خليني ساكتة ٩٩ - ممنوع المسّ بمقام رئيس الجمهورية.. بأمرك يا BOSS!

خليني ساكتة

تم النشر في 6 يونيو 2021

أول شي هو ما حلف يحفظنا كشعب او يحفظ كرامتنا او يحفظ حقوقنا يعني وقفوا وعن جد وقفوا تحطوا اللوم على رئيس الجمهورية لأن هو مهمته اكبر من هيك بتبلش بصون الدستور مرورا باستقلالية البلد وصولا لسلامة أراضيه.. يعني كمان ما حلف انه يحافظ على استقلالية القضاء، بليز ما يطلع حدا يقل لي انه استقلالية القضاء جزء من الدستور لإن هيدي تفاصيل ما بحب فوت فيها أنا صراحة بتوجع الراس وكمان بتأثر على العيش المشترك.

وهو الرئيس by default بيحترم القضاء تماماً متل الحاكم بأمر الليرة، القضاء المحلي بس لإن هيدا ما بقرب صوبه اما القضاء الخارجي متل السويسري والفرنسي هيدا شي تاني. من باب احترامهم للقضاء عزموه كله على القهوة وحلوها اهلية بمحلية، وخلص الاجتماع بي الكل ربحان وكبير اللصوص ربحان وكمان مجلس الشورى ربحان ليه؟ لإنهم حسوا مع العالم وحققوا لها مطلبها بإنه يبقى الدفع على ٣٩٠٠ ليرة.

لا البلد مش مفلس نحن ما عم ندفع اعتماداتنا وديوناتنا واموال المودعين لانه كيف بدي قل لكم منحب ال suspense انه ملاقيين العالم مرتاحة على وضعها خفنا تموت من الزهق قلنا منقلتها من القهر والجوع والتعتير.

المصيبة انه مش بس سرقوا مصرياتنا، وجوفوا البلد من مقومات العيش، يعني صرنا عايشين ببيوت modern بس على اسلوب العصر الحجري، لان الموتور بلش تقنين والكهربا اصلا مش محسوبة بحياتنا، بتلاقي المايكروييف، البويلير، قداحة الغاز اللي عالكهربا الغسالة البراد الاضاءة المخفية والظاهرة عم يتطلعوا فيك ويضحكوا عليك، انه يا حرام عليك جبت كل هيدا بس نسيت تخبي قداحة طبيعية، كبريتي، شمعة.. ليومك الاسود

بسيطة معليه جاية العز اقروا ٤٠٠$ فريش ومتلهم على ١٢٠٠٠، بتحس هالقرار رياض سلامة، متل اللي بده يترك صاحبته وما عم يلاقي الطريقة المناسبة ليخبرها، كل يوم بيطلب طلب تعجيزي اكتر من يوم لحد ما هو تفل لحالها. وهيك المصرف اللي ما قادر يدفع الخرجية في يحل نفسه، يعلن افلاسه او حتى يندمج مع غيره، بس بكون الحاكم بأمر الليرة ما سوّد وجه مع حدا.

للحقيقة القرار اهون الشرين على المودع اللي بقل لك انا بدي اكل عنب ما بدي اقتل الناطور، بس للحقيقة كيف بدكم تقم لنا قيامة كبلد اذا أسبوع واحد طلعتوا ٣ قرارات اقتصادية ولا واحد فيهم مرتكز على اي قاعدة او على اي دراسة، عادي عم تجربوا على قاعدة يا رب تجي في عينه، لا وبتستغربوا كيف صرنا بقعر التصنيفات العالمية وانه في مؤامرة كونية على اقتصادنا.. نحن لازم نعمل تمثال لرياض سلامة لان بكل بلد لازم يكون في ايقونة ترمز او تلخص كل مميزات البلد، نحن اذا بدنا نشخصن البلد نستبدله انسان بيطلع الحاكم بامر الليرة اللي ما معروف اذا هو صاحب افشل هندسات اقتصادية بالعالم او خريج المريلي الليش متل البلد ما معروف منهار او ولعان بالسهر ما معروف مذلول او فايض كرامة ما معروف اذا ممسوح او شامخ.

