خليني ساكتة ٧٣ - حزب اللـه "يعود" إلى كنف الدولة.. وعون بده يخلص من رياض سلامة والأميركان "ما خلوه"!

خليني ساكتة

تم النشر في 7 ديسمبر 2020


٤ اشهر على جريمة العصر

المحاسبة وين صارت، على ما يبدو انها مشهد سوريالي ممكن يبلش بوينو بدري ضاهر؟ عن جد وينه؟ رجع عالسجن او بعدها جيوبه الانفية بحاجة لراحة بالمستشفى، او صار مكنكن حد شي شومينيه بشي شاليه بعيدا عن الانظار؟

اما التعويضات فبيتراوح بين عالم معتمدة على جمعيات خيرية ومساعدات فردية، وبين الاخبار اللي على عيار الشاي السيلاني والطحين العراقي

ما في شي رح يلهينا عن تذكيركم بجريمتكم بحقنا، ولا اي حدث سياسي او اجتماعي اهم من الاشخاص اللي انقتلت ببيوتها، ومن ارواحنا اللي انسحبت من جواتنا نحن اللي بعدنا منتصنف عايشين

بس في تطور حاصل على الصعيد المحلي، حزب الله شخصيا لجأ للقضاء، هيدا الموضوع مهم على اكتر من صعيد، مش قليل انه قدر الدولة اللبنانية يعترف بقضاءها، وقبل ما يروح فكركم لبعيد لا ما راح بملفات حسن فضل الله اللي بتطير رووس كبيرة، راح بدعوى على القوات وفارس سعيد لان اتهموه بإنه هو مسبب جريمة العصر وتفجير مرفأ بيروت..

انا شخصيا كمان ما بقبل انه يتوجه الاتهام لحزب الله لحاله، لان كلكن يعني كلكن مسؤولين، اللي سهل واللي دبر واللي اهمل واللي غض النظر.. بموضوع حزب الله يعني على اساس انكم حماة الديار والعين الساهرة، بتعرفوا العصفور وين غط بس بدكم، ومين فات عالمطار ومين عبر الحدود بس المرفأ مش تحت العين الساهرة.. شكرا على كل حال حميتونا من الاسرائيليين ومن داعش بس ما عرفتوا تحمونا من السلطة اللبنانية اللي انتو جزء منها.

ما حدا يقل لي الثورة ما قدرت تعمل شي، صار الثنائي الشيعي بيلجأ للقضاء من وقت لوقت، هلق صحيح ضد الصحافيين والصحافة، بس مش مهم كل شي ببلش صغير وبيكبر.

من حوالي سنة لورا كان الضعيف هو اللي بيلجأ للقضاء.. معقول مثلا يكون هيدا التحول مرتبط بالمعلومات اللي بتقول انه المرشد الاعلى المحلي نقل مكان الاقامة على ايران.. يعني اذا صح الخبر بكون صار الرجل المناسب بالبلد المناسب، وبوفر تحويلات وقطع حدود. على كل حال هيدا سيناريو متفائل انا شخصيا بحس من الصعب تحقيقه بسنة متل ال٢٠٢٠...

من جهة تانية رجع وهج حسان اكبر انجازاتي بعد ما نظيره الكويتي تذكر يعايده بعيد الاستقلال ب ٥ كانون الاول، رئيس الوزراء الكويتي معذور يعني كيف بده يعرف مين يعايد، رئيس تصريف الاعمال او الرئيس المكلف، على سيرة الرئيس المكلف حدا ملاحظ انه عم يلعبها low profile مش عم يطلع اسمه الا ببروفايلات الوزراء والمدرا العامين الفاسدين وتبعيتهم اله؟

خلينا بالقضاء اسماء الضباط والعسكر والعمدة عم تلعلع بالمحاكم، وسجن لمرتشين ومختلسين، بصرف النظر عن الاسماء شعور مريح نسبيا، ولكن خلينا نعمل قراءة سريعة من دون ما حدا يزعل التوازن الطائفي موجود، والتبعية السياسية كمان مراعاة، يعني اذا لحقنا الشجرة السياسية والطائفية لكل واحد من هول منعرف لمين تابع وبيبقى السؤال اذا رائد قادر ينصب مثلا ١٩ مليون دولار زعيمه شو ناصب؟ اذا وزير هادر ٣٠ مليون دولار حزبه قديه هادر؟ يعني باختصار مبروك على كل واحد فيكم سجنه وعلى امل انه نشوف الرؤوس الكبيرة بيناتكم.

