خليني ساكتة ٩٧ - يا جبران اطلاع من الكادر!

خليني ساكتة

تم النشر في 23 مايو 2021


مش بس انتو صرتوا مسخرة الا عملتونا معكم مسخرة

التقارير بتقول بالحرف تبلّغت مراجع اقتصادية ومالية عالمية ان المؤسسات المالية الدولية باتت تصنّف لبنان في مرتبة ما دون الصفر بدرجات عميقة جداً مالياً واقتصادياً، وهذا يعني انّ انهياره حتمي ولن يطول الوقت لذلك، في غياب حكومة تسارع الى اتخاذ خطوات وقرارات نوعية تحول دون هذا الانهيار.

وانتو حردانين وبدكم مين يصالحكم. لا ومش بس هيك بتهددوا واحد بده يفضح والتاني ما رح يسكت، يا حبيبي انت واياه مين اللي قال لكم اي شي بتقولوه عنده اي قيمة؟ بعدكم ما فهمتوا وين وصلتوا البلد

اكيد رئيس الما خلونا بده يطلع قد ما في بالعالي، لان على ما يبدو انه صديقه رالف فيصل ما خلى كتير اشيا ببطنه والتسجيلات رح تسمعنا اسماء بموضوع البواخر عفيفة نظيفة شريفة.

بس كمان شو رح تفرق، رح تعتبروا الدنيا عم تشتي، صاير التعليق على الاحداث بهالبلد نكتة سخيفة، اذا المدعي العام المالي عنا بسيكياتر، فاتح جلسات استقبل وودع برعاية بن نجار.

ببساطة نحن علقانين رهائن بين ايدين طبقة سياسية اقتصادية قضائية متعجرفة فاسدة مجرمة ووقحة، هلق قال رئيس الجمهورية بهالحشرة حريص عالدستور وعم يرفع اللوم عن حاله

الرئيس عون بيستحق جائزة اوسكار من النوع الرفيع جدا على افضل دور تعطيلي على مر التاريخ، عن فيلم بعنوان كله يهون لتقطيع السنة الاخيرة من العهد القوي ونلاقي طريقة نجيب فيها الصهر المعجزة يستلم الكرسي، لان التوريث السياسي هو جزء من دستور الجمهوريات الديموقراطية بالعالم.

هالاسبوع ما لحقنا عليكم، للصراحة وقال كان رئيس الجمهورية راعي حفل بالمرفأ، رجع التغى بعد ما هستروا العالم واهالي الضحايا، عن جد ما بقى في مفردات لا بالعامية وبالفصحى توصف صلافتكم، يعني الرئيس بعده ما انتبه انه تحت عينه الساهرة راح اكتر من ٢٠٠ شهيد و٦٠٠٠ جريح و ٣٠٠٠٠٠ مشرّد واتدمرت نص المدينة بانفجار من ثواني ببلده، يعني اكتر مما اللي ارتكبه العدو الصهيوني الغاشم بحربه الاخيرة على غزة.. يعني باختصار لحد ما يتحاسب كل واحد مسؤول عن هيدا الانفجار او بالقليلة القضاء القوي متل العهد يسترجي يستدعي المقصرين ما بقى تقترحوا احتفالات بالمرفأ على دم العالم بالمرفأ ما بقى تقترحوا احتفالات على دم العالم.

يمكن تلاقوا الحلقة طويلة بدكم تتحملوا، لان ما فيي مثلا ما امرق على آخر تلفيقة اقتصادية طلع فيها خريج المريل لينش، ناوية ينشف اللبناني اللي ضخه، وعم يدعي العالم تجي تاخد دولار من البنوك عال ١٢٠٠٠، هيك بكون الحاكم بأمر الليرة لحاله صار حاطت ٣ اسعاد للدولار ١٥١٥، ٣٩٠٠، و١٢٠٠٠ هول الاسعار الرسمية، هلق الجهبذة كيف بتصير؟ اول شي مصرياتكم العلقانين بالبنك ما خصهم، هول علقانين ورح يبقوا علقانين، بدكم دولار بتروحوا حاملين الكاش (يعني لبناني فريش) والمستندات ليه عايزين الدولار وبتقدموا طلب.. بس في تفصيل صغير اذا وافق كبير اللصوص على طلبكم ما بتحصلوا على دولار، الدولار بيتحول مباشرة للمصارف المراسلة.. يعني سامعين بتجارة جحا بالبيض؟ اي هيديك كانت مفهومة اكتر وعندها اسس اصلب.

على الهامش الخسة صار بدها تشحيل

اي الخسة هيدي اللي بتنمى براس اللبناني بشكل عام انه هو لبناني وما حدا بده وافهم من غيره بدرجه واذوق من غيره بدرجتين ومتحضر اكتر من غيره ب ٣ درجات

اكيد هيدي الخسة عندها احجام، مرات بتختلف بحسب الطوائف ومرات بيتخلف حجمها بحسب الاحزاب ويكتبر وبتضخم لتصير مرات عصيّة على القبع او التشحيل عند البعض

والخسة في الها ابعاد غالبا ما بتكون طائفية داخليا او عنصرية اقليميا، وبشكل عام ما بتتحجم الا بعد مصيبة كبيرة

يعني مثلا الهجوم على السوريين اللي رايحين ينتخبوا بشار الاسد.

