خليني ساكتة ٨١ - أصفهان الفوقا وواشنطن التحتا حرّكوا الشارع بطرابلس... والغرف السودا بعهدة سويسرا!

خليني ساكتة

تم النشر في 31 يناير 2021


شموخ المدينة

عذابات الناس

استغلال الجوع

صورة غريبة

تحريك الشارع

طابور خامس

ممولين ومندسين

عناوين لاحتجاجات طرابلس بيتخللها نثر وشعر والكثير من الحرص، حرص عالصورة، حرص عالبلدية، حرص عالمحكمة الشرعية، حرص عالاملاك، حرص عالصرح التربوي.. بس الانسان تفصيل

هلق انا عم بالغ كان في حرص عالانسان كتير كتير لدرجة الحكومة بدها توزع حصص غذائية على ٥٠ الف عيلة فقيرة.. طب يا حريصين، يا انسانيين، يا اصحاب الضمير وين كانت هيدي الحصص الغذائية قبل الاحتجاجات؟ واخيرا خضعتوا للحرك الشارع لان اللي حرك الشارع اولا هو الجوع، صح؟ اذا في جواب تاني يعني الحل ما بكون بحصص غذائية

الاميركان وصلوا على الدبابسة والعوينات وزقاق الحمص وضهر المغر وحركوا الشارع هونيك، هول تحديدا مندسين بطلب من شعبة واشنطن التحتا هيدي الجبهة تحركت ضد العهد القوي الغاية منها بس انها تنكد على العز اللي معيشينا فيه، وتزعزع الامن والاستقرار اللي مأمن لنا اياه حزب الله من عدم تغلغل الاسلاميين المتطرفين لحياتنا، وتغطي على انجازات الصهر المعجزة بحرف النظر عن رياض سلامة اللي جي بي شخصيا كان ورا تحريك ملفاته بسويسرا.

في جبهة تانية كشفها الحريري وجنبلاط وغيرهم هيدي الجبهة تم تحريكها من شعبة اصفهان الفوقا هيدي تكفلت بتحريك اهالي المهاترة، عقبتي الكوت والاحدب، الحارة البرانية والتربيعة، هول مهمتهم نزع الbackgroud بصور رئيس السيلفي والبلد خلفي، خلخلة صورة الوحدة الوطنية بقيادة القوات اللبنانية، وهزّ صورة الاستقرار الممتدد على قياس الوطن برعاية وليد بيك.

على كل حال وبلا طول سيرة انا مع محاكمة فورية لكل المسؤولين والمعتدين اللي اخلوا بأمن طرابلس، ولكل اللي حركوا الشارع والمعروفين بالاسم والصورة،

ميشال عون، نبيه بري، سعد الحريري، حسان دياب، نجيب ميقاتي، محمد الصفدي، علي حسن خليل، فؤاد السنيورة، غازي وزنة، سمير الجسر... وكل الوزراء اللي تعاقبوا على وزارات المالية، الشؤون الاجتماعة، الصحة، التربية والتعليم، العمل.. كلكن يعني كلكن مسؤولين وانتم المجرمين الوحيدين، انتوا وكل الاحزاب اللي علقت واللي تريثت بالتعليق

طرابلس افقر منطقة على ساحل المتوسط، باحصاءات من ال ٢٠١٥ يعني لما كانا بعدنا قادرين ناكل ونشرب بشكل عام، اكيد مش من صالح حدا اليوم ينعمل دراسة جديدة شو وضع طرابلس او غيرها من المناطق.

طرابلس قالت اقوى كلمة بعد ١٧ تشرين صرخت بأعلى صوت يوم اللي شالت كل صور الزعما عن حيطان مبانيها، يوم اللي قررت تفرجيكم حقيقة الجوع اللي عايشته.

