خليني ساكتة ٧٠ - جبران "مفرَّخ" ... وبالفساد الكل لاعب أساسي!

خليني ساكتة

تم النشر في 16 نوفمبر 2020



كل

LOCKDOWN

ونحن بخير

معليه بدنا نتحمل مع الدولة المسؤولية، لان نسيت على مدى الحكومات المتعاقبة تأمن لنا اي مقومات طبية تقوم فينا بالمصايب

وما تستهتروا بوضعنا نحن متلنا متل اهم بلاد العالم، والتعامل مع كورونا كنا الافضل، لدرجة هني عم يخترعوا اللقاح صح بس نحن كمان عم نحقق انجازات، وزير الصحة عمل افتتاح وقص شريط زيادة ٣٠ تخت بمستشفى بعلبك الحكومة عفوا مش تخت سرير

ومن الانجازات كمان انهم حجزوا حصة لبنان من اللقاح، الله يستر ما يخزنوه بنفس المسؤولية اللي خزنوا فيها الطحين، او يوزعوه بنفس الطريقة اللي كانت تتوزع فيها ادوية السرطان اللي لليوم ما تحاكم حدا بقضيتها

تحاكم؟ هيدا شي بصير اصلا عنا؟ وقفت على قضية ادوية السرطان المزورة؟ قضية الدجاج الفاسد وين صارت؟ طب بلاها انفجار المرفأ وين صارت تحقيقاته؟ بدري ضاهر شو اخباره بعده بالمستشفى او رجع عالبيت لان بالحبس ما كان في AC وفايتين على شتي والمستشفى ما فيها CHEMINE

بس نحن شعب ما بهزه شي، شوفونا عم نرقص ونحتفل ونعبي الشوارع والمطاعم والدنيا كلها قبل يوم من اللوك داون... عن جد هلق؟ يعني شو بعد ممكن يهز هالشعب؟ طب ما بدكم تخافوا من كورونا؟ ما بدكم تستحوا انكم ما عم تتحركوا بوج اللي سارقينكم استحوا من دول العالم اللي عم تشحدكم مصاري، بس نحن اصلا متل زعمائنا اللي بروحوا بطيارات خاصة ليشحدوا مصاري باسمنا

اه صح في بريستيج شو ضروري اذا عم نشحد من السفارات قسط اولادنا بالمدرسة نعيش على قدنا باطل تعوا نسهر ننفخ شفافنا نعمل شوبينغ لان المدرسة شو عم تعمل يعني لبدها القسط؟ والمدارس اللي عم تهدد بإنها بدها تخلي الاولاد اللي ما دفعت القسط برات زووم، روح يا حبيبي شوف حالك لما قدموا الاهالي على المساعدات كيف حضرتك تواطئت مع اصحاب اللي اصلا قادرين يدفعوا وشلت المساعدات من طريق اللي مش قادر وارجاع تعا طالبهم يدفعوا وهددهم

١٠٠ يوم قطعوا على جريمة العصر والمجرمين غاسلين ايدهم من دمنا، وعم ياخدوا وقتهم، متل ما عم ياخدوا وقتهم بتشكيل الحكومة، اصلا ما في شي محرز للعجلة، ما في ارخص من الشعب ودمه.. وع شو بدهم يخافوا ينهار الاقتصاد؟ ليه هني خلوا اقتصاد لينهار؟

حدا انتبه لسلسة التقارير اللي انعرضت عن الفساد هالاسبوع واللي شملت كلهم يعني كلهم؟ يعني من متعهدي الجمهورية اكيد متعهد الاخضر واليابس بيناتهم بس كمان في متعهد البساتين والمطامر وفي متعهد البايومتري هيدا بيقطع وين ما كان من دون ما ننسى ديوتي فري اللي بتروح حصريا لمتعهد واحد منذ نشأتها

هلق اخد على خاطر الوزير ملحم رياشي، ليه بيستوطوا حيط وزارة الاعلام وبطالبوا باقفالها وقال كشف ملف الفساد فيها من باب الكيدية حتى يغطوا على غيرها، اذا كان ملحم ضيف شرف، فحلقات التقارير كانت من بطولة الثنائي الشيعي، تيار المستقبل، التيار الوطني الحر والاشتراكي وبأدوار اساسية لابو صالح و الوزير الفصيح غازي العريضي وجي بي وسيزار ابي خليل اما الادوار الثانوية بادارة المجالس راحت للرئيس بري، سعد الحريري

بس انت او انت كمناصر للزعماء والاحزاب غاشي وماشي بتقدر تحضر التقرير اللي حزبك وزعيمك ما خصه فيها.. وباقي الشعب برضايي عليكم خليكم بالبيت ما في داعي للتظاهر او الامتعاض او اي شي قريبا بشيلوا الدعم عن كل السلع بتوعوا بتنقوا افتراضيا بترجعوا بتناموا ما في مهم

ما بقى فينا نتأخر عالزرع، صار ضروري، مش لإن الوضع الاقتصادي من سيء لأسوأ، ولا عملا بوصية المرشد الاعلى المحلي اه نسيتوها هيدي الوصية سقطت بمرور الزمن.. لا ابدا بس لان ما بقى في امل الا انه نزرع للخلاص

على الهامش جي بي واحد مش كافي لانقاذ البلد، هو اول ما اجى كان الوضع افضل، فإجا لحاله لما ما خلوه وصار الوضع مأساوي صار في ضرورة لأكتر من واحد

ان شاء الله موت اذا عم كذب بس انت بطل قومي حرام اصلا تمشي عالارض لازم بس تنحمل على الاكتاف للصراحة، وخصوصي بعد تويتك الاخير تبع التدقيق الجنائي

والعقوبات الاميركية ما رح تأثر فينا متل انت قلت ما رح نعطيها اكتر من حجمها، نحن قوم لا نترك حلفاءنا تحت رحمة العقوبات لعيونك شو بدك دولار؟ منأمن لك.. حكومة؟ انت امور ونحن منعطل.. رئاسة يللا بس لتخلص ولاية عمك

خليني ساكتة