خليني ساكتة ٦٧ - "الوجه الجديد" سعد الحريري... رجع!

خليني ساكتة

تم النشر في 25 أكتوبر 2020


صعبت عليي مع تكليف الحريري

مش كتابة الحلقة

الحياة هي اللي صعبت عليي انا كمواطن يعني

الزبالة طايفة بالطرقات، المستشفيات ما بقى بدها تستقبل مرضى كرمال الدولار والليرة، والادوية والبنزين بدهم يغلوا بالقليلة ٥ مرات المواطن فايت من موسم حريق بامتياز ع موسم غريق غير مسبوق بس شو الهم؟

الحريري تكلّف

هيك حسيت انه العمى عن جد كتير مش قاريينا مسترخصينا مستهبلينا

كان بدي اعمل حلقة خاصة بعدين لقيت ما في بيستاهل، ولان عودة رجالات الدولة بدها خطوات، حفظوا الخطوات اللي مهّدت لعودة الحريري

الخطوة الاولى مقابلة تبخيرية تلميعية تبجيلية باستديوهات التلفزيون اللي حامل لواء الثورة وما بيستضيف الا وجوه ثائرة وسعد الحريري وحاكم مصرف لبنان والهيئات المصرفية

الخطوة التانية الحاكم بأمر الليرة بطلع مجموعة من التعميمات التنصيبية الهادفة لتجفيف البلد من الكاش

الخطوة التالتة بيطلع رئيس جمهوريتك بيقصفك بسيل من الاسئلة عن الاصلاحات والفساد وغياب الانتاجية فبتحس انك مواطن فاشل عبق عالدولة

الخطوة الثالتة نجم المنجمين بخبرنا عشية تكليف الحريري انه اليوم بلشنا نرجع من جهنم

طب حدا انتبه انه هيدا هو ذاته من سنة وقف بكل ثقة بالنفس انه هو ما خصه بالانهيار والفساد قدم ورقة اصلاحية من بعدها باسبوع قدم استقالته قال هو ما بقى يحمل استهزاء بالدولة وتعطيل وهلق رجع ب هالمرة كمنقذ، بس منقذ قالب خلقته قال من كتر الهم اللي حامله وما عم ينام بسبب الشعب ما عم يقدر يضحك... انا بقول رجعة من دون سيلفي بالقصر الجمهوري لا يعوّل عليها

للأمانة تكليف الحريري سجل انجاز جديد لحسان دياب، لان بالقليلة دياب تم تكليفه ب ٦٩ صوت.. بس انا بقول هالمرة رح ينجح سعد بالتأليف والحكم وادارة الانهيار، بيكفي الشغف اللي نابضة فيه صورته مع بري وعون قوموا بقى في احلى من الترويكة؟ رياحة راس وشعب مخدر ورصاص طايش عم يحتفل ووحدة صف شيعية سنية او الادق برية حريرية

وبتقولوا ما في ديموقراطية؟ شو في احلى من هالتمايز بالطايفة الوحدة، علما انهم بيلتقوا على ضرب الثوار وتخوينهم وحرق قبضة الثورة شفنا تمايز بموقف الثنائي الشيعي تنوع بطعم الوطن

وطرابلسي ما التزم باللقاء التشاوري

واسعد حردان ما التزم بقرار القومي

وطالوزيان تميز عن الجمهورية القوية

وابو صالح اهلا بهالطلة اهلا رجع يصالح بس كرمال المواطن بشو بدي احلف لكم لو ما مصلحة البلد العليا ما كان المشنوق سمى الحريري بس الظرف استثنائي

هيدا كله لو ما رجعة الشيخ سعد ما كنا شفناه.. بعدين الايجابية بالاجواء عاجبتني كتير.. اللي سمى الحريري واللي ما سمى حاسس بالايجابية، وملتزم بالايجابية ومتمسك بالايجابية، هيدا شي اكدلنا اياه النائب محمد رعد وانا بوثق بحدس نواب حزب الله كل ما اطلع حولي وشوف ايجابيات الاستقواء بالسلاح، ايجابيات التهديد برفع الاصبع، ايجابيات سياسة نفذ ثم اعترض هيك بتخض كلبنانية.

بس ايجابيتك تنتهي عندما تبدأ سلبية الاخرين... وهون من فوت ع باسيل، حبيبي صرنا كلنا نعرف انه من هو وصغير ما خلوه، فهلق كبر وصار صهر الرئيس وصار دوره ما يخلي حدا يتهنى بعيشته.. يعني باختصار هو بيضة القبان بميزان ايجابية حزب الله...

ما حدا يفهمني غلط ويفكر انه الشيخ سعد رح يتنازل لا سمح الله عن اي شي ممكن يضر بمصلحة الشعب.. ابدا.. اصلا هو اجا من دون شروط ولا اي شرط اطلاقا والمالية للشيعة هيدا مش شرط هيدي من مسلمات الحياة يعني كيف ١+ ١ = ٢ اي تحديدا هيك المالية للشيعة

على الهامش طوني بيك فرنجية فرض هيبته وطلع بالعالي واكد انه المردة مسيحيين كفاية لتغطية ميثاقية الحكومة، لسحب الورقة من جي بي.. ومعه حق اللواء السيد الانسان مش تياب بتفوته عالمصبغة ٣ ايام بيرجع نضيف بس يا ريت ننتبه انه هيدا التشبيه بينسحب عليكم كلكن يعني كلكن كل واحد فيكم من ٤٥ سنة لهلق!

خلينا بالحاضر وبلا تذكير بالحرب وعصر الوصاية وغيرها.. المهم الاصلاحات عالطريق اشارة اشارتين تلاتة واللي ما مصدقني يرجع يسمع ميشال حايك، حتى الدولار ما رح نضطر نقطفه عن الشجر لا لا رح يهر هر بالشوارع.. الله يرزق كل محتاج صديق نصاب برتبة حاكم متل صديق الشيخ سعد، كنا معودين ع صديق بيهدي ١٦ مليون دولار لصديقة، على صديق بيهدي طيارة خاصة، على قريب بيهدي منصب لبنت خالته، على زعيم بيهدي وزارة لمرته، ومبارح سمعنا بوزير تصريف اعمال عم يهدي صديق التيار منصب قبل ب ٣ اشهر من شغوره... بس انه صديق يهدي انخفاض بسعر الدولار لصديقه هيدي صراحة قمة الصداقة... ومن هيك يا اصدقائي اوعى حدا منكم يبيع دولار اكتر من حاجته، دولار ما تبيعوا الا اذا عايزين..

ان شاء الله موت اذا عم كذب بس رجعوا ركبوا اجر الكرسي متل ما بناسبهم حصنوا حالهم من جديد على قاعدة احميني بحميك، بس نحن كشعب ما لازم ناخدها شخصية، لان هي مش شخصية واللي مش مصدقني يسمع تيمور بيك... تحديدا السياسة بلبنان فاميلي بيزنيس يعني بغير عبارة اللي حمينا حاكمين على قاعدة بعد حماري ما ينبت حشيش

والشعب غاشي وماشي ومين بيعرف ما الاحداث بفرنسا تطيح بالمبادرة الفرنسية عن بكرة ابيها، ويرتاحوا كلهم من الاصلاحات، ما نحن ما مناخد مبادرات اصلاحية من اشخاص بيغلطوا بحق الاديان.. بس منقبل نبقى محكومين من قرطة حرامية وفاسدين ومجرمين لا بيعرفوا دين ولا بيعرفوا انسانية... خليني ساكتة