خليني ساكتة ٩٣ - الرمانة طلعت مليانة.. وبعائلة عون درب جلجلة الـ"ميني مرشد" شاهدة على عفته ونزاهته!!

Politics

تم النشر في 26 أبريل 2021


ما بعرف اذا انا لحالي حاسة انه اكبر عيلة بلبنان هي عيلة عون

هيك فجأة بتحس كل ال suspense بالبلد مرتبط بهالعيلة

القاضية عون الرئيس عون صهر عون حتى شاركوتيه عون

بتحس هيك بهالبلد يحق لبيت عون ما لا يحق لغيرهم، مساقبة انهم باعلى مناصب مثل قيادة الجيش ورئاسة الجمهورية، ولو مش مع بعض بنفس الخط السياسي بتفرع منهم عونيين صغار اكيد على راسهم الصهر ومن بعدين الوزراء والنواب والجماهير الغفيرة

هيدا الشعور كيف يكرس بس يصير في اشكال بين محتجين عونيين مناصرين للقاضية عون مع قوى الامن والاعلام، تقريبا قوى الأمن بتاكل اتلة والاعلام كمان، بس بالاخر بيجي بي الكل وبيعمل اجتماع امني لضمان حق المتظاهرين بالتعبير وبتطلع مثلا نائبة رئيس التيار صهر عون وبتغرد #القوة_الضاربة يلي نزلت لتكافح الشغب...بتنزل بالعادة لتكافح الإرهابيين...هل المواطن يلي عم يطالب بحقو... إرهابي؟؟... أو مظلوم ومسروق؟

انت هون كلبناني شفت خيك اللبناني عم يقوص بالخردق قدام مجلس النواب وعم بيخسر عينه وآلاف من المتظاهرين عم ينقلوا ع المستشفيات بسبب تصدي الأمن للتظاهرات من بعد ١٧ تشرين، وما سمعت ولا استنكار لا من بي الكل عون ولا من صهر عون او مستشار عون او نائبة صهر عون، دغري بتاخد موقعك كلبناني من تاني ام، مش لبناني عوني اصيل وبتصير تتمسك بمبادئك ما اكيد ضد الاعتداء على المتظاهرين مين ما كانوا، انا اكيد مع القاضي النزيه مين ما كان وبتصير تشطح تأملاتك واحلامك لانه القاضية عون تتمسك بفتح ملف الادوية الايرانية والقرض الحسن بالكسر بالخلع كيف ما بدها المهم يكون التفاني بنفس درجة التفاني بموضوع مكتف.

مش قليل هلق يطلع كل الاموال المنهوبة والنكبة اللي عايشها البلد بهالكومبيوتر اللي صادرته غادة قلب الاسد عون، وهلق عم يرجفوا بقصورتهم كلن يعني كلن.. لان هيدا الكومبيوتر هو القصة كلها، عندي هيك شعور انه الداتا اللي على لابتوبي اخطر من اللي موجودة على كومبيتور مكتف بس ليه لا خلينا ننطر ونشوف نحن مع كاشف الفاسد ظالما او مظلوما المهم ما يطلع كله حكي بالجو وبالون حراري لاستعادة جزء من شعبية صهر عون.

الاهم صاير المرشد الصغير، صهر عون، بيطلع لنا كل فترة، بيرشح عفة وعزة، بيعطينا تعليماته مين لازم نصدق لوين نتجه بالنفط بالتفكير بالتحقيق، مين نتبع، مين منا بيفهم مين ما بيفهم، والاهم الاهم يفسر لنا ليه نزلنا ب ١٧ تشرين وبخبرنا وما بعرف ليه بنزه حاله ولا كإنه سمع نشيد الثورة ب ١٧ تشرين

هلق للامانة نحن نطرنا المرشد الصغير من يوم زيارته للبطريرك لان لما قال من بكركي: لو السيد المسيح تنازل لما كانت هناك مسيحية... قول الحق والحقيقة يخلصاننا وسنبقى نشهد للحق مهما كانت الكلفة علينا... اما التفاصيل السياسية فنتحدث فيها السبت 11 قبل الظهر