لا الاميركان ولا الايرانية ولا الاتراك حركوا طرابلس اللي حركها انتو، فسادكم وهدركم للاموال، وغياب المخططات الاجتماعية والاقتصادية لبلد بكامله طرابلس جزء صغير منه.. وما حدا منكن يفكر انه منطقته حصن حصين على هيدا النوع من المندسين اللي تحرك بطرابلس، بكل منطقة بلبنان رح يطلع مين ينتفض لحقه ولكرامته لان نحن ما بدنا منكم مساعدة ولا إعاشة نحن بس بدنا حقنا حقنا انه نعيش ببلد فيه الحد الادني من حقوق المواطن، ما بدنا خبزكم بدنا حقنا بإننا نرجع مصرياتنا ونشتغل وناكل بعرقنا، هيدا اللي عم تقوله طرابلس وانتو استعملتوا الرصاص لتسكتوا اهلها

اليونيسيف قالت في ٧٠ طفل تأذوا بهول الايام، هول تحديدا محركتهم سفارة انعدام الامل والمستقبل، اليونيسيف عدت الاطفال اللي انصابوا، بس ما حسبت الاطفال الجوعانة واللي عم بتنام بلا اكل والاطفال اللي بلا تعليم وبلا طبابة.

على كل حال لا بد من توجيه شكر لكل مسؤول من جمهورية لبنان، اللي وقف حدنا وتضامن مع اهلنا بطرابلس، استنكر وشجب وطالب، بيطلع كل واحد منهم بيحكي كإنه هو شي سفير سلام بالامم المتحدة، او شي متفرج على مدرج الالعاب الاولمبية. فجأة اهل طرابلس صاروا اهلهم، هيدي اخر مرة تذكروا يقولوها بالانتخابات، وكان حريص كل الحرص على عدم تشويه صورة طرابلس التسامح، وكل مين مد ايده على جيبته يتبرع لاعادة تأهيل المحكمة الشرعية والبلدية، مين احق بهول التبرعات؟ وقبل ما نتشدق على المباني الاثرية اللي احترقت يا ريت نلقي نظرة على العالم اللي عم ما بقى معها تطعمي اولادها.

على الهامش، وليد بيك من بعد ما ريح ضميره ونفض ايده من اليمين الاميركي، تبرع بمليون دولار للهيئة الصحية الدرزية، وجمهور الممانعة هتهم لاهالي طرابلس انه هو كان متلهم جوعان لحد ما اجا نبيه بري والسيد حسن وشبعهم، وجزء تاني من جمهور الحلف الاصفر الليموني طالب القوى الامنية بانها تقتل العالم اللي بالشارع، على كل حال مع الوزير محمد فهمي ما توصي حريص.

وهول المندسين بطرابلس سببوا بإنوا لبنان يتراجع ١١ مرتبة على سلم الشفافية مع البوسنة والهرسك ومالاوي ، وصلنا للمرتبة ١٤٩ بالفساد من اصل ١٨٠، منشد همتنا شوي ومنوصل للمراتب الخمسة الاخيرة.. وهيدا كله بفضل الله ورياض سلامة اللي الكوكب كله متآمر عليه والوحيد اللي بيعرف حقيقة ثروته وثروة عيلته منذ الازل هو الاعلام اللبناني والدليل انه سويسرا طلعت بالمرتبة السادسة بالشفافية بالعالم..

على فكرة قرب اللقاح يوصل هلق ما بعرف اذا من حظنا او من عدمه انه في مجموعة من اللبنانيين مش واثقين باللقاح الاميركي، ما حدا بيعرف يمكن هيك يبطلع لنا دور، وعلي امل ما يكون مصيره متل مصيره الادوية والمازوت وحليب الاطفال المهرب لبرا ومفقود من جوا، وزير الصحة قال انه اول شي رح ياخد اللقاح الرؤوساء الثلاثة اسوة بباقي قادة العالم ان شاء الله موت اذا مع كذب بس اللي عنا بيشبهوا كل شي الا القادة، والدليل انه البلد اللي قايدينه بيشبه كل شي الا دول العالم خليني ساكتة