خليني ساكتة ٨٢ - ما متنا بعد بس شفنا مين مات... تحية الى لقمان سليم!‎

خليني ساكتة

تم النشر في 6 فبراير 2021



منكون مفكرين حالنا عم نحكي معكم

عم نخاطب ضميركم

عم نحسسكم بوجعنا

منكون مفكرين حالنا عم نخطي خطوة لقدام بالتخاطب معكم

بتفهيم كم انه كل اللي بدنا اياه بلد عادي طبيعي نعيش فيه ونربي اولادنا ونموت موتة طبيعية

بتقوموا بتغتالوا

بتغتالوا واحد هيك بكاتم صوت بطلع جريمتكم اعلى صوت من كل اللي قلناه وكل اللي حكيناه وكل اللي عم نجرب نقوله

طب كيف بدنا نكمل؟

حتى لو استسلمنا كيف بدنا نعيش بيناتكم؟

نحن عالم عنا كلمتنا عنا قلمنا عنا صوتنا انتو عندكم تهديدكم عندكم وعيدكم عندكم اسلحتكم وعندكم كاتم الصوت

اغتيال لقمان سليم منه اجرام ولا وقاحة اغتيال لقمان اجرام وقح

وقاحته مرتبطة بالاستقواء وقاحته هي باختصار شعار "لأننا نستطيع"

اللي اغتال لقمان مش ذئب منفرد

هيك جريمة مش جريمة شخصية مش سرقة

مش انتحار هيدي جريمة سياسية

بخمس رصاصات من الحقد الدفين،

بدكم ايانا نسكت فهمنا

متل ما بدكم نسكت عن حق ضحايا ٤ اب

انتم معتمدين على اننا رح نخاف ونسكت وننسى او نتناسى

جريمة لقمان سليم اجت بعد ٦ اشهر على جريمة المرفأ وبعد فترة من اغتيال جو بجاني

استراتيجيتكم معروفة بتحولوا النظر عن جريمة بجريمة بتلهوا العالم اللي بتذرف دموع ع فايسبوك ومواقع التواصل الاجتماعي وبعد كم يوم بترجع لهمها كيف بدها تاكل وتشرب وتعيش بلا ما تنقتل

قبل ما انهي بدي اتوجه لجمهور الممانعة الجمهور الليموني اللي بلش يتعرف على طوائف اخرى من بعد ورقة التفاهم واللي اكتشف وجود لقمان سليم من بعد ما قتل، وهاله انه اسم لقمان كان مذكور بويكيليكس كخيار شيعي تالت..

واتحفونا بإنه لقمان ما كان همه السيادة والاستقلال، تفضلوا يا استاذة يا محترمين يا جمهور العهد القوي قولوا لنا وين صار التحقيق بجريمة المرفأ وبجو بجاني وين صار التحقيق بالاموال المختلسة..

وجمهور اليسار اللي راضي بنهج المقاومة والنهج مش راضي فيه لما اعترضتوا على تشبيه اغتيال لقمان باغتيال مهدي عامل بدي اسألكم شو كان عنده لقمان غير كلمته شو كان عنده غير فكره يحارب فيه؟

اما الاهم فجمهور الطايفة المحرومة والمستهدفة، اللي عم يشمتوا ويضحكوا ويقللوا من هول الجريمة اللي تم ارتكابها.. ما بعرف اذا لازم عاتقكم او اشفق عليكم، لان عملية اغتيال لقمان سليم ما صارت بيوم ٤ شباط عملية اغتياله بلشت من كتير زمان يوم اللي اتهم بانه عميل اميركي وبالتالي هدر دمه بطريقة غير معلنة

بس سؤال سامعين بمهدي عامل؟ سامعين بحسين مروة؟ هول كمان كانوا عملاء اميركيين؟ بدكم تعرفوا انتو ليه محرومين؟ لان كل مرة حدا من الطايفة بحاول يحكي كلمة حق ما بتعجب ارباب الطايفة بينتقل لان المطلوب انكم تبقوا رهائن تبقوا مسيرين من قبل زعماء مقررين انهم هني اولياء امركم.

ومعليه بدنا نحدد اذا الاستهداف الكوني للطائفة هو بالتصويب على المقاومة او على معارضينها؟ لان من المستحيل يكون بالاتنين سوا، وتأهيل الارضية مش بس لتقبل القتل الا واعتباره حق بس لان الاخر مش بنفس الخط العام للطائفة عم بحوِّل مجتمع بكامله لشريك بالجريمة

هيدي جريمة جديدة، جريمة سياسية، جريمة اغتيال رأي معارض، كل تهمته انه رأيه ما بيشبه رأي القاتل لا اكتر ولا اقل

اغتيال لقمان رسالة، وصلت

صوت سلاحكم اقوى منعرف

صوت اغتيالاتكم اقوى منعرف

انا بعترف اننا مش قدكم ولا قد اجرامكم

انا بعترف انه كل مرة منتفاجأ بكمية الحقد اللي حاملينه علينا

بدكم ايانا نسكت فهمنا

بس اذا سكتنا بتكونوا ربحتوا واذا حكينا يمكن تقتلونا

شو قال لكم لقمان قبل ما تقتلوه

اخر كم دقيقة انتو ومعه بالسيارة شو كانت كلماته الاخيرة

انا بقول انه قال لكم انا اللي عم قوله واعمله عم جرب ابني بلد الي والكم

ما بينفع نكون عايشين بدولة مخطوفة

هيك قل لكم؟

شو الكلمة اللي استفزتكم اكتر اللي كان حاكيه؟

او اللي قالوا انتوا ومعه بالسيارة؟

كيف خطفتوه؟

انتو ومكشوفين الوجه؟

او كنتوا مخبيين وجوهكم متل خفافيش الليل؟

بس سحبتوا سلاحكم انتبهتوا انه ما عنده الا الفكر والكلمة يواجه فيها؟

وين الرجولة باللي عملتوه؟ وين توازن الرعب؟

بس رفعتوا كاتم الصوت اختبرتوا شو يعني العين تقاوم المخرز؟

ان شاء الله موت اذا عم كذب لقمان حاربكم صوت عالي وبوج مكشوف براس مرفوع

ما تخبى ورا اصبح ولا تسلل بالليل ولا استعمل سلاح كاتم

خليني ساكتة