خليني ساكتة ٧٤ - القضاء بين الهيبة والخطوط الحمر.. وحسان دياب يخطف الاضواء من المنقوشة!

خليني ساكتة

تم النشر في 13 ديسمبر 2020



اول شي نحن كمان ما منوثق لا بالتحقيق ولا بالقضاء، قلنالك جيب تحقيق دولي، فضلت تصدق اصحابك علينا

بس شو بدك رب ضارة نافعة، انه وين كنت رح تشوف هالاجماع السني حولك؟ انه الشيخ سعد شخصيا تضامن معك بالرغم انه كان برئاسة الحكومة لسنين هي والباخرة بالمرفأ، بس معذور هونيك المشهد مش حلو للسلفي ما كان ينزل.. والسنيورة وميقاتي اللي فاتت الباخرة ع ايامه وكرامي والمفتي، المفتي دريان اللي مش دريان لا بالجوع ولا بالفقر ولا بالسرقة ولا بالنهب دري بإنه موقعك كرئيس حكومة مستهدف واستنكر، هيدي لازم تكون عنوان مجلد الانجازات، يوم وحد حسان اكبر انجازاتي الصف السني. او في يكون العنوان يوم سرق الادعاء على حسان الاضواء من المنقوشة وقضية رفع الدعم.

على كل حال، مش مهم زينب بالضاحية قالت اذا ما في طحين ياكلوا بسكوت، وعايشة بطريق الجديدة قالت اذا ما في خبز ياكلوا بسكوت، وسهام بكركول الدروز قالت اذا ما فيه خبر ياكلوا بسكوت، وكمان ماري روز بالاشرفية قالت نفس الشي.. تماما متل ما حط البطرك الراعي خطه الاحمر على رياض سلامة، طالعنا المفتي دريان بالخط الاحمر على حسان دياب.. اما الشيعة فخطهم الاحمر منهم وفيهم.. وبضربة استباقية قالها الاستيذ من الاخر الرطل برطل ونص ولحمه مر ما بيتاكل، بس ما وقفت عالرئيس بري خدوا على سبيل المثال لا الحصر سليم عياش مين رح يقدر ينفذ الحكم الصادر بحقه؟ ما هيدا كمان استهداف موقع.

على كل حال المستهدف الاول لاي موقع هو انتو و فشلكم واهمالكم وفسادكم واسماءكم ووزراءكم وزعرانكم، بده يجي يوم وتتحاكموا كلكم يعين كلكم كل واحد ع قد تاريخه ومسؤولياته

على الهامش شهد هيدا الاسبوع اول تشكيلة حكومية سرية بتاريخ لبنان والعالم، حتى سالم زهران ووئام وهاب ما قدروا يحصلوا على اي اسم بيرتبط بهالتشكيلة اللي من ١٨ اللي قدمها الحريري.. بتحسه قدم ورقة مكتوبة بالحبر السري.. شيخ سعد هيك عالسريع بما انك صاير كتير mature من يوم اللي بطلت تاخد سيلفيات هيك فجأة ضعفت ونضجت لا بتسرب اسماء ولا بتحرد وبتسلم ع رئيس حكومة غيرك لا وبتدعمه رغم الخلاف السياسة، فيك تحكي مع ال cousin تبعك وتقل له احمدته عيب اللي عملوه رجالك لا بل معيب انهم يهجموا على ثوار عزّل ويضربوهم بهالجمهية؟ ومثلا تكمل معروفك وتبعتهم عالقضاء هيك وهيك القضاء مصحح هاليومين.. يمكن عم يودع النيسكافيه قبل ما ينقطع

بالعودة للادعاءات بجريمة المرفأ حرق اوراق اصلا محروقة، ما كتير بفيد انه علي حسن خليل وفانيانوس فاسدين بشهادات مش بس لبنانية الا واميركية وحسان دياب اللي ما في شارع وراه، واهلا وسهلا بالوزير غازي زعيتر تحية لصدرك الرحب، واستعدادك للتعاون مع القضاء. وتحية اكبر للقضاء اللي فجأة وعي، وبلش يوزع ادعاءات والاستدعاءات، على كل الجبهات... قال هو هيك مش مسيس وعم يحقق مع الكل، بس اللي بركز شوي بينتبه انه كل التحركات القضائية الاساسية ليمونة الهوى، ما اكيد لان التيار مهفهف منضف، وحلفاؤه اصلا ما بيعرفوا وين المرفأ مش قاطعين من حده.

