خليني ساكتة ٦٦ - بذكرى ١٧ تشرين مش مهم شو انجازاتنا المهم شو انجازاتكم كلكن يعني كلكن!

خليني ساكتة

تم النشر في 18 أكتوبر 2020



كلكن يعني كلكن

لو واحد بس بعده مقتنع وعم يصرخ بهيدا الشعار يعني الثورة ما فشلت

صح انكم متل الاخطبوط وما بيكفي نقطع ايد وحدة لنوقف تمددكم وسيطرتكم بس تطلعوا حولكم

بعد سنة على ١٧ تشرين.. انتم أسرى كراسيكم.. ما بقى تقدروا تفشخوا فشخة برات هالكرسي

نحن عم نحتفل بسنة على يوم اللي صرنا نسميكم واحد واحد بالساحات لا خايفين منكم ولا من بلطجيتكم، وانتم صرتوا جثث سياسية، جيف بالأحرى، بعدكم مش منتبهين لان في جماهيركم الغاشية من حولكم

امي كانت تقل لي اللي ما بيقطع فيه كلمة ما بتقطع فيه ضربة السيف، هيدا غير السيف اللي القصر الجمهوري خبرنا انه شينكر مدحه، لدرجة اضطرت السفارة الاميركية توضح انه هيدا ما كان compliment على العكس تمام.. بس خلص ما نحن تعودنا انكم تعودتوا على الجرصة

مش مهم نحن شو حققنا بذكرى سنة على ١٧ تشرين.. ما نحن "مضللين" ما عارفين مصلحتنا وين

المهم انتم شو حققتوا بهالسنة، بما يؤكد انه شعار كلن يعني كلن ما ظلمكم للحظة وحدة

يعني مستوى الهلوسة براسكم واصل لدرجة انكم كلكم غردتوا عن الثورة والرئيس بعده مادد ايده.. الرئيس بالذات بعده ما انتبه انه شحطنا من البلد لانه مش عاجبنا وبعدين بشرنا بجنهم

لا وبذكرى الحراك اللي سقط سعد الحريري عم يرجع الحريري يطرح نفسه، طب يا شيخ سعد بشرفك هلق غير انه شعراتك طولوا وانت ضعفت انه شو تغير؟ يعني اذا انت بكرا جيت رئيس حكومة انه نحن الشعب شو رح ينعكس علينا غير انه نرجع نتصبح بطلتك البهية، اي هيدي طلتك اللي على اسم عمتك اللي دارت عم تقنع العالم بأهمية مبادرتك، لو الكل بشوفوك بعين عمتك ما كان في مشكلة

بعدين مبادرة شو هيدي؟ كل فترة بتطلعولنا بمفردات تعويمية جديدة.. بترجع معها ثلة من المفردات المرافقة "الميثاقية" "الدستور" الاختصاصيين التكنوقراط.. واكيد اكيد طلة البهية بترد على حياتنا الصهر المعجزة.. هلق هو عنده نقطة انه او الكل اختصاصي او الكل سياسي، واكيد اكيد شبيك لبيك الرئيس بين ايديك عمرها ما كانت استشارات منجرب الاسبوع اللي جاي

على كل حال بكون قرب التاريخ المفصلي ٣ نوفمبر، ووضحت الصورة بالبيت الابيض، وما بقي شي على شي بالبلد.. البانادول مقطوع اصلا لشو نحن بحاجة للبنادول او لاي دوا من الادوية المقطوعة خصوصا انه اغلبية الشعب لاحقة الزهيم، ليك حبيبي مناصر الزعيم كل مرة انت او حدا من اهلك بيوجعه راسه حط صورة زعميك وقل له بالدم بالروح نفيد يا زعيم بتصح هيدي وصفة مجربة

وما تطلع وتنق انه الحاكم بأمر الليرة اصدر قرار وحط سقف للسحوبات بالليرة اللبنانية.. كل مرة ما بيكفيك المليونين تبع الشهر كله حط صورة زعيمك وقل له نحن فدى صباطك شوف كيف بتغنى بتغنى عز وبتشبع كرامة

