خليني ساكتة ٦٩ - جبران ما يهمَّك حزب اللـه بلمَّك!

خليني ساكتة

تم النشر في 8 نوفمبر 2020


خلونا نبلش من الاخر وخصوصي من جماعة "اي عقوبات خارجية على اي زعيم لبناني شو ما كان اسمه مرفوضة"

اوكي انا معكم العقوبات الخارجية تدخل سافر باستقلالية البلاد، بس انه التدخل الخارجي لصالح الفاسدين والمجرمين وتعويم الحكومات شرعي.. بس لكشفهم ما بجوز.. ونحن على مين بدنا نعتمد؟ نزلنا على الارض طالبنا بالتحقيق شو كانت النتيجة انه كلن يعني كلن تكتلوا ليحموا بعض وصار السلطة الحاكمة عبارة عن شجرة لصوصية بامتيار بيتفرع منها وزراء ونواب ورؤوساء وزعما احزاب وطوائف

الفساد

استغلال السلطة لمآرب شخصية

محسوبيات وتهريب اموال

تهم اجت بالقرار الاتهامي اللي على اساسه صدرت العقوبات بحق باسيل فضلا عن دعم حزب الله..

على فكرة الاتهامات هي ذاتها اللي صرخنا فيها بالساحات بس شو بدنا نعملكم انتو بتحبوا الاجانب..

والفرق بيننا وبين الاميركان انه نحن رفعنا الاتهامات بوج كلن يعني كلن وشوي شوي الاميركان والاجانب رح يوصلوا للي نحن قلناه ويفتحوا ملفاتكم واحد واحد

على سيرة الملفات بي الكل مفكر حاله عم يحكي مع مجموعة من المتظاهرين بقول للاميركيين اعطوني الدليل وانا بدي حاسبه اذا طلع فاسد، لا فخامتك خليك مرتاح مش هيك بتمشي الامور عادة، عادة بالمحافل الدولية انت بدك تاخد الملفات اللي بتثبت العكس وتقدمها، بس وحياتك انتبه صلاحيات غادة عون وسليم جريصاتي بتنتهي على الارض اللبنانية

جي بي ما تزعل هيدي العقوبات انعملت بس لتقربك من الشعب، وهيك هيك شانتال كانت عم توقف بالصف لتقبض ال ٢٠٠$، هلق صرتوا متلكم متلنا.. تتذكر بس ركبتوا علينا النصبة الكبيرة سياسيين ومصارف وحجزتولنا اموالنا؟ اي هلق صارت اموالك محجوزة متل اموالنا..

بتتذكر لما بسبب الاموال المنهوبة نحن ما بقى نقدر نسافر لان كل دول العالم بتعرف اننا ما منقدر نتصرف بأموالنا بالبنوك اي هلق انت صرت متلنا.. الفرق الوحيد بيناتنا انه نحن ما سرقنا ولا نهبنا ومع هيدا فرضتو علينا عقوبات بتصب بصالح سلطتكم

بس ما يهمك حزب الله بلمك داعمك لاخر رمق، وهيك صارت الزيارة عالشام، شرعية، لان ما في قدامك الا الحدود البرية، لتعمل كزدورة برات لبنان، شوف المصاري اللي عم يطالب فيها بشار الاسد وينها، بلكي بالصدفة ببينوا مصرياتنا ، وفيك اذا بدك تزور دولة القرار ايران وتطلع عن كثب على صناعة السجاد لان الصبر ضروري بالمرحلة القادمة

على الهامش بموضوع باسيل بالذات الضرب بالميت حرام وهو صار جيفة سياسية من يوم اللي نزلت العالم ب ١٧ تشرين على الطرقات على وقع الهيلا هيلا..

من يوم اللي طالبنا بالمحاسبة واعادة الاموال المنهوبة، ما في ملف فساد واحد انفتح، جبتوا لجنة تحقيق جنائي دولية اصطدمت بالقوانين اللي حاميين حالكم فيها من الحاكم بأمر الليرة للدولة المفلسة وحسابها رقم ٣٦ اللي هو مثال حقيقي عن مغارة علي بابا والاربعين حرامي بس الفرق انه عدد الحرامية كتير اكبر

بتلوموا اللي محتفلين بالعقوبات الاميركية؟ مين بده يجب لنا حقنا ويحقق بالفساد؟ هني ذاتهم اللي عم يحققوا بجريمة المرفأ؟ يوم اللي قتلتونا اولادنا وقتلوا نحن وقاعدين ببيوتنا؟ ولحد اليوم ما في ولا وزير ولا قاضي ولا مسؤول تم التحقيق معه؟ بعد ٣ اشهر على جريمة العصر المجرمين لابسين الكرافاتات وعم يبرموا من شاشة لشاشة.. حتى المساعدت اللي وصلت لنا استكترتوها علينا، من الشاي السيلاني للسمك الموريتاني وصولا للطحين العراقي والرطوبة اللي لحفته ما هي الا مثال صارخ عن العفن اللي معشش بوزاراتكم

ان شاء الله موت اذا عم كذب بس كنا ١٠ حالات كورونا سكرتوا البلد ٣ اشهر لان المرشد الاعلى المحلي قال لازم تسكروا البلد، هلق العالم رح تبلش تموت بالطرقات لان سماحته قال هو مع اقفال جزئي ومدروس صار حسان اكبر انجازاتي بده دراسة كاملة من وزير الصحة ليقرر اذا بده يسكر البلد، اكيد لان هلق ما في مظاهرات تسكروا البلد كرمالها لتطفوها...

ووزير التربية على شو خايف تحديدا؟ على الادمغة المهاجرة المستقبلية؟ ما بقى عم يجيك قعود بلا ما تبعت الاولاد على المدارس. خايف على مستقبل الاولاد أو على ميزانية المدارس؟ اعطي اوامر بدفع كامل الاقساط وخلي هالاولاد بحضن اهلهم.. لان اي ورقة نعوة بأي بيت رح تغطي على أكبر شهادة ممكن ياخدها ولد

مبروك الانتخابات الاميركية خلصت وربح بايدن، يللا شكلوا حكومة يا شاطرين.. ونحن ناطرين كمالة اللائحة اللي رح تشملها العقوبات، على امل يفضحوكم واحد واحد انتو وصناديقكم ومشاريعكم ومجالسكم.. آه ومبروك أكبر قال "الجمعية الخيرية" القرض الحسن صار عنده آي تي ام بتدفع بالدولار الأميركي متل ما بتقبض، وفي حكي عن شركات عم تبيع دولار ليبي وعراقي بنص حقه...

وشهد هيدا الاسبوع ظهور شخصي للحج عبد الله بري برد على بشرى الخليل اللي اختارت السيد حسن على السيد موسى وشككت بدور حركة امل بالمقاومة ووصلت فيها لتختار القذافي على الرئيس بري وقالت انه الرئيس بري دوره صغير كتير صغير بالمقاومة وانها مش راضية عن دوره بالداخل هي قالت اما انا خليني ساكتة