وهو وعم يحكي كان شريط درب الجلجلة اللي مشيها عم تمرق قدامنا من المظلومية اللي لحقت فيه من مهندس مغمور لوزير عم ينطنط من وزارة الاتصالات لوزارة الطاقة للخارجية وحفي بالطيارات الخاصة واشتغل بلا موازنة لدرجة لهلق مستكترين عليه ٤٠ مليار دولار صرفهم بالكهربا بحسب موازناتهم هو ما طلب وبالاخر ما خلوه

وبتكتمل الصورة مع غريم صهر عون الشيخ سعد بالفاتيكان بتحس الايمان مشرشر بتحسه هومتل صهر عون متمم الوصايا العشرة واهمها لا تكذب لا تنهب لا تسرق، بعده رئيس السلفي والبلد خلفي عم يدور دورته المكوكية وبعدهم دول العالم بحوروا وبدوروا على نفس الوصية الاصلاحات لا وبزيارته عالفاتيكان كفنها اضطر الفاتيكان يطلع يسجل اعتراض على مواقفه الفظيعة.

وآخر نتائج الدوران معلومات بانه ام بي اس ما بده الشيخ سعد رئيس حكومة، وبس طلعت هيدي الخبرية بلشت اسهم الشيخ سعد تنزل، بس ع اساس السعودية هي اللي معرقلة الحكومة وعم تحشي راس سعد طلع سعد مش براس السعودية من الاول

ولإننا بلد ما منترك شي للصدف شغلنا المملكة كلها بالرمان، اي اي رمان متلت بلدي اصيل، هلق وزير الداخلية عنا قال انه عملية التهريب مش مقصودة وانه نحن كدولة عم نكافح التهريب بس بضل بيزمط من بين ايدينا قصص. ليك معاليك ممكن بالسعودية ما يصدقوكم بس نحن كشعب مصدقين لان منعرف انه في كتير قصص بتقطع من قدامك او تحت ايدكم وما بتنتبهولها متل الطحين الدولار الزيت المازوت نيترات امونيوم وهلق الكبتاغون.. واكيد من حقنا نطلب من المملكة انها ما تعاقب المزارعين كلهم كرمال تاجر مخدرات فلتان، وانه قرار منع التصدير رح يقضي ع اخر نفس النا، بس شو بدي قلكم ما هالمزارعين جزء من الشعب اللي عم يتعاقب بسبب فاسدين تماما متل ما نحن كلنا عم نتقاعب بسبب فسادكم كسلطة حاكمة. انا ما خصني ع فكرة حسان اكبر انجازاتي هو اللي قال انكم فاسدين والفساد ناخركم.

على الصعيد الاجتماعي مدير عام مصلحة الليطاني من تمه عم بقول انه في ٤٠٠ ل ٦٠٠ طن سمك افق عم ينباعوا بالسوق اللبناني، ووزير الاقتصاد سمح بتصدير القمح لانه مش خرج خبز الهيئة نسي استراتيجية الفريكة وانه منقدر نصدر القمح فريكة، في شي واحد انا مش حاملة همه هو انه الجراد عالابواب بالعكس شقفانة عليهم لان حرام الطبقة السياسية اوليردي اكلت الاخضر واليابس وما خلت لهم شي. ووعود بانفجار اجتماعي بعد رمضان بالتزامن مع رفع الدعم وبس الشعب بيتعود قالها كبير الناصبين وعلى ما يبدو معه حق.

على الهامش ايلي الفرزلي عم يلحق حاله ترك لبنان القوي شبع قوي الزلمة، وصار داير من مقابلة لمقابلة عم يفضح اكبر عيلة بلبنان وصهرها، وما بقى عنده شي الا يكفر عن ذنوبه بانه يروي ويروي ويروي بعتقد قريبا رح نشف له كتاب جديد عن تجربه مع العيلة. بس ضو ما عمل ما رح يوصل لعمق وليد بيك بالتفكير والحكي واهم شي بالتغريد، انا بدي اسأل تويت هول او فوازير انه ليه كل تويت متل اسرار الصحف بده يقعد الواحد يفك لها طلاسمها ٣ ايام وانت بتكون قاصد شخص معين او سميه او احمول التلفون ودق له.. ان شاء الله موت اذا عم كذب بس وليد بيك بيتكب تويتات بتلبق على الكل ليضمن اذا حدا رد عليه رد قوي يقل له مش انت المقصود هو.. من هلق ليقولها شي مرة وليد بيك فجة وصريحة انا خليني ساكتة

--