خليني ساكتة ٨٧ - عالورقة والقلم: خبرونا شو اعطيتوا البلد ونحن منخبركم شو اخدتوا منه.. ومنتحاسب!

خليني ساكتة

تم النشر في 15 مارس 2021



بعرف اني كل الوقت ببقى عم نق علينا نحن الشعب وانه لازم نتحرك وما نطلع من الشارع ونعلي الصوت وهيك

بس خلص غيرت رأيي، لان من ميلة لا حياة لمن تنادي ومن ميلة تانية هيدا الاسبوع حسيت في زخم اقوى بكتير من كل زخم للشارع

هو للصراحة هيدا الاحساس بلش مع انتهاء الاسبوع الماضي لما اعلن الوزير التربية المجذوب الاضراب، ومن بعدها هدد حسان اكبر انجازاتي بالاعتكاف، وبعدين كرت المسبحة طلع وزير الداخلية محمد فهمي بشرنا انه الامن ما بقى موجود وبعدين وزير الطاقة غجر المحسوب على تيار الافقار والتعتير قال لبنان مهدد بالعتمة آخر الشهر وبالتالي لا كهربا ولا انترنت ولا تعتير ولا شحار هيدا الاكستنشين تبع الوزير الما خلوني ومستشارينه اللي صاروا وزراء من بعده كمان ما خلوهم ما خلوهم يعملوا اي شي غير انهم يهدروا ٤٣ مليار دولار بس هو جي بي النضيف العفيف كان حاطط شرط على البواخر اذا ثبتت اي رشاوى هيدا تحديدا اللي بيتسمى بالمصري قالوا للحرامي احلف رد إجاني الفرج

على كل حال لانه الضرب بالميت حرام خلونا بالمهم، الاقتراح بقول التالي لازم كل الشعب ينسحب من الشارع ويطلع يقعد ببيته ما يقطع ولا طريق ولا يفتح تمه ويعطي فرصة لهالوزراء والنواب ينزلوا هني عالشارع يعبروا عن رأيهم يطالبوا بحقوقهم، انه معقول وزير داخلية ما قادر يكون عنده امن او وزير التربية ما قادر يفتح المدارس، هني اول شي شخصيات عامة بعدين عارفين احسن منا واكتر منا شو عم بصير بالكواليس فبعتقد رح يقدروا يعبروا كتير افضل مما نحن عم نجرب نعمل، هيك تخايلوا الوزراء والنواب وكمان عمو سليم صفير والحاكم بأمر الليرة صاحب الهندسات المالية الاكثر فشل بالعالم رياض سلامة بيقدر يقود فرقة الهجمة عالمصارف كلن سوا عم يهتفوا يمكن هيدا الامر يوصل صداه للقصر الجمهوري لان الهيئة الدوبل فيتراج هونيك ما عم يوصل صوت الشارع.

وهيك افضل شي لان بيقدر الجيش يتظاهر معهم لان قائده كان الاكثر تعبيرا عن كل اللي عم نمرق فيه، وسمعته رنة السؤال للمسؤولين شو بعدكم ناطرين؟ يعني تخايلوا هيك الجيش بصوت واحد مع الزعماء لانه عيب ضربهم او التصدي الهم هني مش من عامة الشعب يمكن الصوت يودي اكتر

هلق اصلا رئيس الجمهورية مش من مهامه انه يلتهي بالمطالب الصغيرة تبع الشعب فمفلت علينا حزبه، هيدا الحزب اللي مختلف مع الحريري على وزيرين بالزايد. وهيك كل واحد ماسك طرف من حبل وعم يشد لجهته رئيس الما خلونا ورئيس السلفي والبلد خلفي من جه تانية، واللي هني اتنيناتهم غير مأسوف على انجازاتهم لا بالطول ولا بالعرض ولا واحد منهم فلح بشي.

المضحك المبكي انه نحن بذكرى ١٤ آذار تتذكروه هيداك اليوم؟ يوم اللي فكرنا انه نحن تحررنا من الاحتلال السوري وكنا اوليردي قاضيين عالاحتلال الاسرائيلي وفكرنا اننا رح نبلش مسيرة بناء دولة المؤسسات، اي اي اي لآ هيدا الشي ما صار، ومش بس ما صار الا متل ما شايفين وصلنا على مرحلة ما بعد الانهيار.