المعلومات التاريخية تبع جهابذة التيار استمرت بالتدفق، وبعد السجاد الايراني وماري روز الاشرفية، طلع استهداف المسيحيين مبلش من ١٤٠٠ سنة، وخصوصي الموارنة… يا دلي على اوراق التفاهم شو بتعمل بالعالم وصل التماهي مع الحليف لحد تقاسم العدو التاريخي..

بس يا عيب الشوم عليهم ال بي سي، معقول يعني؟ كيف الهم عين يفتحوا ملفات الفساد بالوثائق والارقام، انا كل عمري مش مستضفتهم هول مجموعة الصحافيين انه ادمون ساسين اله عين يحكي عن صفقات البواخر من بعد ما اهدر ٤٢ مليار دولار بالكهربا؟ او لارا الهاشم ترجع اول شي تخبرنا وين راح مشروع الفايبر اوبتيك وكيف ركبت صفقة مبنى تاتش، وقديه عمولتها عليها، قبل ما تطاول على عماد كريدية وجمال الجراح. بعدين معليه ال بي سي ما بتقدر هيك تقرر تغرد برات سرب الاعلام وتكشف ملفات، وتكسر ثلاثية السلطة الاعلام والمصارف.. لا ما فينا يا عيب الشوم يا ال بي سي وين حرمة الملفات والوثائق والرشاوى كشفها قدام الشعب الغاشي؟ بعرضه لاحتمال الصدمة من انه زعيمه من كلن يعني كلن

ما تعلمتوا شي كل هالعمر من النائب حسن فضل الله؟ فني عمره الزلمة وهو حامل الملفات اللي بتطير رووس كبيرة.

خلينا بالاساس، البطولة المطلقة هيدا الاسبوع للقضاء، عن جد كان لجوء حزب الله اله الاسبوع الماضي فاتحة خير عليه، بطل لحق، دعاوى واداعاءات.. ونحن هلق لازم كشعب عم نطالب بالمحاسبة نرضى بشو ما بكب القضاء قدامنا.. على كل حال بظل الوضع الحالي نحن مع اللعب الحلو، ومنتظرين بكامل شغفنا حلقات هيبة القضاء، ومين رح يمثل امامه، بس وصلنا حقنا الكل اكد انه تحت سقف القانون بس ضد الشعبوية، وخصوصي انه عم يتحرك بضغط من الاعلام، ما خبرناكم انه ال بي سي فوتتنا بالحيط؟

هلق بيناتنا يعني ما حدا سامعنا، مش قليل يصير القضاء، البطل القومي بالبلد بين يوم وليلة، المشكلة مش بالقضاء اللي منحترمه ونجله احسن ما يزعلوا القوات، المشكلة بعدم ثقتنا فيكم، يعني باختصار ومن الاخر كل شي انتو بتوثقوا فيه "فجأة"، نحن بنفس الـ"فجأة" منبطل منوثق فيه..

ان شاء الله موت اذا عم كذب بس كلنا منعرف انه الغالبية الساحقة من القضاة يتم تعينها متل ما بتم تعيين الضباط، بكل شفافية ونزاهة وحسب الكفاءة.. بلا ما نتخبى ورا اصبعنا ما بقدر قولها الا هيك إن صار ما صار معي هني رح يحكموا علي رحم الله امرء عرف قدره فوقف عنده… خليني ساكتة