خليني ساكتة ٩٦- ما تخافوا ما بقى في شي تقصفه اسرائيل.. السلطة قامت بالواجب!

خليني ساكتة

تم النشر في 16 مايو 2021


اول درس اخدناه بكلية الاعلام انه الحدث بيفرض حاله بحسب القرب الجغرافي والاجتماعي والمعنوي

بس بالوضع الحالي صايبنا نحن اللبنانيين انه همنا مش بس على قدنا الا واكبر منا كمان.

هيدا اكيد ما بيمنع رجال المزايدات اللامتناهية من انهم يطلعوا ويراشقوا بعض شي بيعتبر حزب العزة والكرامة مقصر وشي بيعتبر انه اللي عم بصير بالداخل الفلسطيني ما هو الا دليل على ضرورة المقاومة وبينسوا المزايدين انه اذا قرر الحزب الامر الناهي بالبلد التدخل او فتح جبهة من لبنان فيعني على دنيتنا السلام.

والاهم من هيدا على صعيد الشعب في المتضامن مع قضية الشعب الفلسطيني حتى النخاع، وفي اللي هلق بهالحشرة بده يدفع الشعب الفلسطيني تمن الحرب الاهلية بلبنان وامتداداتها الاقليمية.

هلق تيما بخليني ساكتة، ملتزمة حدودها اللبنانية، والتعليق منها مرتبط بكل شي وانعكاسه على الداخل اللبناني. وبدي قول للشعب الفلسطيني، معليه ما تزعلوا لان نحن اصلا شعب مختلف على هويته واذا بحب حاله،واذا حب حاله اذا بده يتقبل جاره، فيعني انتم اعذرونا لان نحن حتى مش متل العرب التانيين، لان هوليك مثلا عندهم دول بقرروا سياساتهم وبيمشوا فيها نحن ما عنا لا دولة ولا شحار، من هيك ضايعين ومضيعين الدنيا معنا، وبأكد لكم في كتار معكم قلبا وقالبا ومع قضيتكم، بس كمان خايفين، ما بعرف اذا عيب نقولها على صوت عالي بس اي خايفين، خايفين من حرب ومقاومة العين للمخرز لان بكل بساطة ما بقى عنا عيون، ولا بقى عنا شي نخاف عليه الا ارواحنا.

مش قليل بعد كل اللي عايشينه نلاقي شي نقلق او نخاف منه، يمكن بعد كل اللي صاير فينا لازم نكون تعودنا، دولتنا لقت العدو الاسرائيلي الغاشم اله زمان ما ارتكب فينا مجزرة، قامت من شي ٩ اشهر ارتكبتها هي فينا.

والسلطة شايفة انه الكهربا من زمان ما انقصفت فقررت تعمل كل شي بقدتها لتقطعها، وآخر الصيحات تغريم البواخر ٢٠٠ مليون دولار قال بسبب السمسرات، طب انا معكم يا جماعة نحن مع المحاسبة بس انه نحن بس منحاسب اللي دفع الرشوة؟ طب مين اللي قبض الرشاوى ومضي على التلزيمات؟ ما اله اسم؟ او ما خلوكم تذكروه وتلاحقوه؟

لا الوقاحة اكبر من هيك بكتير، الوقاحة بإنه الدولة عم تتأكد من انه اصحاب الموتورات رح يأمنوا بديل للمواطن.

انتو من شو تحديدا مصنوعين؟ لا وبيجتمع وزير الطاقة مع وزير المالية والهم عين يبتشموا او يضحكوا. كيف يعني؟ اي ما الكم حق حتى تبتسموا ما بقى مسموح هالطريقة بالتعامل مع الامور

قولكم اذا لا سمح الله امتدت الحرب وشملتنا ممكن ينقطع البنزين، ونصير نوقف على ابواب الافران واللحمة طمنوني على اللحمة شو بصير فيها؟ الخوف كل الخوف يتطور الوضع ويأثر على الدوا والمستشفيات تقوم المستشفيات تأضرب وتبطل تستقبل مرضى، او الدوا ينقطع من السوق او ال ١٠ الاف مريض اللي بحاجة لاوكسيجين وكهربا ما يلاقوه.

بتحس اللبنانيين اللي عم ينزلوا يتظاهروا نصرة للقضية الفلسطينية، عم يعملوا تظاهرات استباقية مع حالهم.

على الهامش رئيس الجمهورية ووزير الداخلية وحاكم مصرف لبنان، اجتمعوا وتناقشوا بأجار البيت، ما حدا منهم تطرق للعقوبات على القرض الحسن، وبعتقد انهم حتى ضحكوا على سذاجة الاميركان بإنهم ما بيعرفوا انه القرض الحسن جمعية خيرية بالعلم والخبر تبعها ما بحق لها التداول بالاموال العامة، وطلعوا عم يحلفوا يمين انهم ما حكيوا عن الموضوع.

على الهامش العقوبات الاموروبية عالطريق وقال وزير الخارجية، عم يطالب الاتحاد الاوروبي يجي يسمع من السياسيين بلينان حتى ما تكون القرارات اعتباطية وسياسية وتقوي فريق على فريق آخر، على اساس انه هو وزير الخارجية محسبو اصلا على الصليب الاحمر بلبنان، ما المشكلة الاساسية انهم هني عم يفكروا ينقوا، ما عارفين انه العفن ضارب هالسلطة من راسها لكعب اجريها مرورا بكل صاحب قرار.

على سيرة القرارات والتحقيقات وين صارت داتا غادة قلب الاسد عون، مع اليافطات المنتشرة على طول الطريق je suis ghada aoun في هونيك تقرير قطع مرور الكرام انه الريسة فرغت ملفاتها عند الراهبة اغنيس بعد ما اجت لتصليها وقت اللي حكمها عارض صحي.. عندي سؤال واحد بس نحن وين عايشيين؟؟؟ بلد هيدا او مزرعة او كرخانة او شو تحديدا؟

ان شاء الله موت اذا عم كذب بس بعتقد حتى التقسيم والفيدرالية ما بقى يبنفعوا، صار لازم كل بيت يتحول لدولة، دولة قائمة بحد ذاتها عندها اكتفاء ذاتي من حاجياتها وتعيش على قاعدة كل من حارة ايده اله.. خليني ساكتة