بزي لغة الواحد بده يحكي، لو عم تحكوا سياسة

منناقشكم بالسياسة لو عم تحكوا اقتصاد منناقش بالاقتصاد لو عم تحكوا قضاء دستور منناقشكم باللي بدكم اياه، بس انتم عم تحكوا لغة خاصة فيكم مش موجودة ولا محل بالعالم، هرطقة سلطوية لا اكتر ولا اقل، انتم عالم وقاحتكم تخطت الحدود العادية، بتطلعوه للواحد من تيابه، يعني مثلا رياض قبيسي، بلش البرنامج اول حلقة عادي طبيعي، مع كل حلقة فضيحتكم تكبر ووقاحتكم تكبر صار لازم ياخد دوا اعصاب قبل ما يطلع يحكي عن ملف البواخر، انه مش بس فاسدين ووقحين لا الا بتطلعوا بدكم تحارجوا وتجادلوا وتاخدونا بفجوركم.. والمصيبة الكبيرة انه هيدا الملف المنزه المعطر النموذجي، فشو ممكن نلاقي اذا فتحنا ملف تلزيمات عادية مش انه رئيس تيار الاصلاح والتغيير كاتبه بإيده ومشرف على كل تفاصيله، اللي ستر وما خلوه اذا ما خلوه وهيك كيف لو خلوه؟

على الهامش بالبعد الخارجي للانهيار كل اسبوع بيطلع مجموعة من الزعما او السفرا او الوزراء العالم بحذروا حكامنا من انه الوضع لبنان خطر ولازم ينتبهوا لنا، بقوموا اللي عنا واحد بيحرد، واحد يزعل وواحد يصرح انه هو ما خصه التاني هو السبب.

اما المرشد الاعلى المحلي ما خصه بالعرقلة هو قال كلمته ومشى، ما بيقدر يمون تماما متل ما يقدر يمون على الحدود وتهريب المازوت والبنزين والطحين، الازمة اصلا اميركية سعودية، متل ما شايفين كل يوم كل يوم بايدن ما عنده شغلة عملة الا لبنان، مش انه طالع الزلمة عم يوزع جوائز طومبولة للي بيطعم على اراضيه وآخر هم ع قلبه هو وشعبه شو عم بصير.. وما منقدر نذكر المرشد بلا ما نذكر امتدادته الاقليمية قال ايران خسرت حق التصويت بالامم المتحدة (لا ما حزرته هالمرة مش لانها محور ممانعة، ببساطة لانها مش عم تدفع اشتراكاتها.. وين سامعين هالقصة قبل؟ اي اي تحديدا قل لي من تعاشر اقل لك من انت.

بس نحن سباقين مش بس ما كنا عم ندفع الاشتراكات، هلق ما بقى معنا ندفع للمحكمة الدولية، لا وبيطلع حسان اكبر انجازاتي بطالب المجتمع الدولي يلاقي البديل.. معليه هيدا الموضوع الواحد ده يحكي اللي اله واللي عليه، انه مثلا س المحكمة الدولية اشتغلت وقبضت كل هالقبض وبعد كل هالسنين شو عملت؟ ما خبرتنا ولا كلمة نحن ما منعرفها، والاهم انها طلعت سمت متهم واحد بقتل الحريري، لسخرية القدر انه هالمتهم يعني بظن غير امه وبيه ما حدا كان سامع فيه، اذا هيدا ال inconito يعني بالكاد عنصر فيهم بأي ثانية يوصفوه بالمتفلت ما قدرت المحكمة الدولية تستجوبه او ما حدا قادر يجيبه او يحاكمه او اي شي.. يعني خلص خلونا نوفر هالمصريات.. ما اصلا مش من صالح حدا تنجح المحكمة الدولية تخايلوا انه مثلا تنجح بمهمتها نقوم نحن نتحمس ونطلب منها تحقق بجريمة العصر.. شو بصير؟؟؟

حسان اكبر انجازاتي خطابه عم بقول مر ٣٠٠ يوم على استقالة حكومتي بتعرفوا شو يعني؟ يعني مر ٣٠٠ يوم على جريمتكم الوقحة وبعدنا لحد اليوم ما شفنا مسؤول واحد تم استجوابه او توقيفه.. ابدا بعدكم مشغولين بنصبنا ونهبنا واذلالنا بقولوا خود مصرياتك ع ٣٩٠٠ برد بأمرك يا بوس، ٤٠٠$ بالشهر بامرك ياخيي، البنزين بالتقسيط بامرك يا بوس، رح نرفع الدعم بأمرك يا بوس، ما في كهربا بامرك يا بوس ما في موتور بأمرك

ان شاء الله موت اذا عم كذب بس الشي الوحيد اللي بالطريق ع جهنم زبط معنا هو الوقوف بالصف، هيك فجأة اللبناني صار بيوقف بالصف وما بيفتح تمه... مرات بقوص بس ما بيفتح تمه... مع هيدا العجقة وين ما كان بتحس الشعب مقسوم قسمين قسم بنق وبعدين بيضهر وبيسهر، وقسم تاني بيضهر وبيسهر وبعدين بيرجع بنق خليني ساكتة