورونا ضرب الموسم الماضي؟؟

ان شاء الله موت اذا عم كذب بس لشو بدكم الطبابة المجانية مثلا وكل زعيم فاتح مستوصف وعم يأمن لكم اللي بدكم اياه، هلق بعرف انه بينشط بموسم الانتخابات اكتر بس انه انتو شو بدكم بالطبابة اكتر من مرة كل اربع سنين؟ بعدين كل شي بحقه، يعني زيادة التسعيرة بالمستشفيات الخاصة مش اعتباطية، هيك حتى تحرز الموتة على بابها انه فكر فيها معقول بريستيجك اللبناني يسمح لك تموت مثلا كرمال ١٠٠ مليون ليرة على باب المستشفى يعني بالقليلة شي ٤٠٠ مليون وطلوع، هيك بتحافظ بالقليلة على بريستيجك الفايسبوكي، وبيركضوا اصحابك بوست تضامني بوست عاطفي بوست تفجعي ولايكات ودموع افتراضية تماما متل التظاهرات اليومية اللي بيعملوها لقلب النظام

وموضوع التعليم الرسمي بدنا نخلص منها، كاميرات و جبنالكم شو بدكم بعد؟ المدرسة الرسمية والجامعة اللبنانية قدامكم عجبكم اهلا وسهلا ما عجبكم هيدا المطلوب لان مين بده يمشي مدارس وجامعات الزعما؟

بعدين العلم بجهنم مش مطلوب والدليل الدولار الطلابي ما بيشمل ولا طالب من ٢٠١٩-٢٠٢٠ وطلوع.. وبظن في دورات رح تصير كيف تصبح نصاباً كبيراً بأقل من ٤٨ ساعة، وتتبلى على العالم اللي هني اكثر حاجة منك

وفي دورات بالشحادة كمان، هيدي بتختلف من منطقة لمنطقة اساليبها وهيدا ضروري بحافظ على التنوع تبع البلد

ان شاء الله موت اذا عم كذب بس ما تركتولنا شي، حتى الجبال صارت تنافسها بالارتفاع مطامر الزبالة

انتو وعم تكتبوا الدستور الجديد ما تنسوا تعدلوا بعض الامور بتوصيف لبنان مثلا بيمتاز بزعماء طوائف حاكمين الداخل ومحكومين من الخارج.. بشعب ما عنده ادنى مقومات حقوق الانسان بس ماشي والشي وراه الزعيم واللي بيفتح تمه دغري بصير عميل.. وبيمتاز كمان بحرائق وتفجيرات صيفا والغرق في شوارعه شتاء.. بيتمتع بـ ٣ اسعار للدولار بس ليرته بخير .. الفساد التلوث والقتل المجاني من ومقوماته بس عهده قوي..

انتو خليكم بدولتكم العاجزة والاكستينشن الموازية تبعها وانا خليني ساكتة