اولا بخصوص القوات. طلع الحكيم حط زيح الاستراتيجية بانه السوري اللي بده ينتخب بشار الاسد مش نازح يروح يعيش عنده لان مش خايف من البطش ولا الحرب وتنتفي عنه صفة اللاجئ كلام سليم جدا.. نزلتوا عالشارع يزيح التكتيك.. ليه؟ انه شو حسيتوا؟ شفتوا كيف نقحت عليكم الخسة ما حملكم راسكم نزلتوا استعرضتوا وطلعوا مسائيلكم يبرروا انه تم استفزازكم يا دلي انا صايرين هلقد حساسين شو اول مرة بينتخبوا السوريين ع ارضكم؟

وانت اللبناني اللي مش قوات بس ضربت او عم تهلل للضرب، انه انت عم تضرب اللي نازل ينتخب بشار الاسد.. بس بتطلع بتهتف بالدم بالروح للي قاتل مع بشار الاسد، وبتنتخب اللي متحالف مع بشار الاسد.. وبتقدس اللي مستمد سلطته من بشار الاسد، ومستعد تقتل كرمال اللي تقاسم البلد مع ازلام وحلفاء بشار الاسد!

بعرف الخسة حاجبة الرؤية، بس يعني اللي بينتخب نفس الطبقة الفاسدة المجرمة اللي قتلته عالهوية ودمرت بلده وسرقته لاكتر من ٣٠ سنة ما كتير اله حق ينتقد خيارات العالم الانتخابية معليه يعني.

بس متل العادة ما بيخلص المشهد اذا ما فات رئيس الما خلونا عليه، لازم يعورض بكل مشهد، بتحس حالك بدك تقل له يا جبران اطلاع من الكادر.. طلع وخبرنا انه كان بده يرد السوريين على بلادهم بكرامة، بس ما خلوه

اول شي ما بقى عم لحق لك صفات والقاب الشريف النظيف بالكهربا وهلق ملك التسامح والاخلاق العالية، لما طرحت حضرتك ترحيل السوريين كان موقف عنصري لا والاهم كان موقف ابتزازي لتقبض عليهم. وابدا ما كنت خايف ع كرامتهم لانهم اصلا من وقت اللي وصلوا شكلوا لك الشماعة الافضل لفشلك المتتالي ليه ما في كهربا لان في سوريين ليه السدود ما جمعت ميّ في سوريين او نسيت انت وتيارك والفرق انها الحقيقة.بس بتفهم اشرئبابك كل ما القوات يعملوا شي عملي هيك بتعرم ع تويتر وانه انت يعني القصة كلها.

شو ما سمعنا صوتك بموضوع شربل وهبة؟ وين بدنا نسمعه ما ترباية تيار الما خلونا.. اكيد اكيد شربل وهبة تاني حدا رح يلاقي شغل بالمحافل الدولية بعد رياض سلامة.. انا بقول يوم تعيين شربل وهبه اكلها صيبة عين من يوم اللي قبل بالتعيين ما تهنى فيه، ما لحق اجا بدل ناصيف حتي طلع انفجار المرفأ اول مرة انذكر اسمه كان صار وزير تصريف اعمال، واول مرة حكي فيها يعني خرب الدنيا وخلا تلات ارباع الطبقة السياسية بما فيهم هو ورئيسه يعتذروا بطرق مباشرة وغير مباشرة.

حدا ملاحظ كإنه في قرار غير معلن عند العونيين، انه اي منصب بيستلمه رئيس الما خلونا، محرم يجي حدا عليه ويعمل اي انجاز، لازم اي حدا يجي يكون وجوده تدميري حتى يبقى اسم جبران باسيل هو الابرز بالمرحلة، ليبقى الواحد حاسس انه الله خلقه وكسر القالب، شوفوا من بعد مروره الكريم على وزارة الطاقة استعرضوا الوجوه والانجازات حتى هدر ال ٤٠ مليار صاروا مرتبطين باسمه قد ما كان جهبذ بادارة الامور،

ومن يوم ما وصل عالخارجية وموقفه الشهير من كارولاين وما عم نلحق على صورتنا قدام دول العالم حتى مع اللي عمله شربل وهبه

على سيرة الاعتذار كتير معبر اعتذاركم باسمنا نحن الشعب، اول شي انا ما بدي اعتذر مش لاني بوافق بأي شكل من الاشكال على اللي انقال لان ببساطة شربل وهبة ما بمثلني تماما متل ما كل واحد فيكم اعتبر حاله مسؤول وراح يعتذر ما بمثلني للمرة المية بعد المليون كلكن يعني كلكن ما بتمثلوني اي عم ارجع عيدها ببساطة نحن علقانين بين ايدين طبقة سياسية اقتصادية قضائية متعجرفة فاسدة مجرمة ووقحة،

ان شاء الله موت اذا عم كذب صار لازم دول العالم كلها تعرف انه نحن ما لازمنا مين يعتذر عنا نحن بحاجة لمين يحررنا منكم انتو اللي كل يوم قادرين تبتكروا اسلوب جديد باذلالنا ومسح الارض بكرامتنا بقولوا اللي استحوا ماتوا، بس للاسف اللي ما استحوا بهالبلد وهني كتير كتار عم يقتلونا كل يوم

خليني ساكتة