خليني ساكتة ٩٠ - العهد القوي بصهر فولاذي ثلاثي الابعاد!

خليني ساكتة

تم النشر في 4 أبريل 2021



كتير عبالي اعرف مين ناصح الرئيس بالحكي هلقد،

يعني اسبوع عابق بالكلام المؤثر

المؤثر مش بالمعنى العاطفي لا بالمعنى influencing هيك بس يسمع الواحد رئيسه بهالتصريحات قلبه بينشرح

بيتحمس مش بس عالحياة وعالمواطنة كمان

يعني كيف بدي قل لكم صار فينا نرفع راسنا بين الدول المجاورة ونشوف حالنا عليهم هلق صحيح مثلا بالسعودية بدهم يصرفوا بال ١٠ سنين الجايين ٢٧ ترليون ريال عالاستثمارات بس نحن عنا ال asset الاهم عنا كنا مفكرين عنا صهر معجزة طلع الصهر فولاذي

فخامتك يطول بعمرك ويمده بس الخوف انه بعد عمر طويل اللبنانيين ما يكون عندهم دموع بقى لا يبكوها عليك ولا على لبنان، لان يوميا بيبكوا على ابواب السوبرماركت والمصارف والمستشفيات والمطار هني وعم يودعوا اولادهم ويتمنولهم ما بقى يرجعوا

بس بحيي التفاؤل اللي فيك واللي هو مستمد من تفاؤل المرشد الاعلى المحلي، الاهم من هيدا فخافمتك انك بعدك عم توعدنا انك مصر تختم عهدك وانه بآخر سنة ونص رح تشيل الزير من البير معليه فخامتك كيف بدي قل لك يعني لو بدها تشتي كانت غيّمت

وللأمانة انا معك لازم تندم على ترؤسك للجمهورية ما نحن شعب جاحد ما منستاهل هيك رئيس، اما بموضوع البستان ما بعرف انت اخبر لو ورته وكنت انسان عادي اذا كان حليفك وعامود عهدك رح يسمح لك تزرعه لان حسب المنطق بستان جدك يقع في حارة حريك عاصمة الدويلة الابية

ولا نحن ما منقبل نحمل مسؤولية ال ٩٠ مليار دولار نحن بس بدنا نسألك شو بتعرف عن آخر ٥٢ مليار منهم من بعد ما صار تيار الافقار والتعتير جزء من السلطة ومن بعدها عهدك القوي، بس الاهضم من مقابلة الرئيس هو تعليق مروان حمادة اللي اعتبر انه عون خرب احلى بستان وهو لبنان، نسي الوزير السابق تقل حزبه بالمحسوبيات والزبائنية والمحاصصات والادارة الشفافة للوزارات يا دلي عليهم ما في وزير من الحزب الاشتراكي فات ع وزارة وضهّر بإيده شي

انا بقول فخامتك لازم تغير العهد من العهد القوي للعهد الفولاذي خصوصي انه قال صهرك الفولاذي ينزل ينوّر التحقيق عند المحقق العدلي قال هو تحت القانون ،هيك وما صار ولا تدابير استثنائية الا كرمال امنه، هلق هو للأمانة النكتة الاساسية على ما يبدو انها موجودة بمكتب المحقق العدلي، على بالي اعرف بشو بحقق بالتحديد حتى ولا مرة منسمع توقيفات او ادعاءات او اي شي بس بيستمع يمكن افضل نسميه ال psychologue العدلي بتحسهم هونيك بروحوا بيتلقحوا عال divant بيحكوا بيحكوا بيحكوا بتخلص ال session وبفلوا بلا يفوتوا بالموضوع اصلا

هلق مارغيريت تاتشر العهد قوته الخارقة بتمتد لتحصين سابع مستشار من مستشارينه يعني بيكفي ستاتس على ثورة map بإنه احد مستشارينه منصور فاضل عم يشرب قهوة ليتحرك امن الدولة بكاملة لعدم اقلال راحته تماما متل لما تحركت قاضية السبعة ودمتها وقت توقيف ابنه بميزان ذا مواصفات محددة واطلقت سراحه لان عنده مقابلة بالسفارة

على سيرة اخلاءات السبيل حضروا حالكم الاسبوع الجاية القاضي طارق بيطار عم يحضرنا نفسيا انه رح يخلي سبيل كل اللي خلصوا تحقيقاتهم من دون الخضوع لضغط السوشيل ميديا والاعلام بدكم نشارط اول إخلاء سبيل من نصيب مين رح يكون؟ انا بقول من نصيب شخص بتطاله الابعاد الفولاذية وجيوبه الانفية حساسة عالشوب والربيع جربوا انتو تحزروا مين ومنشوف مين بيربح

المرشد الاعلى المحلي اكد انه في حلحلة حكومية، وهيدا انعكس ايجابا على سعر الدولار والقمح والبنزين بس ما انعكس على سعر المواد الغذائية او اي اسعار اخرى، دخل على قاموسنا مؤشر صحن الفتوش مع اقتراب شهر رمضان وتبين انه سعر صحن الفتوش ارتفع ٢١٠٪ هيدي السنة، وكنا مع عيد الفصح شهدنا اسعار قياسية لاسعار المعمول وهيك احتل لبنان اغلى اسعار بالاكل بافريقيا والشرق الاوسط.

على الهامش بتتذكروا الاوكسيجين اللي طعمانا اياه النظام السوري الاسبوع الماضي اي هيدا الاسبوع قبض بداله نفط قضموا البلوك رقم واحد، هلق علت الاصوات المعارضة والمطالبة بترسيم الحدود وترجيع النفطات بس عراب النفط الفولاذي تلمذ الرئيس النجيب كان تعليقه الاكثر عمق بين الكل اول واهم شي ذكر انه جرب من قبل يحكي بالموضوع وما خلوه وتاني شي اكد على ضرورة حل المسألة وفق حسن العلاقة مع الدول المجاورة

الرئيس بري متمسك بعمل المجلس لاخر يوم وعم بقر قوانين للمحاسبة واسترجاع الاموال المنهوبة وجلسات جدية ومناشتة بين مصرف لبنان ووزارة المالية حول التدقيق الجنائي وهو الرئيس بري تحديدا مش بحاجة لكل وجعة هالراس بيقدر بليستة وحدة يرد ٥١٪ من الاموال المنهوبة ويكشف بالقليلة ٧،٥٪ من الاموال التانية هيك ب finger snap

هلق في نائب قوصوا وطلاع جابها من الاخر قال هو حريص عليها ما نحن عارفين انكم عم تكذبوا علينا وعم تبلفونا وانتو عارفين انه نحن عارفين بس كل واحد منكم بحاول يتذاكى قال هو الحريص على المسار والمصير معنا..

ان شاء الله موت اذا عم كذب بس نواب الاخضر اليابس اعطوا موافقتهم على قرض للكهربا جديد بقيمة ٣٠٠ مليار ليرة الاهم من هيدا انه نواب الامة حسبوا القرض على ١٥١٥ بالوقت اللي دولار بالقليلة ١١٥٠٠ ليرة

يعني الـ ٢٠٠ مليون دولار على انهم ينسرقوا من اموال المودعين لان ما في غير تعبير او تفسير للبدعة الجديدة خليني ساكتة