خليني ساكتة ٨٥ - "حياد" البطريرك للتغطية على ذكرى"الدولة النفطية".. واللقاح "مؤامرة مشبوهة" على الفرزلي!

خليني ساكتة

تم النشر في 28 فبراير 2021



السرفيس ل ٥٠٠٠

خفض وزن ربطة الخبز

الموتور بالدولار

الكهرباء فواتير بدها تلعلع

شو بدي قل لكم هيك منخبركم

بتمنى عليكم تبقوا بالبيت ما حدا يتحرك او يعترض او يزعج خاطره ما في شي محرز بعده زعيمك واولاده بخير انت قوم طلاع ع فاريا علاق بالعجقة والعاب بالتلج حتى لو ما قادر تدفع على البيستات مش قصة المهم الصورة اوعى يقطع موسم التلج بلا صورة ما بتعرف يمكن يجي يوم وزعيمك يلاقي طريقة يسرق التلجات وانت تقول صحتين ع قلبه

هلق بموضوع اللقاحات انا بقول الموضوع اخد اكتر من حجمه هو باختصار وزير مستقل اخد قرار سيادي، سيادة واستقلال بتصرف واحد شو بدكم اكتر من هيك رقي بالتعامل؟ واذا رجع ذكركم انه هو مشكلجي رقم واحد، بليز يعني ما يكون غشكم بالكرافات. هو بعلبكي اصيل وغازي زعيتر لانه لبناني اكتر من غيره بحق له ياخد اللقاح قبل غيره. ما افهم بعد هالهجمة على شو تحديدا؟ كلهم ١٦ نائب و١٦ واحد بقصر بعبدا،

اما بخصوص الـ 6239 واحد ملقحين من خارج المنصة لشو كل هالهمروجة، كتير سهلة تذكروا انه الزعماء عنا عندهم بعد نظر وفي انتخابات وهيدا الموسم رح يكون برعاية اللقاحات وشعارات من نوع :

ضمان لقاحك باعطاء صوتك للائحة الفلانية، او لقاحك الخرزة الزرقة للائحة العلانية، وما تقعدوا تتبكبكوا انه هيدا الحزب لقح اكتر من غيره ما بكرا التحالفات السياسية بتعدلها يعني خدوا مثلا اذا تحالفوا متل ما تحالفوا بانتخابات اللجنة الاولمبية امل - مستقبل - كتائب ضد تيار - قوات - طاشناق - كرامة يعني لو مثلا جمهور امل ملقح اكتر من جمهور الكتائب بالنتيجة عدد الملقحين من جمهور التحالفات رح تتعادل، بتمنى كون قنعتكم حتى يبطل زاعجكم موضوع التلقيح من خارج المنصة.

اما موضوع التلقيح بالبرلمان، هيدا كمان امر طبيعي والنواب تعبوا ٧ ايام ليعملوا القانون استكترتوا عليهم لقاح؟ هو للأمانة في منهم فوق ال٧٥ سنة، يعني كل رؤوساء العالم تطعمت على الهوا مباشرة علما انه رئيسنا اكبر من الكل بس ليه يا ترى اخد اللقاح بالسر؟ وليه النواب كمان؟ لان ببساطة عند الزعماء بلبنان الطبع بيغلب التطبع، صاروا معودين على اقتناص الفرص لما نقول السرقة وقبة البرلمان افضل مكان واأمن مكان لهيدا الموضوع وكان المفروض منتلقح سوا ومندفنه سوا متل ما تقاسمنا البلد ودفناه سوا بس طلعوا هول اللبنانيين تبع السوشيل ميديا وبضهرهم الاعلام وبلشوا حكي وتوجيه اسئلة مشبوهة لشخص باهمية النائب ايلي الفرزلي، اسئلة بتخدم ال سي اي اي وكي جي بي سابقا وجهاز المخابرات الاستوني اللي مجتمعين على مؤامرة وحدة هدفها الاول والاخير تدمير وتشويه سمعة ايلي الفرزلي والقضاء على مستقبله السياسي ما مستقبلنا من مستقبله متل ما تاريخنا من تاريخه، بس هو ساروج كومار ما عارف حاله مع مين عم يحكي ولا مالك مكتبي ولا المذيع ع دولتشيه فيليه.

