خليني ساكتة ٧٧- ما بعرف مين الاسوأ انتم او الـ ٢٠٢٠... وهيدي توقعات الـ ٢٠٢١ !

خليني ساكتة

تم النشر في 3 يناير 2021


ما زبطت معي

للأسف صار اكتر بكير من اللي كنا متوقعينه

افتكرتها انكم رح تكتفوا بسرقتنا ونهبنا طلع الاجرام بنفوسكم اقوى صفاتكم

ما بعرف مين الاسوأ انتم او ال ٢٠٢٠، بعتقد ما في أسوأ منكم٢٠٢٠، بعتقد ما في أسوأ منكم

الملفت انكم عايشين حياتكم وكإنه ما في شي صاير وبعدكم عم تتصرفوا كإن ما في شي يمكن الشي الوحيد اللي تفوّق على اجرامكم هيدي السنة هو وقاحتكم

على كل حال ما بدنا نبقى عم نندب حتى بآخر حلقة من السنة، مش كرمالكن كرمالن يعني نحن بحق لنا نحس حالنا عايشين

وبما انه السياسيين ما عارفين لا لوين رايحين او لوين آخدينا اكيد العالم ناطرة وجوه الغراب وتوقعاتها

فضروري اسبقهم وحط كم نقطة شايفتها لل ٢٠٢١،

بحسب مواقع الكواكب والفلك هيدي سنة الميزان، الحمل، والجوزاء، ركزوا معي يعني سنة العدل اللي بلش يظهر بأواخر الـ ٢٠٢٠ لان سليمان بيك ميزان.

الحمل رح يرجع مرفوع الراس على البيزنس، ويعمل مصاري بعد ما ضاق فيه الحال عالاخر، مين برجه الحمل يا ترى من الزعماء، آه ايه رئيس السيلفي والبلد خلفي، والله صار بدها شوية دولارات، القعدة برات الحكم مش موفاية معه، ما هو وقاعد جوات الحكم المعتر وصار عالارض يا حكم... صراحة شيخ سعد بحاجة للحظ يوقف حده يعني مش بس شركاته فلست وهو فلس لا وفلس بلد بكامله بادارة حكومته.. معوضين شيخ سعد، شو رأيك تاخد لك شي موقف تاريخي بالـ ٢٠٢١ مثلا ترجع تصالح جي بي وتردوا بإيدك عالحكومة، هيك وهيك انت مفكر حالك غير معني بكلن يعني كلن وراجع تشكل حكومة.

الجوزاء يعني عالجوزاء انا بقل لكم صفات البرج وانته حزروا مين، صاحب هيدا البرج بيستلم وزارة بيطلق وعود بكهربا ٢٤/٢٤ ما بتجي بيشتري بواخر بملايين الدولارات ما بتكفي، بيرجع بيستلم وزارة من مهامها تحكي مع الخارج بتقوم دول العالم بإمها وبيها بتقاطعنا.. هو بحكم برجه دايما في الشي ونقيضه يعني مثلا كان بده يشتغل وما خلوه برافو برافو هيدا جي بي، لا ومش بس جي بي برجه جوزاء وعنده وجهين، خده عندكم مثلا الحالكم بأمر الليرة وقائد الهندسات اللصوصية الابرز بالعالم، وفي كمان النائب والوزير السابق واليد اليمنى للرئيس بري على حسن خليل، هيدا وجه الاول ضروري بتشكيل الحكومات المتعاقبة من سنين لهلق اما وجه التاني ما بينطال فهو مطلوب بجريمة العصر اللي ارتكبت بالمرفأ من جهة وعلى لائحة ابرز الفاسدين بالعالم من جهة تانية ومن جهة تالتة عراب الـ ٧٪ بوزارة المالية... بس الـ٢٠٢١ حاملة خير للمجموعة طالع جي بي، حبيب الشعب، هالسنة اقوى من السنة الماضية وبعد ما رفع اسم لبنان عالي على لوائح العقوبات، بقوم بزيارة تاريخية على البترون وبيتجرأ يمشي بجنينة البيت بلا ما يكون خايف من حدا يفاجأه بالهيلا هو، رياض سلامة فبنافس بونزي على اكبر نصبة تاريخية، واهم جامعات اقتصاد بالعالم بتدرج اسمه بمراجعها بصفته المصرفي الذي سطا على اموال الشعب بالداخل والخارج. اما علي حسن خليل، فبسجل منصب تاريخي من خلال مسامحة القاضي فادي صوان وتركه بمنصبه.

كله منيح قدام برج السطل هيدا قال بيمرق من نفق مظلم لينتقل بعدها إلى دائرة الضوء، مين من نفس البرج الرئيسين عون وبري، يعني رح نتسلى كتير وهالسنة رح نعرف شو يعني الرطل برطل ونص اللي اطلقها الاستيذ اواخر الـ٢٠٢٠. انا بقول هيك وهيك اورانوس ضاهر من جوبيتر لعند الدلو الرئيس بري رح يعزم المجموعة الحاكمة على المجلس ويحطهم تحت الاقامة الجبرية لحد ما يردوا اللي سرقوه، اي شي على عيار الريتز السعودي من بطولة الله القائد نبيه بري لان للامانة ما شفت حدا قده ضد الفساد هالسنة وبعدين قلبه مع الثورة والثوار يعني لولا حرس المجلس وعين التينة والخردق بالعيون كان بيستاهل جائزة نوبل للسلام لدوره الراقي بدرء الفتنة.

على الهامش برج العذراء مش مبين لا بين اللي سنتهم هالسنة او بين اللي سنتهم مش منيحة، يعني برج المرشد الاعلى المحلي، بده ينتبه ع صحته اهم الشي الصحة، متل الكرامة والعنفوان.. وجود المشتري مع زحل لصالحه بالـ٢٠٢١ بياخد موقف تاريخي باعلان القرض الحسن البنك المركزي الشيعي الاول بالعالم، وشعاره الموت لاميركا والنصرة للدولار.

اما الابراج اللي رح يبقى عندها صعوبات فهي العقرب والاسد، يعني الحكيم والبيك، البيك مش زابطة معه ما بقى عم تركب، هيدا جوبيتر ضاغط ما بقى عم ينفع النط من خط لخط ما هي واضحة زيح الاستراتيجية مش دايما عم يلبي قد زيح التكتيك، الحكيم صار بده روداج، بس انا بقول رح ياخد موقف حاسم بال ٢٠٢١ ويرتقي فوق الجراح ويرجع يصالح بعبدا كرمال مصلحة المسيحيين.. لان الحصة المسيحية ما بتحمل

ان شاء الله موت اذا عم كذب بس بقي كل زعيم بهالبلد خايف على حصة طايفته، لصار الشعب كله ناطر الحصص الغذائية خليني ساكتة