خليني ساكتة ٨٩ - نحن أول بلد "نفطي" يشحد "النَفَس"... مشكل عالتلت المعطل ببلد كله معطّل!

خليني ساكتة

تم النشر في 28 مارس 2021


بيحكي الواحد سياسة او ما بيحكي اصلا شو فارقة معكم اذا حكينا او سكتنا

اصلا وين بعد في سياسة بهالبلد الواحد يحكي فيها طب كتير منيح طلع عون قال الحريري

شكل او استقيل طلع الحريري قال له امضي او

استقيل رجع رؤوس الحكومات اجتمعوا وحسان اكبر انجازاتي

ما في يوسع صلاحيات تصريف الاعمال بحسب اوامر المرشد الاعلى المحلي

من دون تفسير الدستور والتفسير عند بري وبري اصلا ما بحبه لحسان

الحريري محسوب عالسعودية والاميركان بس عون اتصل بالبخاري

والبخاري اجا من باب المستحى وحكيوا عن الوفا والوفا مش موجود

ورجع عون اتصل بشيا وشيا راحت عند الحريري والحريري راح عند البطرك والبيضة عند الجاجة. والجاجة بدا قمحة. والقمحة عند الطحان. والطحان بدو الخشبة. والخشبة عند النجار. والنجار بدو المسمار. والمسمار عند الحداد. والحداد بدو الفحمة. والفحمة بالطاحونة. والطاحونةمسكرة

الطاحونة مسكرة متل ما الافق مسكر بهالبلد. عايشين عالخوف الخوف من الجوع الخوف من الطفر الخوف من البطاله الخوف من المرض الخوف من الموت ع ابواب المستشفيات

وصلنا شحنة اوكسيجين انقسم البلد بين مرحب وبين جميلتهن عالبحر، طلع انه المصنع كان ممنوع

يصدر اوكسيجين ع لبنان فرحنا اخذنا هبة هلق شكرا عالهبة بس معليه بدي كون وقحة

وقول ما نحن خيرنا سابق

مغرقين السوق السوري بالمازوت بالسلع المدعومة بالدولار فاتحين التهريب على مصراعيه فمتل ما بقوله يا ما الها ستي عند جدي

ومع هيدا شكرا انه حتى الاوكسيجين طبقتنا السياسية عم تشحدلنا اياه عادي

واصلا الرئيس السوري معروف بأديشه حنون لقي عنده كم نفس زايدين بعت لنا اياهم

القصة الاساسية بهيدا النظام والطبقة السياسية الحاكمة انها كانت كل الوقت واهمة العالم بالديموقراطية، احكوا اللي بدكم اياه بالسياسة بس ما حدا ينتبه انه البلد اجتماعيا وخدماتيا مش متوفر اصلا.

البلد مسروق ونحن مقسومين البلد منهوب ونحن مختلفين والوحيد اللي راضي هو الزعماء ورجالاتهم على الارض من وزراء ونواب، عندهم اسهال كلامي فظيع بعبوا ساعات من البث المباشر والمسجل، اسهال كلامي مطعم بالاحساس مع المواطن والنق اللبناني الاصيل، بيطلع الزعيم او زلمته بتصير انت كمواطن بدك تتعاطف معه انه هو عم يتعب ويشقى كرمالك وانت ما حاسس بسي بتطلع بتظلمه بكلن يعني كلن، والاهم من هيدا انه شقك الطائفي بينقح عليك، فكمواطن بدك حقك بس ما بدك حقك يأثر على الطايفة لان حتما المطالبة بحقك رح تطال تقصير زعيمك ونواب زعيمك ووزراء زعيمك.

