خليني ساكتة (٧١) - ٧٧ سنة على دراما الاستقلال... و٤٥ على مصيبتنا فيكم!

خليني ساكتة

تم النشر في 22 نوفمبر 2020


٧٧ سنة عالاستقلال

تحررنا بمسرحية درامية من الانتداب الفرنسي

بقينا عايشين ببلد وصل ليكون سويسرا الشرق

لحد ما بلشت طلائعكم توصل على حياتنا وبلشنا حرب اهلية عالخفيف، تخللها رهان على منظمة التحرير الفلسطينية من جهة واسرائيل من جهة تانية اكيد لان انتو زعماء بتقدروا الاستقلال

كملتوا حياتكم عادي اهلنا تتقتل بالشوارع وانتم زعماتكم وثرواتكم تكبر

خلصت الحرب الاهلية قسم من البلد محتل من اسرائيل وقسم تاني من سوريا، بس شو بهمنا نحن كشعب عنا زعماء روح قلبهم الاستقلال.. قد ما مستقلين، استقلوا عن كل شي الا السرقة والمحاصصات

تحرر الجنوب، من الاسرائيليين بس بقيتوا انتو وبقيت شماعة مزارع شبعا حاضرة بقلبنا وكياننا

طلعوا السوريين من البلد، وبقيتوا انتو بس بقيت منظومة الفساد والاستزلام حاضرة بقلبنا وكياننا

هيدا حضور نابع من حب الاستقلال، نحن شعب مستقل عن المنطق بس الزعيم حاضر بقلبنا وكياننا

لانكم انتو بتحبوا الاستقلال، وسعتوا مروحة الاستقلال، الحرب الاهلية انتهت باتفاق الطائف، هيدا مستقل

من بعدها ٧ ايار انتهت باتفاق الدوحة، كمان هيدا مستقل

ما الطائف والدوحة (قرى بجبال لبنان الما بتنطال)

بنظرة تقييمية سريعة لوضعنا المستقل من كل اشكال الاحتلال والانتداب، اللهم الا الوصاية الايرانية، هيدي منرجع لها بعدين

نحن بالسنة ال٧٧ على استقلالنا عن الفرنسيين

والسنة ال ٢٠ على تحريرنا من الاسرائيليين

والسنة ال ١٥ على تحريرنا من السوريين

رهائن طبقة سياسية فاسدة، مجرمة، اعادت انتاج حالها، ولملمت زعامات حربها، وقاعدة عم بتدير البلد الحر المستقل

بآخر ٤٥ سنة من الاستقلال، قدرت هيدا الطبقة السياسية بالجملة وبالمفرق انها ترتكب بحقنا ما لم يرتكبه عدو او صديق

بعد ٧٧ على استقلالنا عن الفرنسيين

و٢٠ على تحريرنا من الاسرائيليين

و١٥ على تحريرنا من السوريين

نحن شعب منهوب من طبقة سياسية اجتمعت لتسرق له شقى عمره

نحن شعب رهينة طبقة سياسية طمرتنا بالزبالة، غرقتنا بالمجارير، معظم املنا او معفن او مسرطن، منموت على ابواب المستشفيات

نحن شعب مقتول بتالت اقوى انفجار كيماوي بالعالم، وبدل محاسبة المسؤولين وتعليق المشانق بلشنا نفكر ببناء مشروع سياحي على دم العالم اللي بعد ما نشف، حتى نستقطب ملايين السواح اكتر من قلعة بعلبك بدنا نجيب.

لما دول تعمل memorial لكارثة حلت فيها، بتكون حققت وعرفت وحاكمت، وانا شخصيا مع تحويل الاهراءات والمرفأ لساحة عامة.. بس بشرط تكون اول معالمه لائحة بتقول هول هني المجرمين بتحمل اسماءكم واحد واحد رؤوساء ونواب ووزراء وزعماء

لان اللي فيكم مش حرامي نصاب، واللي مش نصاب فاسد واللي مش فاسد مجرم واللي مش مجرم عميل لدولة تانية نحطكم كلكم يعني كلكم بشي قلعة وما تلاقوا حدا يحرركم

بتبقوا فيها لتردوا المصاري اللي نهبتوها وتتحاكموا عالارواح اللي قتلتوها هي وقاعدة ببيوتها

على الهامش ما منقدر نذكر الاستقلال من دون التذكير باستقلالنا التام عن ايران بالسنوات الاخيرة بحيث صرنا مستقلين قلبا وقالبا بكل قراراتنا الداخلية والخارجية، استقلال بيفرض رئيس الجمهورية ونتائج الانتخابات وتشكيل الحكومات وحتى مين بحق له يتظاهر وشو الشعارات اللي بتنرفع فيها حرصا على استقلالنا عن السفارات وتمويلها المشبوه

ان شاء الله موت اذا عم كذب بعد ٧٧ على استقلالنا عن الفرنسيين

و٢٠ على تحريرنا من الاسرائيليين

و١٥ على تحريرنا من السوريين

ما منتأمل شي الا تحريرنا منكم ومن حكمكم اللي صار له قابض على ارواحنا ٤٥ سنة على الاقل

خليني ساكتة