نحن لو كنا ببلد بيحترم حاله ليتحاكم الحاكم بامر الليرة بالساحات العامة، قال قراره الاخير هو لضبط السيولة اللي هلق ٢٥ مليار بالسوق مقارنة ب ٥ مليار السنة الماضية... على اساس مطبعة العملة انا المسؤولة غرقت السوق باللبناني وهلق بدك تنشفه.. بس الحاكم خط احمر ثلاثي الابعاد اصلا، وبعد ما شفنا اي حدا تحاكم لا بالاموال المنهوبة ولا بانهيار البلد ولا بانفجار المرفأ، بس عادي هيدا كله طبيعي بالعهود القوية هيدي احداث ما بتصير بعهد مارق بدها عهد قوي لتصير فيه

برز هالاسبوع المكتب السياسي للتيار، هيدا مهمته يرد عالاختصاصي سعد الحريري، والاعلام مشغول اذا حزب الله والعهد متخانقين، بتحس هيك متل لما يتلصصوا الجيران على ٢ متزوجين، العلاقة بين الحزب والعهد بخير، في هالكل عوني بس حزب الله يزعلوا باسيل بيطلعوا بصيروا بزتوا حكي، للامانة هني بصيروا يحكوا الحقيقة ينتقدوا استقواء حزب الله والسلاح غير الشرعي يعني بسموا الاشيا بأسمائها.. وبس يرضى جي بي وينسحب اي موقف بهدد حجمه بيرجع كل شي لمحله ويا دار ما دخلك شر. بس كان كتير قوي جي بي بذكرى ١٣ تشرين، والاقوى منه زقفة مي خريش بالصف الاول، انا بقول الحماسة طالعة من انه هي وجي بي بيتشاركوا بحبهم لحياكة السجاد اللي بتعلم الصبر. والا شو تفسيركم لصبر جبران باسيل علينا نحن الشعب كل هالوقت.. ما هو من سنة كان بنفس المناسبة بده يجرفنا

هلق الرئيس ضرب اجره بالارض، وبعت الوفد على الترسيم متل هو بده، بس الحزب ما كان راضي، مرة جديدة عرف من الاعلام انه الوفد في غير سياسيين وناوي يتصور.. فأصدر بيان رفع العتب الشهير بعد نص ليل وحتى ما يكون هو المعرقل الوحيد جاب بإيده الشق التاني فطلع البيان على شكل ثنائي.. وكان وقعوا قوي على المفاوضات.. قعدوا اللبنانيين مبوزين وراسهم بأوراقهم وما اعطوا الطرف الاسرائيلي ترف انهم يتطلعوا فيه.. وانتهت الجلسة بحفلة تنكيت عالسوشيل ميديا

ان شاء الله موت اذا عم كذب، بس زيارة اللواء ابراهيم لواشنطن مش هينة، بالوقت اللي صارت العقوبات بالدايرة الضيقة للرئيس بري في شخصية شيعية عم يتم استقبالها بالترحيب، عبالي اعرف بس اذا اللواء عباس هو رايح ياخد الطيارة الاميركية الخاصة.. قطع بالديوتي فري؟ جرب يشتري شي؟ كيف حسبوا له الدولار؟ انتبه انه الدولار بمطار رفيق الحريري الدولي ب ٧٩٠٠ليرة؟ او ما انتبه لانه دفع فريش دولار؟ بالعودة لزيارة اميركا هلق اذا حدا غيران من اللواء ابراهيم لان ربح جائزة جايمس فولي للدفاع عن الرهائن... كتير سهلة في اكتر من ٤ ملايين لبناني رهائن لسلطة فاشلة فاسدة مجرمة اذا بيطلع حدا وبدافع عنا وبحررنا وعد منطالب له بجائزة نوبل للسلام

خليني ساكتة