بس ما حدا يقدم على رياض سلامة، بحسب جريدة الاخبار هيدا طلب اميركي بلهجة تهديد واضحة غير لبقة أو مألوفة في التخاطب، انه دايفيد هيل قال للرئيس، رياض سلامة باقي واذا بفل بتفل معه، يا دلي انا على بي الكل شو صاير يسمع الكلمة، رزق الله على "يستطيع العالم أن يسحقني، لكنه لن يأخذ توقيعي".. يعني بلا طول سيرة الرئيس وما يمثله بده يخلص من كبير اللصوص اللبنانيين بس الاميركان ما خلوه.

بس بالقليلة الرئيس قوي كتير وضابط الامور كلها وحاطتنا تحت قانون طوارئ غير معلن، ومسلم كل امورنا للمجلس الاعلى للدفاع. هيدا المجلس اللي عم يحكي عن اغتيالات محتملة لشخصيات سياسية، غريب انكم دايما بتشموا ريحة الاغتيالات المحتملة للسياسيين، بس ما حدا شم ريحة النيترات دا مونيوم اللي اغتالنا بطريقة جماعية. بعدين بما انكم هلقد ماسكين الامن خبرونا مين هو اللي مهدد لنحميه معكم، لان نحن مش مجرمين متلكم، وما منرضى بالاغتيالات، اللي من باب الصدف ما بتتنفذ الا لما ما بتكونوا لا منتبهين لها ولا محضرين الها.

الاسبوع شهد قلة ادب من مجموعة من الثوار، تخايلوا يا عيب الشوم عليهم بهدلوا عدنان القصار، وعمو سليم اخد على خاطروا منهم، يعني هلق معقول بما انه هو رئيس جمعية المصارف يحجز لنا مصرياتنا بالبنوك ويمنعنا ناخدهم، كله ليربي هول الثوار اللي نسيوا اهلهم يربوهم.. فقاموا مكافحة الشغب جربوا يعملوا اللي اهلهم ما عملوا لان تخايلوا لووين وصلت الجرأة انهم يجربوا يحاصروا الحاكم بأمر الليرة.

انتو شعب ما بتقدروا المنيح على فكرة، ورغم الوضع المأساوي اللي نحن فيه، طلع لكم ١٠٠ الف جديدة طبعة جديدة، هيك حتى اذا قلتوا انه ال ١٠$ ب ١٠٠ الف ليرة يكون الكم عين تتباهوا قدام الدولار

على الهامش مشهد حرب داحس والغبراء اللي بيتكرر بأوفلان كل سنة يعني شي برفع الراس اول شي منحب نرحب بعودة "شيعة شيعة" عالشارع صا النا زمان ما سمعناها من يوم آخر أتلة للثوار عالرينغ وحرق الخيم.. وتاني شي هيدا تبع "ممنوع قطع خط التماس".. هيك باختصار التعايش المشترك واصل للركب بوطن النجوم

اما مشهد طوفان الطرقات عيب الواحد يعلق عليه، لان مشهد بذكر بذكر بذكر بمين؟ لا ما بذكر بغزة ولا بالصومال ولا بجزر الواق واق ولا بأي دولة بتعتبروا حالكم اهم منها بذكر بلبنان السنة المضية واللي قبلها وقبلها وقبلها ومن ١٥ سنة ومن اول ما بلشت المنظومة السياسية الفاشلة بادارة هيدا البلد وحكوماته

ان شاء الله موت اذا عم كذب، بس صار لازم نرد على الشاب الحلو، ونبلش نشحل الخسة الفينيقية اللي بالرغم من كل شي نحن فيه بعدها عم تكبر براسنا، ما تفكروا عم الطش نعمت افرام، لان نحن اكيد واصلين لنكون غزة الشرق الاوسط، خصوصي مع الصلح الخليجي، ولكن من المنطق السياسي البحت، والقرار بالسلم والحرب المخطوف، ومش من اي مقاربة تانية... خليني ساكتة