خليني ساكتة ٩٢ - تقنين جديد.. وقضاء عايز حبوب اعصاب مع الاستقلالية!

خليني ساكتة

تم النشر في 18 أبريل 2021



ما بعرف اذا المشكلة بالمشهد اللي ما عم يتغير او المشكلة بالوضع اللي ما عم يتغير او المشكلة بالمفردات اللي صارت قليلة وسخيفة على وصف المشهد او المشكلة فيي

عايشين بطاحونة ظروف معيشية بديرها مجموعة من المتعجرفين المتغطرسين والاهم من هيدا كله الفاسدين

المضحك المبكي بالموضوع كنا بالسياسيين اللي عم بطالبوا بكشف الفاسدين فاتوا رجال الدين عالخط وصاروا عم يطالبوا معهم هيك يعطيك الامر احساس بإنه طالما البطريرك او المفتي قبلان او المفتي دريان هني اللي عم بقولوا هيك يعني قرروا انه ما في حدا عليه غطا.. بتقرب بتسمع عن قرب، بتلاقي بتفاصيل الحكي انه رجال الدين متل رجال السياسي عنده الفاعل مستتر تقديره هو، والاهم من كل هيدا انه هيدا ال "هو" بالذات" منن، مع التأكيد على عدم الكيدية بالتعاطي مع الملفات بإشارة مستترة الى انه اوعى تطلع براس ابن الطائفة والباقي عم يتجولوا.

على سيرة التجول المواطن عم يتجول بين السلع المدعومة وكراتين الاعاشة، وهيدا المشهد زاد على المفردات اللغوية، عبارات متل سقط قتيلا خلال معركة حصوله على كرتونة الاعاشة، او وقوع خمسة جرحى في اشتباك الزيت المدعوم. طب انا عندي سؤال انه انتم اللي عندكم استعداد تعملوا عملية انتحارية لتجيبوا كيس حليب لابنكم او كيس عدس مدعوم للمدام انه ما بيجي براسكم انكم تشاركوا بتظاهرات مطلبية تشيل ما تخلي من هالسلطة؟ لان ضايعة الطاسة بشكل نهائي بين مفهوم الكرامة والذل على ما يبدو.

بس كمان ال ٢٠٢١ عم تبتسم للبنان، مش بس ادخلت مصطلحات جديدة بنوعية الضحايا، الا مثلا صار عنا تقنين جديد.. يعني انا بقول ممكن بعد نلاقي شي دولة بغياهب القرون الوسطى عانت من تقنين الكهربا، بس انكم تلاقوا دولة سباقة بابتكار تقنين البنزين اي انا ما بظن هيدي انوجدت قبل.. خصوصي اننا دولة "نفطية" ذات سيادة وعم ترسم حدودها مع الجنوب والشمال. وبعدين بالقليلة تقنين الكهربا معروف تعودنا عليه وحفظنا اوقاته، وكمان انه الموتور بتدفع بتاخد.. اما تقنين البنزين فما اله وقت من جهة ومن جهة تانية بالقطارة يعني ضارب شوي ع مصارف كيف البنك بحدد لك سقف السحوبات اي محطات البنزين بتحدد لك سقف التعباية. والاهضم انه بقل لك ٢٠ الف انه بعبي ما بتتحرك الابرة لان على الغلا صار بيطلعلنا بال ٢٠ الف نقطين ونص ما بتلحق السيارة تشم ريحتهم.

عالسريع وزير الادمغة المهاجرة مصر على الامتحانات الرسمية، على اساس الطلاب بلبنان ما ناقصهم شي بحياتهم، وخصوصي العالم اللي تفجرت بيوتها وتشردت، والكهربا مأمنة اما الانترنت يعني المعلمة بتقول اول كلمة اونلاين والانترنت بكمل لحاله شرح قد ما قوي.. وعم ياكلوا ويشربوا يتغذوا معاليك بس بدي قل لك شي تتذكر هيدا الشهادة اللي بالاخر بيستلمها الشاب بالدعاية هيدا بحسب الدعاية وصل لهون قد ما شرب حليب.. اي معاليك هيدي المادة مقطوعة العالم ما عم تلاقيها لتعطيها لاولادها ليتفتح ذهنهم وينجحوا بامتحاناتك.

