خليني ساكتة ٧٥ - فيلم لبناني طويل!

خليني ساكتة

تم النشر في 20 ديسمبر 2020


صرنا بالحلقة ٧٥، لو ما كنتو حاضرين خليني ساكتة ولا مرة بتقدروا تبلشوا هلق لإن بكل بساطة، هو انعكاس للوضع اللبناني اللي متل المسلسلات اللي ما بتخلص، بتحضر حلقة منها وبتغيب شي سنة وبترجع بتحضر حلقة تانية وبتفهم شو عم بصير، لان ببساطة الوجوه هني ذاتهم والابطال هني ذاتهم، هلق مرات مثلا بكون الواحد منهم وزير التربية بصير وزير الاشغال، او بيستقيل تحت ضغظ الشارع وبيرجع بيتكلف بعد كم شهر هو ذاته.. تماما لما بتحب انا كريستينا، اليخاندروا اللي امها كانت تحب بيه، وعمتها كانت تحبه وابن عمها بحبها وهكذا دواليك

خدوا مثلا احداث الاسبوع الماضي، مشاهد من افلام ومسلسلات الحبكة الدرامية المفروض انها ما بتليق بأي مشاهد، بس مع هيدا الشعب عم يحضر وكانه غير معني، كإن الممثلين والمخرجين مش هني ذاتهم اللي ناهبينه وسارقينه وقاتلينه

اللعب مع الكبار

حلقة من بطولة علي حسن خليل وغازي زعيتر، باختصار اللي بده يلعب مع البسين بده يلقى خراميشه، امانة سر مجلس النواب اكيد رفضت رفع الحصانة عن الشباب الطيبين، بس هني ما نسيوا له اياها للقاضي صوان طلبوا كف ايده عن التحقيق بسبب الإرتياب المشروع، ما حدا ارتاب ب ٢٧٥٠ طن نيرات امونيوم بالمرفأ، بس ارتابوا من الادعاء عليهم.. على كل حال القاضي علق التحقيقات ١٠ ايام على مهلكم شو النا عليكم، كبروا الحجر على بعض لحد ما تضيع حقوق العالم لا هي اول مرة ولا رح تكون آخر مرة

امير الانتقام

حلقة من بطولة جبران باسيل وسعد الحريري، الحريري بده ينتقم من جي بي اللي ما بكن له كل الحب، هيدا الانتقام اللي نجم عنه هدر بالتراضي ٤٢ مليار دولار، وكهرباء مقطوعة ١٢/٢٤، وصفقات مشبوهة، ما ممكن تمرق بلا موافقة رئيس الحكومة وبالقليلة غض الطرف عنها، منيح اللي ما كان حب متبادل.. هيدي العلاقة كمان محكومة بالصلحة بالنهاية، ولو في بيناتهم بواخر وطيارات خاصة.

الرجل الذي فقد ظله

الشيخ سعد متقمص دور حامل الامانة، عم بطمن ماكرون، خود وقتك وصح ع مهلك مبادرتك بأمان، واصلا لشو العجلة؟ البلد بألف خير بلد رئيس حكومة واحد عنا ٢ تصريف اعمل ومكلف، واتنيناتهم مش عارفين يديروا البلد، بس معنا وقت الشعب عم بحضر حاله لسهرة راس السنة، والاسعار هالسنة عال ١٥٠٠ ما تغيرت الاسعار عن السنة الماضية.. يمكن لان ممنوع الرقص

الاراغوز

من بطولة سجعان قزي، يا ريت بس الكاميرا تلقط لنا مثلا اول ما التقى قزي بالحريري ببكركي، اذا سلم عليه او لا؟ واذا رحب فيه او لا؟ وعلى كل حال مش دفاعاً عن الرئيس السيلفي والبلد خلفي بس حسسني سجعان انه حقق نصر الهي على الحريري

يا عزيزي كلنا لصوص

من بطولة المصارف، من اخراج رياض سلامة، هندسة لصوصية جديدة، لحرق قلوب العالم مرتين على شقى عمرها، من الاسهم التفضيلية، لعروض بتجميد الدولار مقابل دفعهم بالتقسيط، والهدف الرئيسي من ورا كل هيدي الطروحات تحويل الموديعين لاصحاب اسهم وسندات ليصيروا الخاسر الاكبر بتفليسة المصارف، لان بصفتهم مودعين الهم الاولوية باسترجاع اموالهم في حال اعلان الافلاس

المال والبنون

من بطولة وليد بيك، يعني انتو مستقلين زعامة من ٣٠٠ سنة تقرروا تمحوها؟ بصرف النظر اذا الوريث قادر او مش قادر، عنده كفاءة او لا؟ هيدا كله تفصيل؟ حدا بيعرف شو اسمه ابنه لتيمور لنبلش نعود اولادنا عليه؟ طالما الزعامة عم تضرب بال 4th genenaration كلمة تانية بعد ومنغيرلها اسمها من المختارة للجنبلاطية والقوي يحكي.

على الهامش كان في وقفة اعلانية مع جريدة الاخبار اللي عنونت السعودية سنة سابعة عجز، يا حرام على السعودية موازنتها بس ب 264 مليار دولار، يا دلي انا حرقوا لي قلبي من جوا.. كيف بدهم يكملوا حياتهم بهالظروف. نحن بلبنان بس نوعى نحط موازنة كل شي ١٢ سنة مرة، بكون الميزان التجاري محلق بالسما..

اما الحلقة الابرز هيدا الاسبوع كانت بعنوان الفتوّة

من بطولة سليمان بيك فرنجية، مؤثرات صوتية للقائد الاول اوف اوف اوف بالبلد وفرقة الزقيفة. سليمان بيك جابها من الاخر، فيك تحاكم غيري وغير اتباعي، انا الشريف العفيف النظيف.. خارج المساءلة وفوق الشبهات، الوحيد اللي فاهم شو عم يصير بالبلد، مع الثوار بس هني مش عارفين مصلحتهم، حركاتهم فوضوية وبلا طعمة.. وباختصار (...مقطع زياد انت بتعرف عالم يا حكيم وغيرك بيعرف عالم) هو سليمان بيك بعفويته نموذج صارخ عن الزعيم، هيدا الزعيم اللي بعلم حدوده، بدكم تتمرجلوا تمرجلوا بمناطقكم اوعى منطقة خيك وما تجربونا.

ان شاء الله موت اذا عم كذب بس يا بيك انا مش خايفة، بالرغم من انها الحلقة ٧٥ من خليني ساكتة وهيدا رقم بذكر بالتاريخ المشؤوم ما غيره بلبنان، بس شو بدي اعمل لك انا قوية هون بالاستديو اللي مساقب انه مش بمنطقتك، بفدرالية او بلا فيدرالية، عندي حكم ذاتي..

وقبل ما اختم ما تفكروا نسيت حلقتنا نحن الشعب، اللي ما بيلبق لها الا عنوان افواه وارانب، العالم راكضة واللقمة والدوا راكض قدامها، او ممكن نختصرها بأغنية النعي الشهيرة

كتاب حياتي يا عين

خليني ساكتة