هلق ممكن نحضر لمرحلة ما بعد بعد الانهيار، الدولار غير عاداته وبالوقت اللي كان يهدى بالويكاند هلق بلش يحس حاله فاضي فبلش يلعب عالكبير بالويكاند يعني ضرب بال ١٢٠٠٠ ٢٠٠٠ ليرة اكتر من الاسبوع الماضي، وهو أي واحد بس بيقرا اخبار اقتصادية بيعرف انه هيدا شي كتير طبيعي وما بده الموضوع جهبذة، لان الدولار بس يوصل على مرحلة معينة بده يصير الانهيار عامودي ببطل يطلع ٢٠٠ و٣٠٠ بصير يطلع بالالاف، بس لان نحن عنا دولة مسؤولة عم يوقفوا منصات التعامل بالدولار وكمان صرافين، وهو حتى حدا متل ميشال ضاهر بيعرف انها مصيبة اقتصادية كبيرة، وبتودي لكارثة حقيقية بسعر صرف الدولار، بس المهم الصحة.

على سيرة الصحة بتحس الوزير حمد حسن، هيك بينه وبين حاله بقول منيح اللي هالشعب ذاكرته متل السمكة الدهبية كل ٣ ثواني بينسى شو صار، او كان بعده عم ينسأل لهلق عن اللقاحات اللي توزعت عن غير وجه حق، بس هلق عم يوعينا لضرورة وهب الاعضاء، معاليك اول شي مش لازم يبقى اطباء ووممرضين بالبلد ليقوموا بهيدي العمليات وتاني شي بظن من هلق لنموت بموتات تسمح لنا نتبرع بالاعضاء ما رح تلاقوا تلاقوا جثثنا مجوفة، لان رح نكون بعنا اعضائنا لناكل ونشرب.

هلق متل الخلاف على كل شي من التاريخ للحاضر الشبيبة الطيبة مختلفين على الحل للمرحلة المقبلة شي بقل لك انتخابات نيابية مبكرة اولا وشي بقل لك تشكيل حكومة اولا، هلق المهم فاتوا القوات بمرحلة جديدة من التكتيك والاستراتيجية بالتكتيك قاطعوا جلسة مجلس النواب وهني ضد سلاح حزب الله بالمطلق وبالاستراتيجية هني مع ضبط سلاح حزب الله تحت قيادة الجيش وعدم اسقاط رئيس الجمهورية بالشارع، هو اصلا اللي بميز القوات عن غيرها من الاحزاب بلبنان هيدا التريث والعمق بالمواقف، بس اهم شي انه كل ما حدا من مسؤولينهم حكي بيسأل اللي بوجه انت قدمت قدي للبلد؟ يا ريت بس تقولولنا شو قدمتوا للبلد كل واحد فيكم انتو الاحزاب يحط على الورقة والفلم شو قدم للبلد وبالمقابيل نحن منحط شو اخدتوا من البلد ومنتحاسب.

آه ما هاي هي المصيبة انه نحن بدنا نتحاسب بس انتو ما بدكم نتحاسب، لان مثلا على سبيل المثال للحصر اذا جينا سألنا الوزير على حسن خليل عن شقته اللي عم يحكي عنها تبع المستندات وقلنا له من اين لك شقة بـ ٤ ملايين دولار على سبيل المثال لا الحصر، لان ما بدنا نحكي عن القصر بالجنوب وغيره وغيره شو رح يقلنا ابن حركة المحرومين البار؟ شو بده يكون الجواب؟

بس مين شعبوي قده قصدي انساني قده، طالب للعسكر بمليون ليرة بالشهر، وهو كمان ما بده الموضوع وزير مالية سابق ليعرف انه هيدا مطلب كارثي لان بالجهبذة الاقتصادية يعني طبع عملة وبالتالي رفع سعر الدولار لبلا حدود وبالتالي هيدي المليون ليرة رح تكون مصيبة اكبر على العسكر مش العكس.

على الهامش قال الكيان الصهيوني مركز على دراسة شخصية السيد حسن وعم بقول عنه انه هو شخصيا مش فاسد، بس التقرير خلص هون ما تطرق لأي شي خصه بالحزب او وزرؤه او نوابه او حتى حمايته للفاسدين.

من ميلة تانية الفرنسيين مستائين من الزعماء اللبنانيين اللي عم يدمروا بلدهم وع شوي رح يرفعوا معنا شعار كلن يعني كلن، بالحركة الدولية الحاج محمد رعد رح يزور موسكو، بعد ما الحاج ابو سعيد الخنسا ترأس وفد حواري مع بكركي وتطرقوا للحياد وبعد الاجتماع لقد ما الحوار كان بناء انضافت كلمة "الايجابي" على الحيا وهلق صرنا عم نطلع لحياد محدد وهو ايجابي مش اي حياد بيمرق بدربنا فينا ناخده.

إن شاء الله موت إذا عم كذب بس بهالخبصة انبهت كلتة لبنان القوي يعني العونيين بشكل عام انه نحن اللبنانيين بحاجة لنقر الزواج المدني كرمال التعايش المشرك وبناء دولة مدنية على امل ما نوصل ببناء الدولة المدنية لنفس المحل اللي بنينا فيه دولة المؤسسات خليني ساكتة