آه وعلى فكرة وزير السياحة ضارب بايد من حديد بوزارته وتحرك ضد موظف على ما يبدو انه متحرش قدم فيه بلاغ النائب زياد اسود ع تويتر.. بس معاليك سؤال هيك عالسريع شو صار بقضية ضرب واصف الحركة فيك تخبرنا؟

انه معقول مثلا نعلّق على هيك قصص وما نحكي عن انجازات الشيخ سعد؟ متل المكوك اسم الله عليه صار بروسيا، ومبسوط انه عم يستقبلوه كرئيس حكومة مش رئيس حكومة مكلف، وانه ما ركب بالفان متل الحج محمد رعد،

انا بقول بلش هالطقس يصير منيح بلكل تعملك لك شي مشوار عالمالديف او مثلا على ميامي تلتقي الحاكم هونيك يمكن كمان يرفع لك من معنوياتك شوي

بس احذار شو وين ما وصلت رح يقولولك الكلمة السحرية "اصلاحات"، هلق بس يقولولك اياها تذكر منيح انه الاصلاحات الها وجوه متعددة ابرزها مكافحة الفساد واستعدادة الاموال المنهوبة والتدقيق الجنائي بالسياسات المالية والنقدية ويا دلي لو بتحزر مين اللي رح يتحقق معهم. اي اي من بينهم صديقك الحاكم بأمر الليرة، اللطيف بالقصة انه مش بس في مطلب لبناني خجول بمحاسبته، لا وطلعه كمان بسويسرا حاطينه براسهم.

هيدي سويسرا الغرب كل عمرها بتغار منا نحن بالشرق، ما بدها ترحمنا، بتغار منا من نحن وصغار، وعم يقولوا بالتحقيق عندها انه الحاكم مختلس اموال من مصرف لبنان، هني بسويسرا اصلا ما بيعرفوا انه هو الحاكم من يوم يومه عنده اكتفاء ذاتي، ومش قاطعة عليهم السي في تبعه انه اجا ب ٢٣ مليون دولار علبنان، اصلا انا بظن عم يستدعوه مش لاختلاس الاموال، لاااا لانهم بدهم منهم الخلطة السحرية لتحويل ٢٣ مليون دولار ل ٤ مليار دولار بوقت قياسي، وكمان بدهم يدرسوا بمدارسهم الاقتصادية عن الروابط الاسرية بعلاقته مع خيو وعن الصداقات المتينة اللي بتحمل الدولار بيقلب بإيدك مليون متل ما صار مع الصديقة الصدوقة ماريان الحويك. انا بقول من بعد رياض سلامة معقول القضاء السويسري يطلب المدعي العام غسان عويدات ليستعين بخبراته القضائية كمان لان الهيئة فاهم تفسير مطالب الشعب ومكافحة الفساد شوي غلط وبدل ما يدعم استقلالية القضاء لااا قرر يكف ايد القاضية غادة عون .. وغادة عون اللي بتقدر تعطي القضاء السويسري دروس بالاستنسابية بفتح الملفات وكيف لا ترى الفاسد الا بجانب واحد، وكيف تؤله فريق كامل وتنزهه.. وكيف تنزل كوماندوس في الشعبوية بتحس القضاء ما عايز استقلالية عايز شي حبة كزاناكس.

على الهامش قال بي الكل ممتعض انه الحريري مقضيها شم هوا، طب انا بدي اسألك ولو فخامتك انه شو مضايقك؟ ما هيدا انت قاعد بيناتنا انه شو الفرق؟ لتكون مثلا حليت قصة ترشيد الدعم؟ او ازمة الدولار او البنزين؟ على فكرة في الوزير المقرب منكم مستشار مسشار المستشارة تبعت المستشار تبع رئيس الماخلونا عم يقول انه ازمة المحروقات بسبب تهريبها على سوريا

هيدي الها حل واحد توقف فخافتك على بلون القصر ببعبدا، اكيد مطلة على الضاحية تصرخ صوت للمرشد الاعلى المحلي وتقل له يحلها، لان ما الها غير حل، وفخامتك ما بعرف اي متى آخر مرة سافرت، بس مش غلط هيك فيك تمرق لك شي مرقة عالمطار.. ان شاء الله موت اذا عم كذب بس ما بضيع طريقه على فكرة بتقطع اول شي اول صورة كبيرة لقاسم سليماني تاني صورة لقاسم سليماني مع ابو مهدي المهندس من بعدها اعلان لشاي جديد بالسوق ايراني بعدين صورة لقاسم سليماني اكبر من اول وحدة و٣ اعلانات واحد لكاتشاب وواحد لمايونز وواحد لصوص للباستا كمان ماركات ايرانية وآخر شي صورة اكبر من كل الصور لقاسم سليماني وبتوصل... طل طلة على الديوتي فري تأكد من عدد السواح المتدفق، كمان اعملك كبسة على اماكن التصدير لان عم يقولوا عم يصدروا المواشي المدعومة.. خود بالقليلة موقف واحد من تهريب ادوية من تهريب سلع مدعومة من اي شي ونحن منكون ممنونين... على كل حال ما بدي تقلها عليك فخامتك بعرفك مشغول بأمور اعظم من هيك متل ترسيم الحدود من هيك خليني ساكتة