خليني ساكتة (٨٠). - سويسرا عم تفتري على رياض سلامة.. والأخوين غانم بالمرصاد!

خليني ساكتة

تم النشر في 24 يناير 2021


كنت ناطرتها من مين مكان بس مش من سويسرا

معقول؟ بعدين ما فهمت شو فهم سويسرا بالاقتصاد وبتحويل الاموال والنظام المصرفي؟

انا من يوم يومي كنت شاكة بالسفارة السويسرية كنت حاسة وجودها عالاراضي اللبنانية مشبوه انه منقوشة ما وزعوا ايام ثورة ١٧ تشرين هلق فهمت هالصمت

من حظنا انه الاستاذ جورج غانم، ما بيقبلها ع ضميره، او كنا بقينا مضللين بهالكم تهمة اللي سويسرا قررت تفتري فيهم على الحاكم بأمر الليرة

Entre temps

صار الوقت يعرفوا بسويسرا انهم ما بيقدروا يفتروا على خريج ماريل لينش اللي ضحى بشبابه واجا ب ٢٣ مليون دولار على مصرف لبنان وبسبب تفانيه بالعمل من الطبيعي يكون عنده شركات واموال

الاسبوع شهد الحدث العالمي الابرز، وراح ترامب، واجا بادين. ووليد بيك قد ما تحمس لبايدن كان باعت علم الحزب الاشتراكي على حفل التنصيب.. ولك يا جماعة ما شبعتوا تنصيب؟؟ عن جد يعني لهون وصل الاستهتار بعقول العالم. وبعدين وحياة اللي بدك اياه فهمنا انك صحبة مع بادين، خلص يا شيخ سعد ما الك الا ترد على البيك صاحب صاحبك بالنتيجة صاحبك

ويا جبران وحزب الله ارضوه لجنبلاط بالحكومة بزبط لكم اموركم مع صديقه، ما سمعتوه لبايدن بحفل التنصيب، لما وجه له تحية لوليد بيك؟

وبي الكل بيض لنا وجهنا قام بالواجب باسمنا وهناه لبايدن

‏قال له: أتطلع الى العمل مع فخامتكم في اطار من التفاهم والاحترام المتبادلين مع التمسك بقيم الحقيقة والنزاهة والعدالة والحرية والديمقراطية الأساسية التي نتشارك فيها مع الشعب الأميركي الصديق والتي اشرتم الى كثير منها في خطابكم الرئاسي

باختصار طمن له قلبه لبايدن، حرام ما هو هيك جديد على عالم الحقيقة والنزاهة وبعدها بلاده طالعة من ضربة بالحرية والديموقراطية.. بعد لازم فخامتك تتصل فيه وتعلمه كيف يتحمل مسؤولية شعبه ويأمن له حياة كريمة وكيف يطبق الدستور ويشكل حكومات

على كل حال الخبراء بلبنان اكدوا انه بادين كان بحاجة لهل الدعمة المعنوية لان مَش كل يوم بيجيه هيك برقية من بلد معظم سياسيينه نصابين وفاسدين.

على الهامش حركة مكوكية لحسان اكبر انجازاتي من بيت الوسط ع بعبدا ع عين التينة، بالذكرى الاولى لتشكيل حكومته المستقيلة، هلق بعد ما عرفنا اذا الشيخ سعد تخطى موضوع الفيديو المسرب او لا

بس الاكيد انه لحسان اكfر انجازاتي بكون قال له ما تزعل منه للرئيس ما كان قصده انك كذاب كذاب انه هو هيك بدلع اللي بحبهم حتى مرة قال له لجبران انت واحد كذاب ما هو بعزك كتير.. بس احزروا شو قال حكومة تصريف الاعمال ناوية تنجز الموازنة لما تزعل البنك الدولي وتأخر المساعدات اي متى ما منعرف انه صارت مأخرة بالقليلة ٤ اشهر بس المهم النية

لا بد من الوقوف عند اطلالة وائل بو فاعور ودفاعه المستميت عن المواطن وصحته وتوجيه تحية اله على هالموقف من واقع القطاع الصحي هيك لاول مرة بيتمنى الواحد من كل قلبه يجي شي وزير صحة متله يبقى بالوزارة شي سنتين ونص بيقلبها رئسا على عقب وبربي المستشفيات الخاصة والحكومية وما بخلي مواطن بحاجة يشحد حقه بالطبابة، او مثلا ممكن يكون وزير شؤون اجتماعية، انا اكيدة لو كان عنا واحد متله بوحدة من الوزارتين او لو بو فاعور بيستلم الوزارتين مع بعض ببطل اللبناني مضطر يختار اذا بده يموت من الجوع او من كورونا.

على سيرة المساعدات الاحزاب عم يرشحوا شي مازوت، شي ادوية كورونا، شي استيراد لقاح، وشي استجرار تعاطف.. ويعني حتى طوني فرنجية دخل عالصورة وعم يجرب يجيب الادوية مساعدات ما دول العالم المتقدمة هيك بتعتمد عالزعامات والاعاشات كل واحد يهتم بجماعته وطايفته

بس نحن كلنا ايد وحدة وضد الفيدرالية والتقسيم

اجتماعيا اشتباك على انترنت واشتراك كهربا، دولار ما بقى يعجبه ينزل تحت ال ٨٨٠٠ واللبناني غاشي والبلد ماشي

بس شو همنا التراشق السياسي داير والاعلامي داير واهم انواع التراشق هو السياسي - الاعلامي هيدا اللي بحطك ما بدي كون رأيي من رأي الفاسد ولا رأيي من رأيي المطبل بس بترجع بتتذكر معادلة كلن يعني كلن بيرتاح ضميرك

ان شاء الله موت اذا عّم كذب بالرغم من كل شي حكيته بس بعده الموضوع الاهم ما راح من بالي

بحب قول لسويسرا انتو ممكن بتفهموا بالثواني بالعقارب بالدقايق بالساعات بس بالحسابات ابدا مش زابطة معكم معقول ضاق بيعينكم ٤٠٠ مليون دولار؟ صرتوا بدكم تحققوا ليه تحولت؟ واذا تبييض اموال او بس اموال منهوبة؟

وبكرر شكري للاخوين غانم على تنبيهنا من عدم الوقوع فريسة المؤامرة السويسرية، بالافتراء على الحاكم بامر الليرة وعلى خيه ومساعدته

بعدين من كل عقلهم رح نصدقهم ونكذبه؟

زلمة بهالشفافية بهالنزاهة بهالعقل التكتيكي الدقيق صانع الهندسات اللصوصية الابرز بالعالم رح نكذبه ونصدقهم؟

اصلا لو نحن بدنا ما منقدر لان اولا منخاف نضر باقتصاد البلد وتانيا نحن طموحنا يكون ضميرنا مرتاح متل ضمير الاستاذ جورج

خليني ساكتة