كله قطع معي بس انه اللقاح مكافأة للجهد وبالتالي معليه يقطعه المنصة بظن فيها ظلم مش للشعب اللبناني لا ابدا فيها ظلم لرياض سلامة اللي ما فيه متل انجازاته انجاز معليه يعني هو من كم شهر بأسبوع واحد عمل لكم ٣ اسعار للدولار واحد منهم هلق عم يضرب ال ١٠ الاف ليرة، غير الدولار الطلابي والدولار السياحي ودولار الدعم بس ما في تقدير للمواهب.

على الهامش حدا انتبه لي عالا integrity تبع جي بي؟ بكل فضيحة اللقاحات اسمه ما طلع ولا مرة، بالرغم من انه شبوبية وهيبة وقيمة لدرجة بيحكي مع الفاتيكان شخصيا ما بحاجة لوسيط، اصلا مين هو البطريرك ليمرق عبره، عبالي اعرف شو فيها الرسالة اللي قالوا انه فيها شرح حقيقي الي عم بصير بلبنان بعيدا عن افتراءات التعطيل الحكومي والتشبث بالعهد اكيد بكون باسيل قال للبابا انه كان بده يبعت له الرسالة من قبل بس ما خلوه

بس لما وصلت القصة عالحياد باطل ما بقى فينا نسكت ما نحن دولة ذو وجه نفطي مقاوم ما فينا نحن نقعد عالحياد لا بد من فتح جبهات قتال بالداخل بالخارج نحارب العدو وفينا نحارب الصديق كمان نحن اقوياء والحياد للضعفاء لا للحياد انا بقول لازم نرجع هيك على ايام الجوارح والكواسر أو الفايكنغ كف يأخذنا كف يجيبنا قال حياد قال. هلق في تفصيل انه الواحد اذا بده يطلب مؤتمر دولي لازم يكون اول شي عايش بدولة او عالقليلة بشبه دولة.

هلق اكيد بيبقى الحلم الاكبر بإنه الحياد يمتد ليمحي الخط الأحمر عن ملاحقة الفاسدين وعن حماية المناصب، وبإنه نبقى نشوف الزحف على صناديق الاقتراع وعلى التصويت لدولة مدنية، مش بس لتكريس السلطات الدينية.

كله هيدا تفصيل، نحن بعد سنة على اعلانا دولة نفطية، ما ملاقيين اللقمة مش انه لاننا بلد شحاد لا سمح الله وزعمائنا او بيسرقوا او بيهدروا اللي يحدوه باسمنا لا لان اللقمة مش مهمة متلها متل الكهربا والدوا والانترنت هيدي تفاصيل بالصورة الشاملة الكاملة اللي مرسومة للبلد في مسيرة ما منقدر نخلي حدا يأثر علينا، خدوا مثلا وزيرة الاعلام بحكومة تصريف الاعمال عندها افتتاح اطول حوار على زووم وبتقولوا لي ما في حركة بالبلد

على الهامش الصديق مروان نجار بعت لي مساج وقال لي انه منقول لقاح مش لقاح لان في دواء مش دواء

وانا بما اني ما قادرة شوف الا الداء اللي ما اله دواء بهالبلد قعدت حسبتها براسي طلع شو فيها اذا كان اخدوا اللقاح يتلقحوا ما صار الهم ٣٠ سنة ملقحين بخلقتنا شو رح يفرق هلق؟

وجمهور الزعيم لازم يلتقح كمان ابدا هو لازم يكون محصن جاهز حاضر لاي خروج عن القطيع واللي بيرفع صوته شوي اكتر عادي هو بيلقحه بيبطحه هيدا لقمان سليم مثلا شو عملوا له كل اللي عملوه انهم لقحوا لا اكتر ولا اقل

وخليكم قاعدين بالبيت خصوصي من جمهور الزعما خليكم ع فايسبوك وتويتر اذا حدا خدش شعور زعيمكم بحرف هشموا حطموه دمروه بحلفكم بالغالي عندكم اوعى حدا يتحرك او ينزل عالطريق او يطالب باسقاط هول العالم طلعوا ع فاريا انزلوا هالبحر اسهروا ضهروا او فيكم كمان تهاجروا بس لما تلاقوا شي بلد يلمكم بغيابه دول افريقيا الوسطى ما تنسوا تطلعوا تنظروا علينا بالكرامة والعنوان والرز بحليب

ان شاء الله موت اذا عم كذب بس الحد الادنى للاجور صار ٧٢ دولار هيدي بس لاننا دولة نفطية، هلق بكرا بس يضرب الدولار بال ١٥ الف ما رح نخلي غامبيا واريتريا والسودان يسبقونا خليني ساكتة