كلنا يعني كلنا عم نعاني من وضع المستشفيات الحكومي المزري وفواتير المستشفيات الخاصة الملعلة وصولا لعدم توفر الدوا والاحتكار باستيراد الدوا والمعدات الطبية بس صار في اوكسيجين

مع مين كانت وزارة الصحة يا ترى آخر ٢٠ سنة ما رح نقول ٣٠، علما انه الدين العام بآخر ١٥ سنة مع عودة تيار الافقار والتعتير على كنف وطن النجوم ارتفع من من 38 مليار دولار في العام 2005 ل ٩٠ مليون دولار بال ٢٠٢١، على كل حال وزراة الصحة اللي ما بده يخبركم عن انجازاتها المتعاقبة بموت العالم على ابواب المستشفيات والفواتير الهائلة وانعادم ضمان الشيخوخة، تنقلت بين حركة امل، الحزب الاشتراكي، المردة، القوات اللبنانية وحزب الكرامة والعنفوان حزب الله.. مش عيب علينا نقول كلهم يعني كلهم طب وينهم العونيين شو خصهم شوفوا ما بحاتهم جابوا وزير بهالوزارة.

اكيد لان ما كانوا فاضيين مركزين اولا واخيرا على الكهربا لان بعد البحث مش مهم عدد الوزارات المهمة نوعية الوزارات يعني في حزبك يكون عنده ٥ وزارات وما يقدر يسرق قد حزب تاني عنده وزارة او زرارتين.. نحن قلنا ما بدنا نحكي سياسة من هيك بس بدي احكي عن الكهرباء اللي ما عم تجي اكتر من ساعتين ببعض المناطق، وسيطرت اصحاب المولدات على كل مفاتيح الحياة اليومية اللي ما عجبه السعر يضرب راسه بالحيط، هيدي الوزارة والانجازات المتتالية فيها المسؤول عنها حركة امل تيار المستقبل وطبعا من دون مواربة تيار الافقار والتعتير او الوطني الحر بشخص رئيس الما خلونا ومستشاره ومستشار مستشاره ومستشارة مستشاره بس على كل حال مش مهم المهم صار عنا اوكسيجين بعد فينا نتنفسه

مش مهم اصلا ضو بدنا بالكهربا اذا ما عم نقدر نأمن زيت او بيض او دجاج او لحمة ناكلهم بهيك اوضاع واسعار مولعة يمين شمال، هيدي عند مين؟ وزارة الزراعة على مين مرقت هالوزراة يا ترى؟ مرة تانية حركة امل، حزب الله، الاشتراكية بس شو خصهم هني اذا ارتفع سعر الدولار وانهارت العملة انه ما عم افهم شو مطلوب منهم

يللا هيت نسأل وزراء المالية، مين هني؟ حركة امل والمستقبل ووووو تيار المستقبل وحركة المحرومين اللي تحولوا وزرائها ونوابها لخبرة بالحرمان على مساحة الوطن بس اصلا شو بدنا بوزراة المالية ما هي المشكلة بالبطالة والاقتصاد اللي ما عم تخلي العالم تطلع مصاري لحد ما تشغل الوزارة، وهو الوزارتين القومي السوري، حزب الله، الكتائب واكيد العونيين اما وزارة الاتصالات فكانت حكرا على تيار المستقبل والاشتراكي لحد ما دخل تيار الما خلونا عالنص واخد حصته منها

هيدا المشهد بينسحب على كل الوزارات السابقة واللي بعدها عم تتوالى ع لبنان وعم يطالبوا يشكلوها، والعالم عايشة بلا حليب لاولادها وعم تقبر بعض على غالون الزيت المدعوم وعلى رغيف الخبز اللي مش بس بيغلى اسبوعيا الا بيتقلص والدولار ب رولير كوستر طالع نازل.. الوعود اللي كل يوم بيطلعوا فيها ما شي منها رح يركب النهب المالي بادارة كبير اللصوص الحاكم بأمر الليرة مستمر وتمدد العمل بالمنصة لأيلول المقبل بالارتكاز على افشل هندسات مالية بتعصى على اكبر نظام اقتصادي بالعالم، وصارت مميزاتنا متعددة اهمها اننا بلد نفطي شحاد نفس، بعدين على شو النق يساونا ما يسوى الشعب الايراني اللي عم يتهافت عالدجاج المدعوم.

ان شاء الله موت اذا عم كذب بعدهم عم يتخانقوا على التلت المعطل على اساس انه بعد في سي مش معطل او عاطل بهالبلد صار الحكي كتير صعب بمشهد عم يعيد حاله من هيك خليني ساكتة